Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
II. Nidāna Vagga
15. Anamat'agga-Saɱyuttaɱ
I. Paṭhama Vagga

Sutta 7

Sāvakā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[182]

[1][pts] Evam me sutaɱ|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

[183] Atha kho sambahulā bhikkhū yena Bhagavā ten'upasankamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū Bhagavantaɱ etad avocuɱ:|| ||

"Kīɱ va bahukā nu kho bhante,||
kappā abbhatītā atikkantā" ti?|| ||

"Bahukā kho bhikkhave, kappā abbhatītā atikkantā.|| ||

Te na sukarā saŋkhātuɱ||
ettakā kappā iti vā,||
ettakāni kappa-satāni iti vā||
ettakāni kappa-sahassāni iti vā,||
ettakāni kappa-sata-sahassāni iti vā" ti.|| ||

"Sakkā pana bhante, upamaɱ kātun" ti?|| ||

"Sakkā bhikkhavo" ti Bhagavā avoca.|| ||

"Idhassu bhikkhave, cattāro sāvakā vassa-satāyukā vassa-satajīvino.|| ||

Te divase divase kappa-sata-sahassaɱ anussareyyuɱ.|| ||

Ananussaritā va bhikkhave, tehi kappā assu.|| ||

Atha te cattāro sāvakā vassa-satāyukā vassa-satajīvino vassa-satassa accayena kālaɱ kareyyuɱ.|| ||

Evaɱ bahukā kho bhikkhave,||
kappā abbhatītā atikkantā.|| ||

Te na sukarā saŋkhātuɱ||
ettakā kappā iti vā,||
ettakāni kappa-satāni iti vā,||
ettakāni kappa-sahassāni iti vā,||
ettakāni kappa-sata-sahassāni iti vā.|| ||

Taɱ kissa hetu?|| ||

Anamat'aggoyaɱ bhikkhave, saŋsāro.|| ||

Pubbā koṭi na paññāyati avijjā-nīvaraṇānaɱ sattānaɱ taṇhā-saŋyojanānaɱ sandhāvataɱ saŋsarataɱ.|| ||

Yāvañ c'idaɱ bhikkhave,||
alameva sabba-sankhāresu nibbindituɱ,||
alaɱ virajjituɱ,||
alaɱ vimuccitun" ti.|| ||


Contact:
E-mail
Copyright Statement