Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya,
Nidāna-vaggo
15. Anamatagga Saŋyuttam

Sutta 20

Vepullapabbatam Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ|| ||

Ekaɱ samayaɱ Bhagavā Rājagahe viharati Gijjhakūṭe pabbate.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ.|| ||

Bhagavā etad avoca:|| ||

"Anamataggoyaɱ bhikkhave, saɱsāro.|| ||

Pubbā koṭi na paññāyati avijjā-nīvaraṇānaɱ sattānaɱ taṇhā-saɱyojānānaɱ sandhāvataɱ saɱsarataɱ.|| ||

Pubbā koṭi na paññāyati avijjā-nīvaraṇānaɱ sattānaɱ taṇhā-saɱyojānānaɱ sandhāvataɱ saɱsarataɱ.|| ||

Bhūtapubbaɱ bhikkhave,||
imassa Vepullassa pabbatassa Pācīnavaɱso tv eva samaññā udapādi.|| ||

Tena kho pana [191] bhikkhave,||
samayena manussānaɱ Tivarā tv eva samaññā udapādi.|| ||

Tivarānaɱ bhikkhave,||
manussānaɱ cattārisaɱ vassasahassāni āyuppamāṇaɱ ahosi.|| ||

Tivarā bhikkhave,||
manussā Pācīnavaɱsaŋ pabbataɱ catuhena ārohanti,||
catuhena orohanti.|| ||

Tena kho pana samayena Kakusandho Bhagavā arahaɱ sammāsambuddho loke uppanno hoti.|| ||

Kakusandhassa bhikkhave,||
Bhagavato arahato sammāsambuddhassa||
Vidhura-Sañjīvaɱ nāma sāvakayugaɱ ahosi||
aggaɱ bhaddayugaɱ.|| ||

Passatha bhikkhave,||
sā cevimassa pabbatassa samaññā antarahitā.|| ||

Te ca manussā kālaɱkatā.|| ||

So ca Bhagavā parinibbuto.|| ||

Evaɱ aniccā bhikkhave, sankhārā,||
evaɱ addhuvā bhikkhave, sankhārā,||
evaɱ anassāsikā bhikkhave, sankhārā.|| ||

Yāvañ c'idaɱ bhikkhave,||
alam eva sabbasankhāresu nibbindituɱ,||
alaɱ virajjituɱ,||
alaɱ vimuccituɱ.|| ||

Bhūtapubbaɱ bhikkhave,||
imassa Vepullassa pabbatassa Vaŋkako tv eva samaññā udapādi.|| ||

Tena kho pana bhikkhave,||
samayena manussānaɱ Rohitassā tv eva samaññā udapādi.|| ||

Rohitassānaɱ bhikkhave,||
manussānaɱ tiɱsavassasahassāni āyuppamāṇaɱ ahosi.|| ||

Rohitassā bhikkhave,||
manussā Vaŋkakaɱ pabbataɱ tīhena ārohanti,||
tīhena orohanti.|| ||

Tena kho pana bhikkhave,||
samayena Konāgamano||
Bhagavā arahaɱ sammāsambuddho||
loke uppanno hoti.|| ||

Konāgamanassa bhikkhave,||
Bhagavato arahato sammāsambuddhassa||
Bhiyyo-Suttaraɱ nāma sāvakayugaɱ ahosi||
aggaɱ bhaddayugaɱ.|| ||

Passatha bhikkhave,||
sā cevimassa pabbatassa samaññā antarahitā.|| ||

Te ca manussā kālaɱkatā.|| ||

So ca Bhagavā parinibbuto.|| ||

[192] Evaɱ aniccā bhikkhave, sankhārā,||
evaɱ addhuvā bhikkhave, sankhārā,||
evaɱ anassāsikā bhikkhave, sankhārā.|| ||

Yāvañ c'idaɱ bhikkhave,||
alam eva sabbasankhāresu nibbindituɱ,||
alaɱ virajjituɱ,||
alaɱ vimuccituɱ.|| ||

Bhūtapubbaɱ bhikkhave,||
imassa Vepullassa pabbatassa Suphasso tv eva samaññā udapādi.|| ||

Tena kho pana bhikkhave,||
samayena manussānaɱ Suppiya tv eva samaññā udapādi.|| ||

Suppiyānaɱ bhikkhave,||
manussānaɱ vīsati vassasahassāni āyuppamāṇaɱ ahosi.|| ||

Suppiyā bhikkhave,||
manussā Suphassaŋ pabbataɱ dvīhena ārohanti,||
dvīhena orohanti.|| ||

Tena kho pana bhikkhave,||
samayena Kassapo||
Bhagavā arahaɱ sammāsambuddho||
loke uppanno hoti.|| ||

Kassapassa bhikkhave,||
Bhagavato arahato sammāsambuddhassa||
Tissa-Bhāradvājaɱ nāma sāvakayugaɱ ahosi||
aggaɱ bhaddayugaɱ.|| ||

Passatha bhikkhave,||
sā cevimassa pabbatassa samaññā antarahitā.|| ||

Te ca manussā kālaɱkatā.|| ||

So ca Bhagavā parinibbuto.|| ||

Evaɱ aniccā bhikkhave, sankhārā,||
evaɱ addhuvā bhikkhave, sankhārā,||
evaɱ anassāsikā bhikkhave, sankhārā.|| ||

Yāvañ c'idaɱ bhikkhave,||
alam eva sabbasankhāresu nibbindituɱ,||
alaɱ virajjituɱ,||
alaɱ vimuccituɱ.|| ||

Etarahi kho pana bhikkhave,||
imassa Vepullassa pabbatassa Vepullo tv eva samaññā udapādi.|| ||

Etarahi kho pana bhikkhave,||
imesaŋ manussānaɱ Māgadhakā tv eva samaññā udapādi.|| ||

Māgadhakānaɱ bhikkhave,||
manussānaɱ appakaɱ āyuppamāṇaɱ parittaɱ lahukaɱ.|| ||

Yo ciraɱ jīvati,||
so vassasataɱ,||
appaɱ vā bhiyyo.|| ||

Māgadhakā bhikkhave,||
manussā Vepullaɱ pabbataɱ muhuttena ārohanti,||
muhuttena orohanti.|| ||

Etarahi kho panāhaɱ bhikkhave,||
arahaɱ sammāsambuddho||
loke uppanno.|| ||

Mayhaɱ kho pana bhikkhave,||
Sāriputta-Moggallānaɱ nāma sāvakayugaɱ||
aggaɱ bhaddayugaɱ.|| ||

Bhavissati bhikkhave, so samayo,||
yā ayañ cevimassa [193] pabbatassa samaññā antaradhāyissati.|| ||

Ime ce manussā kālaɱ karissanti.|| ||

Ahañ ca parinibbāyissāmi.|| ||

Evaɱ aniccā bhikkhave, sankhārā,||
evaɱ addhuvā bhikkhave, sankhārā,||
evaɱ anassāsikā bhikkhave, sankhārā.|| ||

Yāvañ c'idaɱ bhikkhave,||
alam eva sabbasankhāresu nibbindituɱ,||
alaɱ virajjituɱ,||
alaɱ vimuccituɱ" ti.|| ||

Idam avoca Bhagavā.|| ||

Idaɱ vatvā sugato athāparaɱ etad avoca satthā:|| ||

Pācīnavaɱso Tivarānaɱ||
Rohitassāna Vaŋkako,||
Suppiyānaɱ Suphassā ti||
Māgadhānañca Vepullo.|| ||

Aniccā vata sankhārā||
uppāda-vayadhammino,||
Uppajjitvā nirujjhanti||
tesaŋ vūpasamo sukho ti,|| ||

Duggatavaggo dutiyo.


Contact:
E-mail
Copyright Statement   Webmaster's Page