Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya,
Nidāna-vaggo
16. Kassapa Saŋyutta

Sutta 1

Saṇtuṭṭha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[194]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ.|| ||

Bhagavā etad avoca:|| ||

"Santuṭṭhoyaɱ bhikkhave, Kassapo itarītarena cīvarena.|| ||

Itarītara-cīvara-santuṭṭhiyā ca vaṇṇavādī||
na ca cīvara-hetu anesanaɱ appatirūpaɱ āpajjati.|| ||

Aladdhā ca cīvaraɱ na paritassati||
laddhā ca cīvaraɱ agadhito,||
amucchito anajjhāpanno ādīnavadassāvī nissaraṇapañño paribhuñjati.|| ||

Santuṭṭhoyaɱ bhikkhave, Kassapo itarītarena piṇḍapātena.|| ||

Itarītara-piṇḍapāta-santuṭṭhiyā ca vaṇṇavādī||
na ca piṇḍapātahetu anesanaɱ appatirūpaɱ āpajjati.|| ||

Aladdhā ca piṇḍapātaɱ na paritassati||
laddhā ca piṇḍapātaɱ agadhito,||
amucchito anajjhāpanno ādīnavadassāvī nissaraṇapañño paribhuñjati.|| ||

Santuṭṭhoyaɱ bhikkhave, Kassapo itarītarena senāsanena.|| ||

Itarītara-senāsana-santuṭṭhiyā ca vaṇṇavādī||
na ca senāsana hetu anesanaɱ appatirūpaɱ āpajjati.|| ||

Aladdhā ca senāsanaɱ na paritassati,||
laddhā ca senāsanaɱ agadhito,||
amucchito anajjhāpanno ādīnavadassāvī nissaraṇapañño paribhuñjati.|| ||

Santuṭṭhoyaɱ bhikkhave, Kassapo itarītarena gilāna-paccaya-bhesajja-parikkhārena.|| ||

Itarītara-gilāna-paccaya-bhesajja-parikkhāra-santuṭṭhiyā ca vaṇṇavādī||
na ca gilānapaccayabhesajjaparikkhārahetu anesanaɱ appatirūpaɱ āpajjati.|| ||

Aladdhā ca gilāna-paccaya-bhesajja-parikkhāraɱ na paritassati,||
laddhā ca gilāna-paccaya-bhesajja-parikkhāraɱ agadhito,||
amucchito anajjhāpanno ādīnavadassāvī nissaraṇapañño paribhuñjati.|| ||

 


 

Tasmāt iha bhikkhave evaɱ sikkhitabbaɱ.|| ||

'Santuṭṭhā bhavissāma itarītarena cīvarena.|| ||

Itarītara-civira-santuṭṭhiyā [195] ca vaṇṇavādino||
na ca cīvara-hetu anesanaɱ appatirūpaɱ āpajjissāma.|| ||

Aladdhā ca cīvaraɱ na paritassissāma,||
laddhā ca cīvaraɱ agadhitā amucchitā anajjhāpannā ādinavadassāvino nissaraṇa-paññā paribhuñjissāma.'|| ||

Evam sabbam kātabbaɱ.|| ||

'Santuṭṭhā bhavissāma itarītarena piṇḍapātena.|| ||

Itarītara-piṇḍapāta-santuṭṭhiyā vaṇṇavādino,||
na ca piṇḍapāta-hetu anesanaɱ appatirūpaɱ āpajjissāma.|| ||

Aladdhā ca piṇḍapātaɱ na paritassissāma,||
laddhā ca piṇḍapātaɱ agadhitā amucchitā anajjhāpannā ādinavadassāvino nissaraṇa-paññā paribhuñchissāma.'|| ||

Evam sabbam kātabbaɱ.|| ||

'Santuṭṭhā bhavissāma itarītarena senāsanena.|| ||

Itarītara-senāsana-santuṭṭhiyā vaṇṇavādino,||
na ca senāsana-hetu anesanaɱ appatirūpaɱ āpajjissāma.|| ||

Aladdhā ca senāsanaɱ na paritassissāma,||
laddhā ca senāsanaɱ agadhitā amucchitā anajjhāpannā ādīnavadassāvino nissaraṇa-paññā paribhuñjissāma.'|| ||

Evam sabbam kātabbaɱ.|| ||

'Santuṭṭhā bhavissāma itarītarena gilāna-paccaya-bhesajja-parikkhārena.|| ||

Itarītara-gilāna-paccaya-bhesajja-parikkhāra-santuṭṭhiyā ca vaṇṇavādino,||
na ca gilāna-paccaya-bhesajja-parikkhāra-hetu anesanaɱ appatirūpaɱ āpajjissāma.|| ||

Aladdhā ca gilāna-paccaya-bhesajja-parikkhāraɱ na paritassissāma,||
laddhā ca gilāna-paccaya-bhesajja-parikkhāraɱ agadhitā amucchitā anajjhāpannā ādīnavadassāvino nissaraṇapaññā paribhuñjissāmā.'|| ||

Evam sabbam kātabbaɱ.|| ||

Evaɱ hi kho bhikkhave, sikkhitabbaɱ.|| ||

Kassapena vā hi vo bhikkhave, ovadissāmi,||
yo vā panassa Kassapasadiso||
ovaditehi ca pana vo tathattāya paṭipajjitabban" ti.|| ||


Contact:
E-mail
Copyright Statement   Webmaster's Page