Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya,
Nidāna-vaggo
16. Kassapa Saŋyutta

Sutta 5

Jiṇṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Rājagahe viharati veluvane kalandaka nivāpe.|| ||

Atha kho āyasmā Mahā-Kassapo yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ mahāKassapaɱ Bhagavā etad avoca:|| ||

"Jiṇṇosidāni tvaɱ Kassapa.|| ||

Garukāni kho te1 imāni sāṇāni paɱsukūlāni nibbasanāni.|| ||

Tasmāt iha tvaɱ Kassapa, gahapatikāni c'eva cīvarāni dhārehi,||
nimantaṇesu ca bhuñjāhi,||
mamañ ca santike viharāhī" ti.|| ||

"Ahaɱ kho bhante,||
dīgha-rattaɱ āraññako c'eva,||
āraññakattassa ca vaṇṇavādī;||
piṇḍapātiko c'eva,||
piṇḍapātikattassa ca vaṇṇavādī;||
paɱsukūliko c'eva,||
paɱsukūlikattassa ca vaṇṇavādī;||
tecīvariko c'eva,||
tecīvarikattassa ca vaṇṇavādī;||
appiccho c'eva,||
appicchatāya ca vaṇṇavādī;||
santuṭṭho c'eva,||
santuṭṭhiyā ca vaṇṇavādī;||
pavivitto c'eva,||
pavivekassa ca vaṇṇavādī;||
asaɱsaṭṭho c'eva,||
asaɱsaggassa ca vaṇṇavādī;||
āraddhaviriyo c'eva,||
viriyārambhassa ca vaṇṇavādī".|| ||

"Kiɱ pana tvaɱ Kassapa,||
atthavasaɱ sampassamāno,||
dīgha-rattaɱ āraññako c'eva,||
āraññakatassa ca vaṇṇavādī;||
piṇḍapātiko c'eva,||
piṇḍapātikassa ca vaṇṇavādī;||
paɱsukūliko c'eva,||
paɱsukūlikattassa ca vaṇṇavādī;||
tecīvariko c'eva,||
tecīvarikattassa ca vaṇṇavādī;||
appiccho c'eva,||
appicchatāya ca vaṇṇavādī;||
santuṭṭho c'eva,||
santuṭṭhiyā ca vaṇṇavādī;||
pavivitto c'eva,||
pavivekassa ca vaṇṇavādī;||
asaɱsaṭṭho c'eva,||
asaɱsaggassa ca vaṇṇavādī;||
āraddhaviriyo c'eva,||
viriyārambhassa ca vaṇṇavādī" ti?|| ||

"Dve khohaɱ bhante,||
atthavase sampassamāno||
dīgha-rattaɱ āraññako c'eva,||
āraññakattassa ca vaṇṇavādī;||
[203] piṇḍapātiko c'eva,||
piṇḍapātikassa ca vaṇṇavādī;||
paɱsukūliko c'eva,||
paɱsukūlikattassa ca vaṇṇavādī;||
tecīvariko c'eva,||
tecīvarikattassa ca vaṇṇavādī;||
appiccho c'eva,||
appicchatāya ca vaṇṇavādī;||
santuṭṭho c'eva,||
santuṭṭhiyā ca vaṇṇavādī;||
pavivitto c'eva,||
pavivekassa ca vaṇṇavādī;||
asaɱsaṭṭho c'eva,||
asaɱsaggassa ca vaṇṇavādī;||
āraddhaviriyo c'eva,||
viriyārambhassa ca vaṇṇavādī:|| ||

Attanā ca diṭṭhadhammasukhavihāraɱ sampassamāno -||
pacchimañ cajanataɱ anukampamāno|| ||

'Appeva nāma pacchimā janatā diṭṭhānugatiɱ āpajjeyya.|| ||

Ye kira te ahesuɱ buddhānubuddhasāvakā,||
te||
dīgha-rattaɱ āraññakā c'eva ahesuɱ,||
āraññakattassa ca vaṇṇavādino;||
piṇḍapātikā c'eva ahesuɱ,||
piṇḍapātikattassa ca vaṇṇavādino;||
paɱsukūlikā c'eva ahesuɱ,||
paɱsukūlikattassa ca vaṇṇavādino;||
tecīvarikā c'eva ahesuɱ,||
tecīvarikattassa ca vaṇṇavādino;||
appicchā c'eva ahesuɱ,||
appicchassa ca vaṇṇavādino;||
santuṭṭhā c'eva ahesuɱ,||
santuṭṭhassa ca vaṇṇavādino;||
pavivittā c'eva ahesuɱ,||
pavivittassa ca vaṇṇavādino;||
asaɱsaṭṭhā c'eva ahesuɱ,||
asaɱsaṭṭhassa ca vaṇṇavādino;||
āraddhaviriyā c'eva ahesuɱ,||
viriyārambhassa ca vaṇṇavādino'ti.|| ||

Te tathattāya paṭipajjissanti.|| ||

Tesaɱ taɱ bhavissati dīgha-rattaɱ hitāya sukhāya.|| ||

"Ime khohaɱ bhante,||
dve atthavase sampassamāno||
dīgha-rattaɱ āraññako c'eva,||
āraññakattassa ca vaṇṇavādī;||
piṇḍapātiko c'eva,||
piṇḍapātikassa ca vaṇṇavādī;||
paɱsukūliko c'eva,||
paɱsukūlikattassa ca vaṇṇavādī;||
tecīvariko c'eva,||
tecīvarikattassa ca vaṇṇavādī;||
appiccho c'eva,||
appicchatāya ca vaṇṇavādī;||
santuṭṭho c'eva,||
santuṭṭhiyā ca vaṇṇavādī;||
pavivitto c'eva,||
pavivekassa ca vaṇṇavādī;||
asaɱsaṭṭho c'eva,||
asaɱsaggassa ca vaṇṇavādī;||
āraddhaviriyo c'eva,||
viriyārambhassa ca vaṇṇavādī" ti.|| ||

"Sādhu, sādhu, Kassapa,||
bahujanahitāya kira tvaɱ Kassapa,||
paṭipanno bahujanasukhāya lokānukampāya atthāya hitāya sukhāya deva-manussānaɱ.|| ||

Tasmāt iha tvaɱ Kassapa,||
sāṇāni c'eva paɱsukūlāni dhārehi nibbasanāni,||
piṇḍāya ca carāhi,||
araññe ca viharāhī" ti.|| ||


Contact:
E-mail
Copyright Statement   Webmaster's Page