Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya,
Nidāna-vaggo
16. Kassapa Saŋyutta

Sutta 10

Bhikkhun'upassaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[214]

[1][pts][bodh] Evaɱ me sutaɱ|| ||

Ekaɱ samayaɱ āyasmā Mahā Kassapo Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Ānando pubbaṇhasamayaɱ nivāsetvā [215] pattacīvaram ādāya yenāyasmā Mahā Kassapo ten'upasaŋkami.|| ||

Upasaŋkamitvā āyasmantaɱ Mahā Kassapaɱ etad avoca:|| ||

"Āyāma bhante, Kassapa, yenaññataro bhikkhunūpassayo ten'upasaŋkamissamā" ti.|| ||

"Gaccha tvaɱ āvuso Ānanda, bahukicco tvaɱ bahukaraṇīyo" ti.|| ||

Dutiyam pi kho āyasmā Ānando āyasmantaɱ Mahā Kassapaɱ etad avoca:|| ||

"Āyāma bhante Kassapa, yenaññataro bhikkhunūpassayo ten'upasaŋkamissāmā" ti.|| ||

"Gaccha tvaɱ āvuso Ānanda, bahukicco tvaɱ bahukaraṇīyo" ti.|| ||

Tatiyam pi kho āyasmā Ānando, āyasmantaɱ Mahā Kassapaɱ etad avoca:|| ||

"Āyāma bhante Kassapa, yenaññataro bhikkhunūpassayo ten'upasaŋkamissāmā" ti.|| ||

Atha kho āyasmā Mahā Kassapo pubbaṇhasamayaɱ nivāsetvā pattacīvaram ādāya āyasmatā Ānandena pacchāsamaṇena yenaññataro bhikkhunūpassayo ten'upasaŋkami.|| ||

Upasaŋkamitvā paññatte āsane nisīdi.|| ||

Atha kho sambahulā bhikkhuniyo yenāyasmā Mahā Kassapo ten'upasaŋkamiɱsu.|| ||

Upasaŋkamitvā āyasmantaɱ Mahā Kassapaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho tā bhikkhuniyo āyasmā Mahā Kassapo dhammiyā kathāya sandassesi samādapesi samuttejesi sampahaɱsesi.|| ||

Atha kho āyasmā Mahā Kassapo tā bhikkhuniyo dhammiyā kathāya sandassetvā samādapetvā samuttechetvā sampahaɱsetvā uṭṭhāy āsanāpakkami.|| ||

Atha kho thullatissā bhikkhunī anattamanā anattamanavācaɱ nicchāresi:|| ||

"Kiɱ panayyo Mahā Kassapo ayyassa Ānandassa vedehamunino sammukhā dhammaɱ bhāsitabbaɱ maññati?|| ||

Seyyathā pi nāma sūcivāṇijako [216] sūcikārassa santike sūciɱ vikketabbaɱ maññeyya.|| ||

Evam evaɱ ayyo Mahā Kassapo ayyassa Ānandassa vedehamunino sammukhā dhammaɱ bhāsitabbaɱ maññatī" ti.|| ||

Assosi kho āyasmā Mahā Kassapo thullatissāya bhikkhuniyā imaɱ vācaɱ bhāsamānāya.|| ||

Atha kho āyasmā Mahā Kassapo āyasmantaɱ Ānandaɱ etad avoca:|| ||

"Kin nu kho āvuso Ānanda,||
ahaɱ sūcivāṇijako,||
tvaɱ sūcikāro?|| ||

Udāhu ahaɱ sūcikāro,||
tvaɱ sūcivāṇijako" ti?|| ||

"Khamatha bhante Kassapa, bālo mātugāmo" ti.|| ||

"Āgamehi tvaɱ āvuso Ānanda,||
mā te saŋgho uttariɱ upaparikkhi.|| ||

Taɱ kiɱ maññasi āvuso Ānanda?|| ||

Api nu tvaɱ Bhagavato sammukhā bhikkhusaŋghe upanīto:|| ||

'Ahaɱ bhikkhave, yāvade ākaŋkhāmi, vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamajjhānaɱ upasampajja viharāmi.|| ||

Ānando pi bhikkhave, yāvade ākaŋkhati vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamajjhānaɱ upasampajja viharatī' ti"?|| ||

"No h'etaɱ bhante."|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamajjhānaɱ upasampajja viharāmi.|| ||

Kassapo pi bhikkhave, yāvade ākaŋkhati vivicce va kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamajjhānaɱ upasampajja viharati.|| ||

Taɱ kiɱ maññasi āvuso Ānanda?|| ||

Api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi vitakka-vicārānaɱ vūpasamā ajjhattaɱ sampasādanaɱ cetaso ekodibhāvaɱ avitakkaɱ avicāraɱ samādhijaɱ pīti-sukhaɱ dutiyajjhānaɱ upasampajja viharāmi.|| ||

Ānando pi bhikkhave, yāvade ākaŋkhati vitakka-vicārānaɱ vūpasamā ajjhattaɱ sampasādanaɱ cetaso ekodibhāvaɱ avitakkaɱ avicāraɱ samādhijaɱ pīti-sukhaɱ dutiyajjhānaɱ upasampajja viharatī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Yāvade ākaŋkhāmi vitakka-vicārānaɱ vūpasamā ajjhattaɱ sampasādanaɱ cetaso ekodibhāvaɱ avitakkaɱ avicāraɱ samādhijaɱ pīti-sukhaɱ dutiyajjhānaɱ upasampajja viharāmi.|| ||

Kassapo pi bhikkhave, yāvade ākaŋkhati vitakka-vicārānaɱ vūpasamā ajjhattaɱ sampasādanaɱ cetaso ekodibhāvaɱ avitakkaɱ avicāraɱ samādhijaɱ pīti-sukhaɱ dutiyajjhānaɱ upasampajja viharatī' ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi pītiyā ca virāgā upekkhako ca viharāmi, sato ca sampajāno.|| ||

Sukhaɱ ca kāyena paṭisaŋvedemi.|| ||

Yaɱ taɱ ariyā ācikkhanti 'upekkhako satimā sukhavihārī' ti, tatiyajjhānaɱ upasampajja viharāmi.|| ||

Ānando pi bhikkhave, yāvade ākaŋkhati pītiyā ca virāgā upekkhako ca viharati, sato ca sampajāno.|| ||

Sukhaɱ ca kāyena paṭisaŋvedeti.|| ||

Yaɱ taɱ ariyā ācikkhanti 'upekkhako satimā sukhavihārī' ti, tatiyajjhānaɱ upasmapajja viharatī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi pītiyā ca virāgā upekkhako ca viharāmi, sato ca sampajāno.|| ||

Sukhaɱ ca kāyena paṭisaŋvedemi.|| ||

Yaɱ taɱ ariyā ācikkhanti 'upekkhako satimā sukhavihārī'ti, tatiyajjhānaɱ upasampajja viharāmi.|| ||

Kassapo pi bhikkhave, yāvade ākaŋkhati pītiyā ca virāgā upekkhako ca viharati, sato ca sampajāno.|| ||

Sukhaɱ ca kāyena paṭisaŋvedeti.|| ||

Yaɱ taɱ ariyā ācikkhanti 'upekkhako satimā sukhavihārī' ti, tatiyajjhānaɱ upasmapajja viharatī' ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sukhassa ca pahāṇā dukkhassa ca pahāṇā pubb'eva somanassa domanassānaɱ attha-gamā adukkha-m-asukhaɱ upekkhā-sati-pārisuddhiɱ catutthajjhānaɱ upasampajja viharāmi.|| ||

Ānando pi bhikkhave, yāvade ākaŋkhati sukhassa ca pahāṇā dukkhassa ca pahaṇā pubb'eva somanassa domanassānaɱ attha-gamā adukkha-m-asukhaɱ upekkhā-sati-pārisuddhiɱ catutthajjhānaɱ upasampajja viharatī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sukhassa ca pahāṇā dukkhassa ca pahāṇā pubb'eva somanassa domanassānaɱ attha-gamā adukkha-m-asukhaɱ upekkhā-sati-pārisuddhiɱ catutthajjhānaɱ upasampajja viharāmi.|| ||

Kassapo pi bhikkhave, yāvade ākaŋkhati sukhassa ca pahāṇā dukkhassa ca pahaṇā pubb'eva somanassa domanassānaɱ attha-gamā adukkha-m-asukhaɱ upekkhā-sati-pārisuddhiɱ catutthajjhānaɱ upasampajja viharatī' ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso rūpa-saññānaɱ samatikkamā paṭigha-saññānaɱ attha-gamā nānattasaññānaɱ amanasi-kārā 'ananto ākāso' ti ākāsānañcāyatanaɱ upasampajja viharāmi.|| ||

Ānando pi bhikkhave, yāvade ākaŋkhati sabbaso rūpa-saññānaɱ samatikkamā paṭigha-saññānaɱ attha-gamā nānattasaññānaɱ amanasi-kārā 'ananto ākāso'ti ākāsānañcāyatanaɱ upasampajja viharatī" ti.|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso rūpa-saññānaɱ samatikkamā paṭigha-saññānaɱ attha-gamā nānattasaññānaɱ amanasi-kārā 'ananto ākāso' ti ākāsānañcāyatanaɱ upasampajja viharāmi.|| ||

Kassapo pi bhikkhave, yāvade ākaŋkhati sabbaso rūpa-saññānaɱ samatikkamā paṭigha-saññānaɱ attha-gamā nānattasaññānaɱ amanasi-kārā 'ananto ākāso' ti ākāsānañcāyatanaɱ upasampajja viharatī" ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso ākāsānañcāyatanaɱ samatikkamma 'anantaɱ viññāṇan' ti viññāṇañcāyatanaɱ upasampajja viharāmi.|| ||

Ānando pi bhikkhave, yāvade ākaŋkhati sabbaso ākāsānañcāyatanaɱ samatikkamma 'anantaɱ viññāṇan' ti viññāṇañcāyatanaɱ upasampajja viharatī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso ākāsānañcāyatanaɱ samatikkamma 'anantaɱ viññāṇan' ti viññāṇañcāyatanaɱ upasampajja viharāmi.|| ||

Kassapo pi bhikkhave, yāvade ākaŋkhati sabbaso ākāsānañcāyatanaɱ samatikkamma 'anantaɱ viññāṇan' ti viññāṇañcāyatanaɱ upasampajja viharatī" ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso viññāṇañcāyatanaɱ samatikkamma 'n'atthi kiñcī' ti ākiñcaññāyatanaɱ upasampajja viharāmi.|| ||

Ānando pi bhikkhave, yāvade ākaŋkhati sabbaso viññāṇañcāyatanaɱ samatikkamma 'n'atthi kiñcī' ti ākiñcaññāyatanaɱ upasampajja viharatī" ti.|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso viññāṇañcāyatanaɱ samatikkamma 'n'atthi kiñcī' ti ākiñcaññāyatanaɱ upasampajja viharāmi.|| ||

Kassapo pi bhikkhave, yāvade ākaŋkhati sabbaso viññāṇañcāyatanaɱ samatikkamma 'n'atthi kiñcī' ti ākiñcaññāyatanaɱ upasampajja viharatī" ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso ākiñcaññāyatanaɱ samatikkamma n'eva-saññā-nāsaññāyatanaɱ upasampajja viharāmi.|| ||

Ānando pi bhikkhave, yāvade ākaŋkhati sabbaso n'eva-saññā-nāsaññāyatanaɱ samatikkamma 'anantaɱ viññāṇan' ti n'eva-saññā-nāsaññāyatanaɱ upasampajja viharatī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso ākiñcaññāyatanaɱ samatikkamma n'eva-saññā-nāsaññāyatanaɱ upasampajja viharāmi.|| ||

Kassapo pi bhikkhave, yāvade ākaŋkhati sabbaso n'eva-saññā-nāsaññāyatanaɱ samatikkamma 'anantaɱ viññāṇan' ti n'eva-saññā-nāsaññāyatanaɱ upasampajja viharatī' ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso n'eva-saññā-nāsaññāyatanaɱ samatikkamma saññāvedayitanirodhaɱ upasampajja viharāmi.|| ||

Ānando pi bhikkhave, yāvade ākaŋkhati sabbaso n'eva-saññā-nāsaññāyatanaɱ samatikkamma 'anantaɱ viññāṇan' ti saññāvedayita nirodhaɱ upasampajja viharatī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi sabbaso n'eva-saññā-nāsaññāyatanaɱ samatikkamma saññāvedayitanirodhaɱ upasampajja viharāmi.|| ||

Kassapo pi bhikkhave, yāvade ākaŋkhati sabbaso n'eva-saññā-nāsaññāyatanaɱ samatikkamma 'anantaɱ viññāṇan' ti saññāvedayita nirodhaɱ upasampajja viharatī' ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi aneka-vihitaɱ iddhividhaɱ paccanubhomi: eko pi hutvā bahudhā homi.|| ||

Bahudhā pi hutvā eko homi.|| ||

Āvībhāvaɱ tirobhāvaɱ tirokuḍḍaɱ tiropākāraɱ tiropabbaɱ asajjamāno gacchāmi.|| ||

Seyyathā pi ākāse.|| ||

Paṭhaviyā pi ummujjanimujjaɱ karomi seyyathā pi udake.|| ||

Udake pi abhejjamāne gacchāmi seyyathā pi paṭhaviyaɱ.|| ||

Ākāse pi pallaŋkena caŋkamāmi seyyathā pi pakkhi sakuṇo.|| ||

Imepi candimasuriye evammahiddhike evammahānubhāve pāṇinā parāmasāmi parimajjāmi.|| ||

Yāva brahmalokā pi kāyena vasaŋ vattemi.|| ||

Ānando pi bhikkhave, yāvade ākaŋkhati aneka-vihitaɱ iddhividhaɱ paccanubhoti.|| ||

Eko pi hutvā bahudhā hoti.|| ||

Bahudhā pi hutvā eko hoti.|| ||

Āvībhāvaɱ tirobhāvaɱ tirokuḍḍaɱ tiropakāraɱ tiropabbaɱ asajjamāno gacchati seyyathā pi ākāse.|| ||

Paṭhaviyā pi ummujjanimujjaɱ karoti seyyathā pi udake.|| ||

Udake pi abhejjamāne gacchati seyyathā pi paṭhaviyaɱ.|| ||

Ākāse pi pallaŋkhena caŋkamati seyyathā pi pakkhi sakuṇo.|| ||

Imepi candimasuriye evammahiddhike evammahānubhāve pāṇinā parāmasati parimajjati.|| ||

Yāva brahmalokā pi kāyena vasaŋ vattetī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi aneka-vihitaɱ iddhividhaɱ paccanubhomi:|| ||

Eko pi hutvā bahudhā homi.|| ||

Bahudhā pi hutvā eko homi.|| ||

Āvībhāvaɱ tirobhāvaɱ tirokuḍḍaɱ tiropākāraɱ tiropabbaɱ asajjamāno gacchāmi seyyathā pi ākāse.|| ||

Paṭhaviyā pi ummujjanimujjaɱ karomi seyyathā pi udake.|| ||

Udake pi abhejjamāne gacchāmi seyyathā pi paṭhaviyaɱ.|| ||

Ākāse pi pallaŋkena caŋkamāmi1 seyyathā pi pakkhi sakuṇo.|| ||

Imepi candimasuriye evammahiddhike evammahānubhāve pāṇinā parāmasāmi parimajjāmi.|| ||

Yāva brahmalokā pi kāyena vasaŋ vattemi.|| ||

Kassapo pi bhikkhave, yāvade ākaŋkhati aneka-vihitaɱ iddhividhaɱ paccanubhoti.|| ||

Eko pi hutvā bahudhā hoti.|| ||

Bahudhā pi hutvā eko hoti.|| ||

Āvībhāvaɱ tirobhāvaɱ tirokuḍḍaɱ tiropakāraɱ tiropabbaɱ asajjamāno gacchati seyyathā pi ākāse.|| ||

Paṭhaviyā pi ummujjanimujjaɱ karoti seyyathā pi udake.|| ||

Udake pi abhejjamāne gacchati seyyathā pi paṭhaviyaɱ.|| ||

Ākāse pi pallaŋkhena caŋkamati seyyathā pi pakkhi sakuṇo.|| ||

Imepi candimasuriye evammahiddhike evammahānubhāve pāṇinā parāmasati parimajjati.|| ||

Yāva brahmalokā pi kāyena vasaŋ vattetī' ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi dibbāya sotadhātuyā visuddhāya atikkantamānusikāya ubho sadde suṇāmi, dibbe ca mānuse ca ye dūre santike ca.|| ||

Ānando pi bhikkhave, yāvade ākaŋkhati dibbāya sotadhātuyā ubho sadde suṇāti, dibbe ca mānuse ca ye dūre santike ca?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi dibbāya sotadhātuyā visuddhāya atikkantamānusikāya ubho sadde suṇāmi, dibbe ca mānuse ca ye dūre santike ca.|| ||

Kassapo pi bhikkhave, yāvade ākaŋkhati dibbāya sotadhātuyā ubho sadde suṇāti, dibbe ca mānuse ca ye dūre santike ca?|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi, parasattānaɱ parapuggalānaɱ cetasā ceto paricca pajānāmi:|| ||

Sarāgaɱ vā cittaɱ sarāgaɱ cittanti pajānāmi;||
vītarāgaɱ vā cittaɱ vītarāgaɱ cittanti pajānāmi;||
sadosaŋ vā cittaɱ sadosaŋ cittanti pajānāmi;||
vītadosaŋ vā cittaɱ vītadosaŋ cittanti pajānāmi;||
samohaɱ vā cittaɱ samohaɱ cittanti pajānāmi;||
vītamohaɱ vā cittaɱ vītamohaɱ cittanti pajānāmi;||
saŋkhittaɱ vā cittaɱ saŋkhittaɱ cittanti pajānāmi;||
vikkhittaɱ vā cittaɱ vikkhittaɱ cittanti pajānāmi;||
mahaggataɱ vā cittaɱ mahaggataɱ cittanti pajānāmi;||
amahaggataɱ vā cittaɱ amahaggataɱ cittanti pajānāmi;||
sauttaraɱ vā cittaɱ sauttaraɱ cittanti pajānāmi;||
anuttaraɱ vā cittaɱ anuttaraɱ cittanti pajānāmi;||
samāhitaɱ vā cittaɱ samāhitaɱ cittanti pajānāmi;||
asamāhitaɱ vā cittaɱ asamāhitaɱ cittanti pajānāmi;||
vimuttaɱ vā cittaɱ vimutta cittanti pajānāmi;||
avimuttaɱ vā cittaɱ avimuttaɱ cittanti pajānāmi.|| ||

Ānando pi bhikkhave, yāvade ākaŋkhati parasattānaɱ parapuggalānaɱ cetasā ceto paricca pajānāti.|| ||

Sarāgaɱ vā cittaɱ sarāgaɱ cittanti pajānāti;||
vītarāgaɱ vā cittaɱ vītarāgaɱ cittanti pajānāti;||
sadosaŋ vā cittaɱ sadosaŋ cittanti pajānāti;||
vītadosaŋ vā cittaɱ vītadosaŋ cittanti pajānāti;||
samohaɱ vā cittaɱ samohaɱ cittanti pajānāti;||
vītamohaɱ vā cittaɱ vītamohaɱ cittanti pajānāti;||
saŋkhittaɱ vā cittaɱ saŋkhittaɱ cittanti pajānāti;||
vikkhittaɱ vā cittaɱ vikkhittaɱ cittanti pajānāti;||
mahaggataɱ vā cittaɱ mahaggataɱ cittanti pajānāti;||
amahaggataɱ vā cittaɱ amahaggataɱ cittanti pajānāti;||
sauttaraɱ vā cittaɱ sauttaraɱ cittanti pajānāti;||
anuttaraɱ vā cittaɱ anuttaraɱ cittanti pajānāti;||
samāhitaɱ vā cittaɱ samāhitaɱ cittanti pajānāti;||
asamāhitaɱ vā cittaɱ asamāhitaɱ cittanti pajānāti;||
vimuttaɱ vā cittaɱ vimuttaɱ cittanti pajānāti;||
avimuttaɱ vā cittaɱ avimuttaɱ cittanti pajānātī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi, parasattānaɱ parapuggalānaɱ cetasā ceto paricca pajānāmi:|| ||

Sarāgaɱ vā cittaɱ sarāgaɱ cittanti pajānāmi;||
vītarāgaɱ vā cittaɱ vītarāgaɱ cittanti pajānāmi;||
sadosaŋ vā cittaɱ sadosaŋ cittanti pajānāmi;||
vītadosaŋ vā cittaɱ vītadosaŋ cittanti pajānāmi;||
samohaɱ vā cittaɱ samohaɱ cittanti pajānāmi;||
vītamohaɱ vā cittaɱ vītamohaɱ cittanti pajānāmi;||
saŋkhittaɱ vā cittaɱ saŋkhittaɱ cittanti pajānāmi;||
vikkhittaɱ vā cittaɱ vikkhittaɱ cittanti pajānāmi;||
mahaggataɱ vā cittaɱ mahaggataɱ cittanti pajānāmi;||
amahaggataɱ vā cittaɱ amahaggataɱ cittanti pajānāmi;||
sauttaraɱ vā cittaɱ sauttaraɱ cittanti pajānāmi;||
anuttaraɱ vā cittaɱ anuttaraɱ cittanti pajānāmi;||
samāhitaɱ vā cittaɱ samāhitaɱ cittanti pajānāmi;||
asamāhitaɱ vā cittaɱ asamāhitaɱ cittanti pajānāmi;||
vimuttaɱ vā cittaɱ vimutta cittanti pajānāmi;||
avimuttaɱ vā cittaɱ avimuttaɱ cittanti pajānāmi.|| ||

Kassapo pi bhikkhave, yāvade ākaŋkhati parasattānaɱ parapuggalānaɱ cetasā ceto paricca pajānāti.|| ||

Sarāgaɱ vā cittaɱ sarāgaɱ cittanti pajānāti;||
vītarāgaɱ vā cittaɱ vītarāgaɱ cittanti pajānāti;||
sadosaŋ vā cittaɱ sadosaŋ cittanti pajānāti;||
vītadosaŋ vā cittaɱ vītadosaŋ cittanti pajānāti;||
samohaɱ vā cittaɱ samohaɱ cittanti pajānāti;||
vītamohaɱ vā cittaɱ vītamohaɱ cittanti pajānāti;||
saŋkhittaɱ vā cittaɱ saŋkhittaɱ cittanti pajānāti;||
vikkhittaɱ vā cittaɱ vikkhittaɱ cittanti pajānāti;||
mahaggataɱ vā cittaɱ mahaggataɱ cittanti pajānāti;||
amahaggataɱ vā cittaɱ amahaggataɱ cittanti pajānāti;||
sauttaraɱ vā cittaɱ sauttaraɱ cittanti pajānāti;||
anuttaraɱ vā cittaɱ anuttaraɱ cittanti pajānāti;||
samāhitaɱ vā cittaɱ samāhitaɱ cittanti pajānāti;||
asamāhitaɱ vā cittaɱ asamāhitaɱ cittanti pajānāti;||
vimuttaɱ vā cittaɱ vimuttaɱ cittanti pajānāti;||
avimuttaɱ vā cittaɱ avimuttaɱ cittanti pajānātī' ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi aneka-vihitaɱ pubbe nivāsaɱ anussarāmi - seyyathīdaɱ.|| ||

"Ekam pi jātiɱ dve pi jātiyo tisso pi jātiyo catasso pi jātiyo pañca pi'jātiyo dasa pi jātiyo vīsampi jātiyo tiɱsam pi jātiyo cattāḷīsampi jātiyo paññāsam pi jātiyo jāti-satam pi jāti-sahassam pi jāti-sata-sahassam pi, aneke pi saŋvaṭṭakappe aneke pi vivaṭṭakappe aneke pi saŋvaṭṭa-vivaṭṭakappe "amutrāsiɱ evaɱ nāmo evaɱ gotto evaɱ vaṇṇo evam-āhāro evaɱ sukhadukkhapaṭisaŋvedī evam-āyu-pariyanto so tato cuto amutra udapādiɱ.|| ||

Tatrāpāsiɱ evaɱ-nāmo evaɱ-gotto evaɱ-vaṇṇo evam-āhāro evaɱ sukhadukkhapaṭisaŋvedī evam-āyu-pariyanto. So tato cuto idhūpapanno" ti.|| ||

Iti sākāraɱ sa-uddesaɱ aneka-vihitaɱ pubbe nivāsaɱ anussarāmi.|| ||

Ānando pi bhikkhave, yāvade ākaŋkhati aneka-vihitaɱ pubbe nivāsaɱ anussarati.|| ||

Seyyathīdaɱ:|| ||

"Ekam pi jātiɱ dve pi jātiyo tisso pi jātiyo catasso pi jātiyo pañca pi jātiyo dasa pi jātiyo vīsampi jātiyo tiɱsam pi jātiyo cattāḷīsampi jātiyo paññāsam pi jātiyo jāti-satam pi jāti-sahassam pi jāti-sata-sahassam pi, aneke pi saŋvaṭṭakappe aneke pi vivaṭṭakappe aneke pi saŋvaṭṭa-vivaṭṭakappe "amutrāsiɱ evaɱ nāmo evaɱ gotto evaɱ vaṇṇo evam-āhāro evaɱ sukhadukkhapaṭisaŋvedī evam-āyu-pariyanto. So tato cuto amutra udapādiɱ.|| ||

Tatrāpāsiɱ evaɱ-nāmo evaɱ-gotto evaɱ-vaṇṇo evam-āhāro evaɱ sukhadukkhapaṭisaŋvedī evam-āyu-pariyanto.|| ||

So tato cuto idhūpapanno" ti.|| ||

Iti sākāraɱ sa-uddesaɱ aneka-vihitaɱ pubbe nivāsaɱ anussaratī' ti?|| ||

"No h'etaɱ bhante."|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi aneka-vihitaɱ pubbe nivāsaɱ anussarāmi - seyyathīdaɱ.|| ||

"Ekam pi jātiɱ dve pi jātiyo tisso pi jātiyo catasso pi jātiyo pañca pi'jātiyo dasa pi jātiyo vīsampi jātiyo tiɱsam pi jātiyo cattāḷīsampi jātiyo paññāsam pi jātiyo jāti-satam pi jāti-sahassam pi jāti-sata-sahassam pi, aneke pi saŋvaṭṭakappe aneke pi vivaṭṭakappe aneke pi saŋvaṭṭa-vivaṭṭakappe "amutrāsiɱ evaɱ nāmo evaɱ gotto evaɱ vaṇṇo evam-āhāro evaɱ sukhadukkhapaṭisaŋvedī evam-āyu-pariyanto so tato cuto amutra udapādiɱ.|| ||

Tatrāpāsiɱ evaɱ-nāmo evaɱgotto evaɱ-vaṇṇo evam-āhāro evaɱ sukhadukkhapaṭisaŋvedī evam-āyu-pariyanto. So tato cuto idhūpapanno" ti.|| ||

Iti sākāraɱ sa-uddesaɱ aneka-vihitaɱ pubbe nivāsaɱ anussarāmi.|| ||

Kassapo pi bhikkhave, yāvade ākaŋkhati aneka-vihitaɱ pubbe nivāsaɱ anussarati.|| ||

Seyyathīdaɱ:|| ||

"Ekam pi jātiɱ dve pi jātiyo tisso pi jātiyo catasso pi jātiyo pañca pi jātiyo dasa pi jātiyo vīsampi jātiyo tiɱsam pi jātiyo cattāḷīsampi jātiyo paññāsam pi jātiyo jāti-satam pi jāti-sahassam pi jāti-sata-sahassam pi, aneke pi saŋvaṭṭakappe aneke pi vivaṭṭakappe aneke pi saŋvaṭṭa-vivaṭṭakappe "amutrāsiɱ evaɱ nāmo evaɱ gotto evaɱ vaṇṇo evam-āhāro evaɱ sukhadukkhapaṭisaŋvedī evam-āyu-pariyanto. So tato cuto amutra udapādiɱ.|| ||

Tatrāpāsiɱ evaɱ-nāmo evaɱgotto. Evaɱvaṇṇo evam-āhāro evaɱ sukhadukkhapaṭisaŋvedī evam-āyu-pariyanto. So tato cuto idhūpapanno" ti.|| ||

Iti sākāraɱ sa-uddesaɱ aneka-vihitaɱ pubbe nivāsaɱ anussaratī' ti.|| ||

Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi dibbena cakkhunā visuddhena atikkantamānusakena satte passāmi: cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi.|| ||

'Ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā.|| ||

Te kāyassa bhedā param māraṇā apāyaɱ duggatiɱ vinipātaɱ nirayaɱ upapannā.|| ||

Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā.|| ||

Te kāyassabhedā param māraṇā sugatiɱ saggaɱ lokaɱ upapannā'ti iti dibbena cakkhunā visuddhena atikkantamānusakena satte passāmi: cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi.|| ||

Ānando pi bhikkhave, yāvade ākaŋkhati dibbena cakkhunā visuddhena atikkantamānusakena satte passati.|| ||

Cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti.|| ||

'Ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā.|| ||

Te kāyassa bhedā param māraṇā apāyaɱ duggatiɱ vinipātaɱ nirayaɱ upapannā.|| ||

Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā.|| ||

Te kāyassabhedā param māraṇā sugatiɱ saggaɱ lokaɱ upapannā'ti iti dibbena cakkhunā visuddhena atikkantamānusakena satte passati: cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānātī' ti?|| ||

"No h'etaɱ bhante"|| ||

Ahaɱ kho āvuso, Bhagavato sammukhā bhikkhusaŋghe upanīto:|| ||

"Ahaɱ bhikkhave, yāvade ākaŋkhāmi dibbena cakkhunā visuddhena atikkantamānusakena satte passāmi: cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi.|| ||

'Ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā.|| ||

Te kāyassa bhedā param māraṇā apāyaɱ duggatiɱ vinipātaɱ nirayaɱ upapannā.|| ||

Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā.|| ||

Te kāyassabhedā param māraṇā sugatiɱ saggaɱ lokaɱ upapannā' ti iti dibbena cakkhunā visuddhena atikkantamānusakena satte passāmi: cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi.|| ||

Kassapo pi bhikkhave, yāvade ākaŋkhati dibbena cakkhunā visuddhena atikkantamānusakena satte passati.|| ||

Cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti.|| ||

'Ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā.|| ||

Te kāyassa bhedā param māraṇā apāyaɱ duggatiɱ vinipātaɱ nirayaɱ upapannā.|| ||

Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā.|| ||

Te kāyassabhedā param māraṇā sugatiɱ saggaɱ lokaɱ upapannā' ti iti dibbena cakkhunā visuddhena atikkantamānusakena satte passati: cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānātī' ti.|| ||

[217] Taɱ kiɱ maññasi āvuso Ānanda, api nu tvaɱ Bhagavato sammukhā bhikkhusaŋghe upanīto:|| ||

"Ahaɱ bhikkhave, āsavānaɱ khayā anāsavaɱ cetovimuttiɱ paññāvimuttiɱ diṭṭhe va dhamme sayaɱ abhiññā sacchi-katvā upasampajja viharāmi.|| ||

Ānando pi bhikkhave, āsavānaɱ khayā anāsavaɱ ceto vimuttiɱ paññāvimuttiɱ diṭṭhe va dhamme sayaɱ abhiññā sacchi-katvā upasampajja viharatī" ti?|| ||

'No h'etaɱ bhante.'|| ||

Ahaɱ kho āvuso Bhagavato sammukhā bhikkhusaŋghe upanīto:|| ||

"Ahaɱ bhikkhave, āsavānaɱ khayā anāsavaɱ cetovimuttiɱ paññāvimuttiɱ diṭṭhe va dhamme sayaɱ abhiññā sacchi-katvā viharāmi.|| ||

Kassapo pi bhikkhave āsavānaɱ khayā anāsavaɱ cetovimuttiɱ paññāvimuttiɱ diṭṭhe va dhamme sayaɱ abhiññā sacchi-katvā upasampajja viharatī" ti.|| ||

Sattaratanaɱ vā so āvuso nāgaɱ aḍḍhaṭṭharatanaɱ vā tālapattikāya chādetabbaɱ maññeyya, yo me cha abhiññā chādetabbaɱ maññeyyā' ti.|| ||

Cavittha ca pana thullatissā bhikkhunī brahmacariyambhā' ti.|| ||


Contact:
E-mail
Copyright Statement   Webmaster's Page