Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya,
Nidāna-vaggo
16. Kassapa Saŋyutta

Sutta 11

Cīvara Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[216]

[1][pts][bodh] Evaɱ me sutaɱ:|| ||

Ekaɱ samayaɱ āyasmā Mahā Kassapo Rājagahe viharati Veḷuvane Kalandakanivāpe.|| ||

Tena kho pana samayena āyasmā Ānando Dakkhiṇāgirismiɱ cārikaɱ carati mahatā bhikkhu-saŋghena saddhiɱ.|| ||

Tena kho pana samayena āyasmato Ānandassa tiɱsamattā saddhivihārino bhikkhū sikkhaɱ paccakkhāya hīnāyavattā bhavanti yebhuyyena kumārabhūtā.|| ||

[218] Atha kho āyasmā Ānando Dakkhiṇāgirismiɱ yathābhirantaɱ cārikaɱ caritvā yena Rājagahaɱ Veḷuvanaɱ kalandakanivāpo,||
yenāyasmā Mahā Kassapo ten'upasaŋkakami.|| ||

Upasaŋkamitvā āyasmantaɱ Mahā Kassapaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Ānandaɱ āyasmā Mahā Kassapo etad avoca:|| ||

"Kati nu kho āvuso Ānanda atthavase paṭicca Bhagavatā kulesu tikabhojanaɱ paññattanti?"|| ||

"Tayo kho bhante Kassapa, atthavase paṭicca Bhagavatā kulesu tikabhojanaɱ paññattaɱ:||
dummaŋkūnaɱ puggalānaɱ niggahāya,||
pesalānaɱ bhikkhūnaɱ phāsuvihāraya,||
mā pāpicchā pakkhaɱ nissāya saŋghaɱ bhindeyyuɱ,||
kulānuddayatāya ca.|| ||

Ime kho bhante Kassapa,||
tayo atthavase paṭicca Bhagavatā kulesu tikabhojanaɱ paññattanti.|| ||

Atha kiñcarahi tvaɱ āvuso Ānanda,||
imehi navehi bhikkhūhi indriyesu aguttadvārehi||
bhojane amattaññūhi jāgariyaɱ ananuyuttehi||
saddhiɱ cārikaɱ carasi?|| ||

Sassaghātaɱ maññe carasi.|| ||

Kulūpaghātaɱ maññe carasi.|| ||

Olujjati kho te āvuso Ānanda, parisā.|| ||

Palujjanti kho te āvuso navappāyā||
na cāyaɱ kumārako mattam aññāsī" ti.|| ||

"Api me bhante, Kassapa, sirasmiɱ palitāni jātāni.|| ||

Atha ca pana mayaɱ ajjāpi āyasmato Mahā Kassapassa kumārakavādā na muccāmā" ti.|| ||

[219] Tathā hi pana tvaɱ āvuso Ānanda,||
imehi navehi bhikkhūhi indriyesu aguttadvārehi||
bhojane amattaññūhi jāgariyaɱ ananuyuttehi||
saddhiɱ cārikaɱ carasi?|| ||

Sassaghātaɱ maññe carasi.|| ||

Kulūpaghātaɱ maññe carasi.|| ||

Olujjati kho te āvuso Ānanda, parisā.|| ||

Palujjanti kho te āvuso navappāyā na cāyaɱ kumārako mattam aññāsī' ti.|| ||

Assosi kho Thullanandā bhikkhunī:|| ||

'Ayyena kira Mahā Kassapena ayyo Ānando vedehamuni kumārakavādena apasādito" ti.|| ||

Atha kho Thullanandā bhikkhunī anattamanā anattamanavācaɱ nicchāresi.|| ||

"Kiɱ pana ayyo Mahā Kassapo aññatitthiyapubbo samāno ayyaɱ Ānandaɱ vedehamuniɱ kumārakavādena apasādetabbaɱ maññatī" ti.|| ||

Assosi kho āyasmā Mahā Kassapo Thullanandāya bhikkhuniyā imaɱ vācaɱ bhāsamānāya.|| ||

Atha kho āyasmā Mahā Kassapo āyasmantaɱ Ānandaɱ etad avoca:|| ||

"Tagghāvuso Ānanda, Thullanandāya bhikkhuniyā sahasā appaṭisaŋkhā vācā bhāsitā.|| ||

Yato haɱ āvuso kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajito,||
nābhijānāmi aññaɱ satthāraɱ uddisituɱ aññatra tena Bhagavatā arahatā sammā-sambuddhena.|| ||

Pubbe me āvuso agāriyabhūtassa sato etad ahosi:|| ||

'Sambādho gharāvāso rajāpatho,||
abbhokāso pabbajjā.|| ||

Nayidaɱ sukaraɱ agāraɱ ajjhāvasatā ekantaparipuṇṇaɱ ekantaparisuddhaɱ saŋkhalikhitaɱ brahmacariyaɱ carituɱ.|| ||

Yam nūnāhaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyan" ti.|| ||

So khvāhaɱ āvuso aparena samayena paṭapiloti- [220] kānaɱ saŋghāṭiɱ karitvā||
ye loke arahanto te udissa kesamassuɱ ohāretvā kāsāyāni vatthīni acchādetvā āgarasmā anagāriyaɱ pabbajiɱ.|| ||

So evaɱ pabbajito samāno addhānamaggapaṭipanno addasaŋ Bhagavantaɱ antarā ca Rājagahaɱ antarā ca Nālandaɱ Bahuputte cetiye nisinnaɱ.|| ||

Disvāna me etad ahosi:|| ||

'Satthārañ ca vatāhaɱ passeyyaɱ Bhagavantam eva passeyyaɱ.|| ||

Sugatañ ca vatāhaɱ passeyyaɱ Bhagavantam eva passeyyaɱ.|| ||

Sammāsambuddhañ ca vatāhaɱ passeyyaɱ Bhagavantam eva passeyyan' ti.|| ||

So khvāhaɱ āvuso tattheva Bhagavato pādesu sirasā nipattvā Bhagavantaɱ etad avocaɱ:|| ||

'Sattā me bhante Bhagavā.|| ||

Sāvako ham asmi.|| ||

Sattā me bhante Bhagavā.|| ||

Sāvako ham asmi' ti.|| ||

Evaɱ vutte maɱ āvuso,||
Bhagavā etad avoca:|| ||

'Yo kho Kassapa, evaɱ sabbaɱ cetasā samannāgataɱ sāvakaɱ ajānaɱ yeva vadeyya||
"Jānāmī" ti,||
apassaɱ yeva vadeyya||
"Passāmī" ti,||
muddhā pi tassa vipateyya.|| ||

Ahaɱ kho pana Kassapa,||
jānaɱ yeva vadāmi||
"Jānāmī" ti,||
passaɱ yeva vadāmi||
"Passāmī" ti.|| ||

Tasmāt iha te Kassapa,||
evaɱ sikkhitabbaɱ:|| ||

"Tibbaɱ me hirottappaɱ paccupaṭṭhitaɱ bhavissati theresu navesu majjhamesū" ti.|| ||

Evaɱ hi te Kassapa, sikkhitabbaɱ.|| ||

Tasmāt iha te Kassapa, evaɱ sikkhitabbaɱ:|| ||

"Yaɱ kiñci dhammaɱ suṇissāmi kusalūpasaŋhitaɱ,||
sabbaɱ taɱ aṭṭhikatvā manasikatvā sabbaɱ cetasā samannāharitvā ohitasoto dhammaɱ suṇissāmī" ti.|| ||

Evaɱ hi te Kassapa, sikkhitabbaɱ.|| ||

Tasmāt iha te Kassapa, evaɱ sikkhitabbaɱ:|| ||

"Sātasahagatā ca me kāyagatā sati na vijahissatī" ti.|| ||

Evaɱ hi te Kassapa, sikkhitabban' ti.|| ||

Atha kho maɱ āvuso,||
Bhagavā iminā ovādena ovāditvā uṭṭhāy āsanā pakkāmi.|| ||

[221] Sattāham eva khvāhaɱ āvuso sāṇo raṭṭhapiṇḍaɱ bhuñjiɱ.|| ||

Atha aṭṭhamiyā aññā udapādi.|| ||

Atha kho āvuso, Bhagavā maggā okkamma yena aññataraɱ rukkhamūlaɱ ten'upasaŋkami.|| ||

Atha khvāhaɱ āvuso, paṭapilotīnaɱ saŋghāṭiɱ catugguṇaɱ paññāpetvā Bhagavantaɱ etad avocaɱ:|| ||

'Idha bhante, Bhagavā nisīdatu,||
yaɱ mam'assa dīgha-rattaɱ hitāya sukhāyā' ti.|| ||

'Nisīdi kho āvuso Bhagavā paññatte āsane.'|| ||

Nisajja kho maɱ āvuso Bhagavā etad avoca:|| ||

'Mudukā kho tyāyaɱ Kassapa,||
paṭapilotīnaɱ saŋghāṭī' ti.|| ||

'Patigaṇhātu me bhante,||
Bhagavā paṭapilotīnaɱ saŋghāṭi, anukampaɱ upādāyā' ti.|| ||

'Dhāressasi pana me tvaɱ Kassapa,||
sāṇāni paɱsukulāni nibbasanānī' ti?|| ||

'Dhāressāmahaɱ bhante,||
Bhagavato sāṇāni paɱsukulāni nibbasanānī' ti.|| ||

So khvāhaɱ āvuso, paṭapilotīnaɱ saŋghāṭiɱ Bhagavato pādāsiɱ||
ahaɱ pana Bhagavato sāṇāni paɱsukulāni nibbasanānā paṭipajjiɱ.|| ||

Yaɱ hi taɱ āvuso, sammā vadamāno vadeyya:|| ||

'Bhagavato putto oraso mukhato jāto dhammajo dhammanimmito dhammadāyādo paṭiggahetā||
sāṇāni paɱsukulāni nibbasanānī' ti.|| ||

Mamaɱ taɱ sammā vadamāno vadeyya:|| ||

"Bhagavato putto oraso mukhato jāto dhammajo dhammanimmito dhammadāyādo paṭiggahetā||
sāṇāni paɱsukūlāni nibbasanānī" ti.|| ||

Ahaɱ kho āvuso, yāvade ākaŋkhāmi vivicc'eva kāmehi vivicca akusalehi dhammehi savitakkaɱ savicāraɱ [222] vivekajaɱ pīti-sukhaɱ paṭhamajjhānaɱ upasampajja vihārāmi.|| ||

Ahaɱ kho āvuso, yāvade ākaŋkhāmi vitakka-vicārānaɱ vūpasamā ajjhattaɱ sampasādanaɱ cetaso ekodibhāvaɱ avitakkaɱ avicāraɱ samādhijaɱ pīti-sukhaɱ dutiyajjhānaɱ upasampajja viharāmi.|| ||

Ahaɱ kho āvuso, yāvade ākaŋkhāmi pītiyā ca virāgā upekkhako ca viharāmi,||
sato ca sampajāno.|| ||

Sukhaɱ ca kāyena paṭisaŋvedemi.|| ||

Yaɱ taɱ ariyā ācikkhanti|| ||

'Upekkhako satimā sukhavihārī' ti,|| ||

tatiyajjhānaɱ upasampajja viharāmi.|| ||

Ahaɱ kho āvuso, yāvade ākaŋkhāmi sukhassa ca pahāṇā dukkhassa ca pahāṇā pubb'eva somanassa domanassānaɱ attha-gamā adukkha-m-asukhaɱ upekkhā-sati-pārisuddhiɱ catutthajjhānaɱ upasampajja viharāmi.|| ||

Ahaɱ kho āvuso, yāvade ākaŋkhāmi sabbaso rūpa-saññānaɱ samatikkamā paṭigha-saññānaɱ attha-gamā nānattasaññānaɱ amanasi-kārā|| ||

'ananto ākāso' ti|| ||

ākāsānañcāyatanaɱ upasampajja viharāmi.|| ||

Ahaɱ kho āvuso, yāvade ākaŋkhāmi sabbaso ākāsānañcāyatanaɱ samatikkamma|| ||

'anantaɱ viññāṇan' ti|| ||

viññāṇañcāyatanaɱ upasampajja viharāmi. [212]|| ||

Ahaɱ kho āvuso, yāvade ākaŋkhāmi sabbaso viññāṇañcāyatanaɱ samatikkamma|| ||

'n'atthi kiñcī' ti|| ||

ākiñcaññāyatanaɱ upasampajja viharāmi.|| ||

Ahaɱ kho āvuso, yāvade ākaŋkhāmi sabbaso ākiñcaññāyatanaɱ samatikkamma n'eva-saññā-nāsaññāyatanaɱ upasampajja viharāmi.|| ||

Ahaɱ kho āvuso, yāvade ākaŋkhāmi sabbaso n'eva-saññā-nāsaññāyatanaɱ samatikkamma saññāvedayitanirodhaɱ upasampajja viharāmi.|| ||

Ahaɱ kho āvuso, yāvade ākaŋkhāmi aneka-vihitaɱ iddhividhaɱ paccanubhomi:||
eko pi hutvā bahudhā homi.|| ||

Bahudhā pi hutvā eko homi.|| ||

Āvībhāvaɱ tirobhāvaɱ tirokuḍḍaɱ tiropākāraɱ tiropabbaɱ asajjamāno gacchāmi.||
seyyathā pi ākāse.|| ||

Paṭhaviyā pi ummujjanimujjaɱ karomi seyyathā pi udake.|| ||

Udake pi abhejjamāne gacchāmi seyyathā pi paṭhaviyaɱ.|| ||

Ākāse pi pallaŋkena caŋkamāmi seyyathā pi pakkhi sakuṇo.|| ||

Imepi candimasuriye evammahiddhike evammahānubhāve pāṇinā parāmasāmi parimajjāmi.|| ||

Yāva brahmalokā pi kāyena vasaŋ vattemi.|| ||

Ahaɱ kho āvuso, yāvade ākaŋkhāmi dibbāya sotadhātuyā visuddhāya atikkantamānusikāya ubho sadde suṇāmi,||
dibbe ca mānuse ca ye dūre santike ca.|| ||

Ahaɱ kho āvuso, yāvade ākaŋkhāmi,||
parasattānaɱ parapuggalānaɱ cetasā ceto paricca pajānāmi:|| ||

Sarāgaɱ vā cittaɱ sarāgaɱ cittanti pajānāmi;||
vītarāgaɱ vā cittaɱ vītarāgaɱ cittanti pajānāmi;||
sadosaŋ vā cittaɱ sadosaŋ cittanti pajānāmi;||
vītadosaŋ vā cittaɱ vītadosaŋ cittanti pajānāmi;||
samohaɱ vā cittaɱ samohaɱ cittanti pajānāmi;||
vītamohaɱ vā cittaɱ vītamohaɱ cittanti pajānāmi;||
saŋkhittaɱ vā cittaɱ saŋkhittaɱ cittanti pajānāmi;||
vikkhittaɱ vā cittaɱ vikkhittaɱ cittanti pajānāmi;||
mahaggataɱ vā cittaɱ mahaggataɱ cittanti pajānāmi;||
amahaggataɱ vā cittaɱ amahaggataɱ cittanti pajānāmi;||
sauttaraɱ vā cittaɱ sauttaraɱ cittanti pajānāmi;||
anuttaraɱ vā cittaɱ anuttaraɱ cittanti pajānāmi;||
samāhitaɱ vā cittaɱ samāhitaɱ cittanti pajānāmi;||
asamāhitaɱ vā cittaɱ asamāhitaɱ cittanti pajānāmi;||
vimuttaɱ vā cittaɱ vimuttaɱ cittanti pajānāmi;||
avimuttaɱ vā cittaɱ avimuttaɱ cittanti pajānāmi.|| ||

Ahaɱ kho āvuso, yāvade ākaŋkhāmi aneka-vihitaɱ pubbe nivāsaɱ anussarāmi|| ||

Seyyathīdaɱ:|| ||

Ekam pi jātiɱ dve pi jātiyo tisso pi jātiyo catasso pi jātiyo pañca pi jātiyo dasa pi jātiyo vīsampi jātiyo tiɱsam pi jātiyo cattāḷīsampi jātiyo paññāsam pi jātiyo jāti-satam pi jāti-sahassam pi jāti-sata-sahassam pi,||
aneke pi saŋvaṭṭakappe aneke pi vivaṭṭakappe aneke pi saŋvaṭṭa-vivaṭṭakappe|| ||

'Amutrāsiɱ evaɱ nāmo evaɱ gotto evaɱ vaṇṇo evam-āhāro evaɱ sukhadukkhapaṭisaŋvedī evam-āyu-pariyanto so tato cuto amutra udapādiɱ.|| ||

Tatrāpāsiɱ evaɱ-nāmo evaɱgotto evaɱ-vaṇṇo evam-āhāro evaɱ sukhadukkhapaṭisaŋvedī evam-āyu-pariyanto.|| ||

So tato cuto idhūpapanno' ti.|| ||

Iti sākāraɱ sa-uddesaɱ aneka-vihitaɱ pubbe nivāsaɱ anussarāmi.|| ||

Tatrāpāsiɱ evaɱ-nāmo evaɱgotto.|| ||

Evaɱvaṇṇo evam-āhāro evaɱ sukhadukkhapaṭisaŋvedī evam-āyu-pariyanto.|| ||

So tato cuto idhūpapanno' ti.|| ||

Iti sākāraɱ sa-uddesaɱ aneka-vihitaɱ pubbe nivāsaɱ anussarati.|| ||

Ahaɱ kho āvuso, yāvade ākaŋkhāmi dibbena cakkhunā visuddhena atikkantamānusakena satte passāmi:|| ||

Cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi.|| ||

'Ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā.|| ||

Te kāyassa bhedā param māraṇā apāyaɱ duggatiɱ vinipātaɱ nirayaɱ upapannā.|| ||

Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā.|| ||

Te kāyassabhedā param māraṇā sugatiɱ saggaɱ lokaɱ upapannā' ti||
iti dibbena cakkhunā visuddhena atikkantamānusakena satte passāmi:|| ||

Cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi.|| ||

Ahaɱ kho āvuso, āsavānaɱ khayā anāsavaɱ cetovimuttiɱ paññāvimuttiɱ diṭṭhe va dhamme sayaɱ abhiññā sacchi-katvā upasampajja viharāmi.|| ||

Sattaratanaɱ vā so āvuso nāgaɱ aḍḍhaṭṭharatanaɱ vā tālapattikāya chādetabbaɱ maññeyya, yo me abhiññā chādetabbaɱ maññeyyā" ti.|| ||

Cavittha ca pana thullanandā bhikkhunī brahmacariyasmā ti.|| ||


Contact:
E-mail
Copyright Statement   Webmaster's Page