Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya,
Nidāna-vaggo
16. Kassapa Saŋyutta

Sutta 12

Tathāgata Param-Māraṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[222]

[1][pts][bodh] Evaɱ me sutaɱ:|| ||

Ekaɱ samayaɱ āyasmā ca Mahā Kassapo āyasmā ca Sāriputto Bārāṇasiyaɱ viharanti Isipatane Migadāye.|| ||

Atha kho āyasmā Sāriputto sāyanhasamayaɱ patisallānā vuṭṭhito yenāyasmā Mahā Kassapo ten'upasaŋkami.|| ||

Upasaŋkamitvā Mahā Kassapaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto āyasmantaɱ Mahā Kassapaɱ etad avoca:|| ||

"Kin nu kho āvuso Kassapa,||
hoti Tathāgato param māraṇā" ti?|| ||

"Avyākataɱ kho etaɱ āvuso,||
Bhagavatā 'hoti Tathāgato param māraṇā'" ti.|| ||

"Kiɱ pan'āvuso,||
na hoti Tathāgato param māraṇā" ti?|| ||

"Etam pi kho āvuso,||
avyākataɱ Bhagavatā||
'na hoti Tathāgato param māraṇā'" ti.|| ||

[223] "Kin nu kho āvuso,||
hoti ca na hoti ca Tathāgato param māraṇā" ti?|| ||

"Avyākataɱ kho etaɱ āvuso Bhagavatā,||
'hoti ca na hoti ca Tathāgato param māraṇā'" ti.|| ||

"Kiɱ pan'āvuso,||
n'eva hoti na na hoti Tathāgato param māraṇā" ti?|| ||

"Etam pi kho āvuso,||
avyākataɱ Bhagavatā||
'n'eva hoti na na hoti Tathāgato param māraṇā'" ti.|| ||

"Kasmā c'etaɱ āvuso,||
avyākataɱ Bhagavatā" ti?|| ||

"Na h'etaɱ āvuso,||
atthasaŋhitaɱ ādibrahmacariyakaɱ,||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati."|| ||

"Tasmā taɱ avyākataɱ Bhagavatā" ti.|| ||

"Atha kiñcarahāvuso,||
vyākataɱ Bhagavatā" ti?|| ||

"'Idaɱ dukkhan' ti kho āvuso,||
vyākataɱ Bhagavatā."|| ||

"'Ayaɱ dukkhasamudayo' ti||
vyākataɱ Bhagavatā."|| ||

"'Ayaɱ dukkhanirodho' ti||
vyākataɱ Bhagavatā."|| ||

"'Ayaɱ dukkhanirodhagāminī paṭipadā' ti||
vyākataɱ Bhagavatā" ti.|| ||

"Kasmā c'etaɱ āvuso vyākataɱ Bhagavatā" ti?|| ||

"Etaɱ hi āvuso,||
atthasaŋhitaɱ,||
etaɱ ādibrahmacariyakaɱ,||
etaɱ nibbidāya||
virāgāya||
nirodhāya||
upasamāya||
abhiññāya||
sambodhāya||
nibbānāya saŋvattati.|| ||

Tasmā taɱ Bhagavatā byākatan" ti.|| ||


Contact:
E-mail
Copyright Statement   Webmaster's Page