Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
2. Nidāna Vagga
XIX. Lakkhana-Saŋyuttam

Sutta 21

Sāmaṇeriyo Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts]EVAṂ ME SUTAṂ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

2. Tena kho pana samayena āyasmā ca Lakkhaṇo āyasmā ca Mahā-Moggallāno Gijjhakūṭe pabbate viharanti.|| ||

3. Atha kho āyasmā Mahā-Moggallāno pubbaṇhasamayaɱ nivāsetvā pattacīvaram ādāya yenāyasmā Lakkhaṇo ten'upasaŋkami.|| ||

4. Upasaŋkamitvā āyasmantaɱ Lakkhaṇaɱ etad avoca:|| ||

"Āyāmā vuso Lakkhaṇa,||
Rājagahaɱ piṇḍāya pavisissāmā" ti.|| ||

"Evam āvuso" ti kho āyasmā Lakkhaṇo āyasmato Mahā-Moggallānassa paccassosi.|| ||

5. Atha kho āyasmā Mahā-Moggallāno Gijjhakūṭā pabbatā orohanto aññatarasmiɱ padese sitaɱ pātvākāsi.|| ||

6. Atha kho āyasmā Lakkhaṇo āyasmantaɱ Mahā-Moggallānaɱ etad avoca:|| ||

"Ko nu kho āvuso Moggallāna,||
hetu ko paccayo sitassa pātukammāyā" ti?|| ||

"Akālo kho āvuso Lakkhaṇa,||
etassa pañhassa,||
Bhagavato maɱ santike etaɱ paṇhaɱ pucchā" ti.|| ||

7. Atha kho āyasmā ca Lakkhaṇo āyasmā ca Mahā-Moggallāno Rājagahe piṇḍāya caritvā pacchābhattaɱ piṇḍapātapaṭikkantā yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

8. Eka-m-antaɱ nisinno kho āyasmā Lakkhaṇo āyasmantaɱ Mahā Moggallānaɱ etad avoca:|| ||

"Idhāyasmā Mahā-Moggallāno Gijjhakūṭā pabbatā orohanto aññatarasmiɱ padese sitaɱ pātvākāsi.|| ||

Ko nu kho āvuso Moggallāna,||
hetu ko paccayo sitassa pātukammāyā" ti?|| ||

9. "Idhāhaɱ āvuso, Gijjhakūṭā pabbatā orohanto addasaɱ sāmaṇeriɱ vehāsaɱ gacchantiɱ.|| ||

Tassa saŋghāṭi pi ādittā sampajjalitā sajotibhūtā,||
patto pi āditto sampajjalito sajotibhūto,||
kāyabandhanam pi ādittaɱ sampajjalitaɱ sajotibhūtaɱ,||
kāyo pi āditto sampajjalito sajotibhūto.|| ||

Sā sudaɱ aṭṭassaraɱ karoti. || ||

10. Tassa mayhaɱ āvuso, etad ahosi:|| ||

Acchariyaɱ vata bho,||
abbhutaɱ vata bho,||
evarūpo pi nāma satto bhavissati,||
evarūpo pi nāma yakkho bhavissati,||
evarūpo pi nāma attabhāvapaṭilābho bhavissatī" ti.|| ||

11. Atha kho Bhagavā bhikkhū āmantesi:|| ||

"Cakkhubhūtā bhikkhave, sāvakā viharanti,||
ñāṇabhūtā vata bhikkhave, sāvakā viharanti,||
yatra hi nāma sāvako evarūpaɱ ñassati vā dakkhati vā sakkhiɱ vā karissati.|| ||

[262] 12. Pubbe pi me so bhikkhave, sāmaṇerī diṭṭho ahosi,||
api cāhaɱ na vyākāsiɱ.|| ||

Ahañcetaɱ vyākareyyaɱ, pare ca me na saddaheyyuɱ.|| ||

Ye me na saddaheyyuɱ,||
tesaŋ taɱ assa dīgha-rattaɱ ahitāya dukkhāya.|| ||

13. Eso bhikkhave, bhikkhunī Kassapassa sammāsambuddhassa pāvacane pāpasāmaṇerī ahosi||
sā tassa kammassa vipākena||
bahūni vassāni||
bahūni vassasatāni||
bahūni vassasahassāni||
bahūni vassasatasahassāni||
niraye paccitvā tass'eva kammassa vipākāvasesena evarūpaɱ attabhāvapaṭilābhaɱ paṭisaŋvedayatī" ti.|| ||


Contact:
E-mail
Copyright Statement   Webmaster's Page