Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya
Nidāna-vaggo

20. Opammasamyutta
Sutta 7

Āṇi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][ati] EVAṂ ME SUTAṂ:|| ||

Ekaɱ samayaɱ Bhagavā Sāvatthiyaɱ viharati.||
Jetavane Anāthapiṇḍikassa ārāme.|| ||

[2] Bhūtapubbaɱ bhikkhave, Dasārahānaɱ āṇako nāma Mudiŋgo ahosi.|| ||

[3] Tassa Dasārahā Āṇake ghaṭite aññaɱ āṇiɱ odahiɱsu,||
ahu kho so bhikkhave samayo yaɱ Āṇakassa mudiŋgassa porāṇaɱ pokkhara-phalakaɱ antaradhāyi,||
āṇisaŋghāṭo va avasissi.|| ||

[4] Evam eva kho bhikkhave,||
bhavissanti bhikkhū anāgatam addhānaɱ.|| ||

[5] Ye te suttantā Tathāgatabhāsitā gambhīrā gambhiratthā lokuttarā suññatapaṭisaɱyuttā,||
tesu bhaññamānesu na sussūsissanti,||
na sotaɱ odahissanti,||
na aññā-cittaɱ upaṭṭhāpessanti,||
na ca te dhamme uggahetabbaɱ pariyāpuṇitabbaɱ maññissanti.|| ||

[6] Ye pana te suttantā kavikatā kāveyyā cittakkharā citta-vyañjanā bāhirakā sāvaka-bhāsitā,||
tesu bhaññamānesu sussūsissanti,||
sotaɱ odahissanti,||
aññā-cittaɱ upaṭṭhāpessanti||
te dhamme uggahetabbaɱ pariyāpuṇitabbaɱ maññissanti.|| ||

Evam eva tesaɱ bhikkhave,||
suttantānaɱ Tathāgatabhāsitānaɱ gambhīrānaɱ gambhīratthānaɱ lokuttarānaɱ suññatapaṭisaññuttānaɱ antaradhānaɱ bhavissati.|| ||

[7] Tasmāt iha bhikkhave,||
evaɱ sikkhitabbaɱ:|| ||

"Ye te suttantā Tathāgatabhāsitā gambhīrā gambhīratthā lokuttarā suññatapaṭisaɱyuttā,||
tesu bhaññamānesu sussusissāma,||
sotaɱ odahissāma,||
aññā-cittaɱ upaṭṭhāpessāma||
te ca dhamme uggahetabbaɱ pariyāpuṇitabbaɱ maññissāmā' ti.|| ||

Evaɱ hi vo bhikkhave,||
sikkhitabbanti.


Contact:
E-mail
Copyright Statement   Webmaster's Page