Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya
Nidāna-vaggo

20. Opammasamyutta
Sutta 8

Kaliŋgaro Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][rhyc] EVAṂ ME SUTAṂ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||

[2] Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhu Bhagavato paccassosuɱ.|| ||

Bhagavā etad avoca:|| ||

[3] Kaliŋgarūpadhānā bhikkhave,||
etarahi Licchavī viharanti appamattā ātāpino upāsanasmiɱ.|| ||

Tesaŋ rājā Māgadho Ajātasattu Vedehi-putto na labhati otāraɱ,||
na labhati ārammaṇaɱ.|| ||

[4] Bhavissanti bhikkhave,||
anāgatam addhānaɱ Licchavī sukhumālā mudutaluṇahatthapādā||
te mudukā suseyyā sutūlabimbohanāsu yāva suriyuggamanā seyyaɱ kappessanti.|| ||

Tesaŋ rājā Māgadho Ajātasattu Vedehi-putto lacchati otāraɱ,||
lacchati ārammaṇaɱ.|| ||

[5] Kaliŋgarūpadhānā bhikkhave,||
etarahi bhikkhū viharanti appamattā ātāpino padhānasmiɱ.|| ||

Tesaŋ Māro pāpimā na labhati otāraɱ,||
na labhati ārammaṇaɱ.|| ||

[6] Bhavissanti bhikkhave,||
anāgatam addhānaɱ bhikkhū sukhumālā mudutaluṇahatthapādā||
te mudukā suseyyā sutūlabimbohanāsu yāva sūriyuggamanā seyyaɱ kappessanti.|| ||

Tesaŋ Māro pāpimā lacchati otāraɱ,||
lacchati ārammaṇaɱ.|| ||

[7] Tasmāt iha bhikkhave,||
evaɱ sikkhitabbaɱ:|| ||

"Kaliŋgarūpadhānā viharissāma appamattā ātāpino padhānasmin" ti.|| ||

Evaɱ hi vo bhikkhave, sikkhitabbanti.|| ||


Contact:
E-mail
Copyright Statement   Webmaster's Page