Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya
Nidāna-vaggo

20. Opammasamyutta
Sutta 9

Nāga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][rhyc] EVAṂ ME SUTAṂ:|| ||

Ekaɱ samayaɱ Bhagavā Sāvatthiyaɱ viharati.||
Jetavane Anāthapiṇḍikassa ārāme.|| ||

[2] Tena kho pana samayena aññataro navo bhikkhu ativelaɱ kulāni upasaŋkamati,||
tam enaɱ bhikkhū evam āhaɱsu:|| ||

"Māyasmā ativelaɱ kulāni upasaŋkamī" ti.|| ||

[3] So bhikkhūhi vuccamāno evam āha:|| ||

"Ime hi nāma therā bhikkhū kulāni upasaŋkamitabbaɱ maññissanti,||
kim aŋgaɱ panāhan" ti.|| ||

[4] Atha kho sambahulā bhikkhū yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

[5] Eka-m-antaɱ nisinnā kho te bhikkhū Bhagavantaɱ etad avocuɱ:|| ||

Idha bhante aññataro navo bhikkhu ativelaɱ kulāni upasaŋkamati||
tam enaɱ bhikkhū evam āhaɱsu:|| ||

"Māyasmā evaɱ ativelaɱ kulāni upasaŋkamī" ti.|| ||

So bhikkhū bhikkhūhi vuccamāno evam āha:|| ||

"Ime hi nāma therā bhikkhū kulāni upasaŋkamitabbaɱ maññissanti,||
kim aŋgaɱ panāhan" ti.|| ||

[6] Bhūtapubbaɱ bhikkhave,||
araññāyatane mahāsarasi,||
taɱ nāgā upanissāya viharanti,||
te taɱ sarasiɱ ogāhetvā soṇḍāya bhisamūlālaɱ abbhuggahetvā suvikkhālitaɱ vikkhāletvā akaddamaɱ sankhāritvā ajjhoharanti.|| ||

Tesaŋ taɱ vaṇṇāya c'eva hoti balāya ca,||
na ca tatonidānaɱ maraṇaɱ vā nigacchanti,||
maraṇamattaɱ vā dukkhaɱ.|| ||

[7] Tesaɱ yeva kho pana bhikkhave,||
mahānāgānaɱ anusikkhamānā taruṇā bhiṇkacchāpā,||
taɱ sarasiɱ ogāhetvā soṇḍāya bhisamūlālaɱ abbhuggahetvā na suvikkhālitaɱ vikkhāletvā sakaddamaɱ saŋkhāditvā ajjhoharanti.|| ||

Tesaŋ taɱ n'eva vaṇṇāya ceva hoti na balāya,||
tato nidānaɱ maraṇaɱ vā nigacchanti,||
maraṇamattaɱ vā dukkhaɱ.|| ||

[8] Evam eva kho bhikkhave,||
idha therā bhikkhū pubbaṇhasamayaɱ nivāsetvā pattacīvaram ādāya gāmaɱ vā nigamaɱ vā piṇḍāya pavisanti.|| ||

Te tattha dhammaɱ bhāsanti||
tesaŋ gihī pasannā karaɱ karonti,||
te taɱ lābhaɱ agadhitā amucchitā anajjhopanna,||
ādīnavadassāvino nissaraṇapaññā paribhuñjanti.|| ||

Tesaŋ taɱ vaṇṇāya c'eva hoti balāya ca,||
na ca tatonidānaɱ maraṇaɱ vā nigacchantali,||
maraṇamattaɱ vā dukkhaɱ.|| ||

[9] Tesaɱ yeva kho pana bhikkhave,||
therānaɱ bhikkhūnaɱ anusikkhamānā navā bhikkhū pubbaṇhasamayaɱ nivāsetvā pattacīvaram ādāya gāmaɱ vā nigamaɱ vā piṇḍāya pavisanti.|| ||

[10] Te tattha dhammaɱ bhāsanti,||
tesaŋ gihī pasannā kāraɱ karonti,||
te taɱ lābhaɱ gadhitā mucchitā ajjhopannā anādīnavadassāvino anissaraṇapaññā paribhuñjanti.|| ||

Tesaŋ taɱ n'eva vaṇṇāya hoti na balāya,||
te tatonidānaɱ maraṇaɱ vā nigacchanti,||
maraṇamattaɱ vā dukkhaɱ.|| ||

[11] Tasmāt iha bhikkhave,||
evaɱ sikkhitabbaɱ:|| ||

"Agathitā amucchitā anajjhopannā ādīnavadassāvino nissaraṇapaññā lābhaɱ paribhuñjissāmā" ti.|| ||

Evaɱ hi vo bhikkhave, sikkhitabbanti.|| ||


Contact:
E-mail
Copyright Statement   Webmaster's Page