Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya
Nidāna-vaggo

20. Opammasamyutta
Sutta 10

Biḷāla Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][rhyc] EVAṂ ME SUTAṂ:|| ||

Ekaɱ samayaɱ Bhagavā Sāvatthiyaɱ viharati.||
Jetavane Anāthapiṇḍikassa ārāme.|| ||

[2] Tena kho pana samayena aññataro bhikkhu ativelaɱ kulesu cārittaɱ āpajjati||
tam enaɱ bhikkhū evam āhaɱsu:|| ||

"Māyasmā ativelaɱ kulesu cārittaɱ āpajjī" ti.|| ||

[3] So bhikkhu bhikkhūhi vuccamāno na viramati.|| ||

[4] Atha kho sambahulā bhikkhū yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū Bhagavantaɱ etad avocuɱ:|| ||

[5] "Idha bhante, aññataro bhikkhū ativelaɱ kulesu cārittam āpajjati||
tam enaɱ bhikkhū evam āhaɱsu:|| ||

"Māyasmā ativelaɱ kulesu cārittaɱ āpajjī" ti.|| ||

So bhikkhu bhikkhūhi vuccamāno na viramatī" ti.|| ||

[6] Bhūtapubbaɱ bhikkhave, biḷālo sandhisamalasaŋkaṭīre ṭhito ahosi mudumūsiɱ maggayamāno.|| ||

"Yadāyaɱ mudumūsī gocarāya pakkamissati,||
tattheva naɱ gahetvā khādissāmī" ti.|| ||

[7] Atha kho bhikkhave, mudumūsī gocarāya pakkami||
tam enaɱ biḷālo gahetvā sahasā sankhāritvā ajjhohari.|| ||

Tassa mudumūsi antam pi khādi,||
antaguṇam pi khādi,||
so tato nidānaɱ maraṇam pi nigacchati,||
maraṇamattam pi dukkhaɱ.|| ||

[8] Evam eva kho bhikkhave,||
idhekacco bhikkhu pubbaṇhasamayaɱ nivāsetvā pattacīvaram ādāya gāmaɱ vā nigamaɱ vā piṇḍāya pavisati,||
arakkhiten'eva kāyena arakkhitāya vācāya arakkhitena cittena anupaṭṭhitāya satiyā asaŋvutehi indriyehi.|| ||

[9] So tattha passati mātugāmaɱ dunnivatthaɱ vā duppārutaɱ vā,||
tassa mātugāmaɱ disvā dunnivatthaɱ vā duppārutaɱ vā rāgo cittaɱ anuddhaɱseti,||
so rāgānuddhaɱsena cittena maraṇaɱ vā nigacchati,||
maraṇamatttaɱ vā dukkhaɱ.|| ||

[10] Maraṇaɱ h'etaɱ bhikkhave,||
ariyassa vinaye yo sikkhaɱ paccakkhāya hīnāyāvattati,||
Maraṇamattaɱ h'etaɱ bhikkhave,||
dukkhaɱ yad idaɱ aññataraɱ saŋkiliṭṭhaɱ āpattiɱ āpajjati,||
yathārūpāya āpattiyā vuṭṭhānaɱ paññāyati.|| ||

[11] Tasmā ti ha bhikkhave, evaɱ sikkhitabbaɱ:|| ||

"Rakkhiten'eva kāyena rakkhitāya vācāya rakkhitena cittena upaṭṭhitāya satiyā saŋvutehi indriyehi gāmaɱ vā nigamaɱ vā piṇḍāya pavisissāmā" ti.|| ||

Evaɱ hi vo bhikkhave, sikkhitabbanti.|| ||


Contact:
E-mail
Copyright Statement   Webmaster's Page