Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XXI. Bhikkhu Saɱyutta

Sutta 4

Navo or Nava Bhikkhu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[277]

[1][rhyc][bodh] EVAṂ ME SUTAṂ:|| ||

Ekaɱ samayaɱ Bhagavā Sāvatthiyaɱ viharati.||
Jetavane Anāthapiṇḍikassa ārāme.|| ||

[2][rhyc]Tena kho pana samayena aññataro navo bhikkhu pacchābhattam piṇḍapātapaṭikkanto vihāram pavisitvā appossukko tunhībhūto saŋkāsāyati,||
na bhikkhūnaɱ veyyāvaccam karoti cīvarakāra samaye.|| ||

[3][rhyc] Atha kho sambahulā bhikkhū yena Bhagavā ten upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

[4][rhyc] Eka-m-antaɱ nisinnā kho te bhikkhū Bhagavantaɱ etad avocuɱ:|| ||

"Idha bhante, aññataro navo bhikkhū pacchābhattaɱ piṇḍapātapaṭikkanto vihāraɱ pavisitvā appossukko tuṇhībhūto saŋkasāyati||
na bhikkhūnaɱ veyyāvaccaɱ karoti cīvarakāra samaye" ti.|| ||

[5][rhyc]Atha kho Bhagavā aññataraɱ bhikkhū āmantesi|| ||

"Ehi tvaɱ bhikkhu mama vacanena taɱ bhikkhuɱ āmantehi,||
satthā taɱ āvuso, āmantetī" ti.|| ||

[6][rhyc]'Evaɱ bhante' ti kho so bhikkhu Bhagavato paṭissutvā yena so bhikkhu tenupasaŋkami.|| ||

Upasaŋkamitvā taɱ bhikkhum etad avoca:

"Satthā taɱ āvuso, āmantetī" ti.|| ||

[7][rhyc]'Evam āvuso' ti kho so bhikkhu tassa bhikkhuno paṭissutvā yena Bhagavā tenupasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

[8][rhyc]Eka-m-antaɱ nisinnaɱ kho taɱ bhikkhūɱ Bhagavā etad avoca:|| ||

"Saccaɱ kira tvaɱ bhikkhu,||
pacchābhattaɱ piṇḍapātapaṭikkanto vihāraɱ pavisitvā appossukko tuṇhībhūto saɱkasāyasi,||
na bhikkhūnaɱ veyyāvaccaɱ karosi cīvarakāra samaye" ti.|| ||

'Aham pi kho bhante, sakaɱ kiccaɱ karomī' ti.|| ||

[9][rhyc]Atha kho Bhagavā tassa bhikkhuno cetasā cotoparivitakkam aññāya bhikkhū āmantesi:|| ||

Mā kho tumhe bhikkhave, etassa bhikkhuno vjjhāyittha.|| ||

Eso kho bhikkhave, bhikkhu catunnaɱ jhānānaɱ ābhicetasikānaɱ diṭṭhadhamma-sukhavihārānaɱ nikāmalābhī akicchalābhī akasiralābhī.|| ||

Yassa catthāya kulaputtā samma-d-eva agārasmā anagāriyaɱ pabbajanti,||
tadanuttaraɱ brahmacariya-pariyosānaɱ diṭṭhe va dhamme sayaɱ abhiññā sacchikatvā upasampajja viharatī' ti.|| ||

[10][rhyc] Idam avoca Bhagavā,||
idaɱ vatvāna Sugato athāparaɱ etad avoca satthā.|| ||

Nayidaɱ sithilam ārabbha||
na yidaɱ appena thāmasā,
Nibbānaɱ adhigantabbaɱ||
sabbadukkhapamocanaɱ.||
Ayaāɱ ca daharo bhikkhu||
ayam uttamaporiso,||
dhāreti antimaɱ dehaɱ||
jetvā Māraɱ savāhininti.|| ||


Contact:
E-mail
Copyright Statement   Webmaster's Page