Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
3. Khandha Vagga
22. Khandha Saɱyutta
1. Nakulapita Vagga

Sutta 4

Dutiya Hāliddikāni Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[12]

[1][pts][bodh] Evaɱ me sutaɱ:|| ||

Ekaɱ samayaɱ āyasmā mahākaccāno avantīsu viharati kuriraghare papāte pabbate.|| ||

[13] atha kho hāliddikāni gahapati yenāyasmā mahākaccāno ten'upasaŋkami.||
Upasaŋkamitvā āyasmantaɱ mahākaccānaɱ abhivādetvā eka-m-antaɱ nisīdi,||
eka-m-antaɱ nisinno kho hāliddikāni gahapati āyasmantaɱ mahākaccānaɱ etad avoca:|| ||

Vuttamidaɱ bhante,||
Bhagavatā sakkapañhe "ye te samaṇa-brāhmaṇā taṇhāsaŋkhayavimuttā,||
te accantaniṭṭhā accantayogakkhemino accantabrahmacārino Accantapariyosānā seṭṭhā deva-manussānan" ti.|| ||

Imassa nu kho bhante,||
Bhagavatā saŋkhittena bhāsitassa kathaɱ vitthārena attho daṭṭhabbo? ti.|| ||

Rūpadhātuyā kho gahapati,||
yo chando yo rāgo yā nandi yā taṇhā ye upāyūpādānā cetaso adhiṭṭhānābhinivesānusayā,||
tesaɱ khayā virāgā nirodhā cāgā paṭinissaggā cittaɱ suvimuttanti vuccati.|| ||

Vedanādhātuyā kho gahapati,||
yo chando yo rāgo yā nandi yā taṇhā ye upāyūpādānā cetaso adhiṭṭhānābhinivesānusayā,||
tesaɱ khayā virāgā nirodhā cāgā paṭinissaggā cittaɱ suvimuttanti vuccati.|| ||

Saññādhātuyā kho gahagati,||
yo chando yo rāgo yā nandi yā taṇhā ye upāyūpādānā cetaso adhiṭṭhānābhinivesānusayā,||
tesaɱ khayā virāgā nirodhā cāgā paṭinissaggā cittaɱ suvimuttanti vuccati.|| ||

Sankhāradhātuyā kho gahapati,||
yo chando yo rāgo yā nandi yā taṇhā ye upāyūpādānā cetaso adhiṭṭhānābhinivesānusayā,||
tesaɱ khayā virāgā nirodhā cāgā paṭinissaggā cittaɱ suvimuttanti vuccati.|| ||

Viññāṇadhātuyā kho gahapati,||
yo chando yo rāgo yā nandi yā taṇhā ye upāyūpādānā cetaso adhiṭṭhānābhinivesānusayā,||
tesaɱ khayā virāgā nirodhā cāgā paṭinissaggā cittaɱ suvimuttanti vuccati.|| ||

Iti kho gahapati,||
yan taɱ vuttaɱ Bhagavatā sakkapañhe: "ye te samaṇa-brāhmaṇā taṇhāsaŋkhayavimuttā,||
te accantaniṭṭhā accantayogakkhemino accantabrahmacārino accantapariyosānā seṭṭhā deva-manussānan" ti.|| ||

Imassa kho gahapati,||
Bhagavatā saŋkhittena bhāsitassa evaɱ vitthārena attho daṭṭhabboti.|| ||

 


Contact:
E-mail
Copyright Statement   Webmaster's Page