Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
3. Khandha Vagga
22. Khandha Saɱyutta
3. Bhāra Vagga

Sutta 22

Bhāra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[25]

[1][wrrn][pts][wlsh][than][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

"Bhārañ ca bhikkhave desissāmi||
bhāra-hārañ ca,||
bhārādānañ ca,||
bhāra-nikkhepanañ ca.|| ||

Taɱ suṇātha sādhukaɱ mana-sikaretha bhāsissāmī" ti.|| ||

"Evaɱ bhante" ti kho te bhikkhū Bhagavato paccassosuɱ:|| ||

Bhagavā etad avoca:|| ||

"Katamo ca bhikkhave bhāro?|| ||

Pañc'upādānakkhandhā tissa vacanīyaɱ.|| ||

Katame pañca?|| ||

Rūp'ūpādānakkhandho
vedan'ūpādānakkhandho
saññ'ūpādānakkhandho
saɱkhār'ūpādānakkhandho
viññāṇ'ūpādānakkhandho.|| ||

Ayaɱ vuccati bhikkhave bhāro.|| ||

Katamo ca bhikkhave bhāra-hāro?|| ||

Puggalo tissa vacanīyaɱ,||
yo'yaɱ āyasmā evaɱ-nāmo evaɱgotto.|| ||

Ayaɱ vuccati bhikkhave, bhāra-hāro.|| ||

[26] Katamañ ca bhikkhave, bhārādānaɱ?|| ||

Yāyaɱ taṇhā ponobhavikā nandi-rāga-sahagatā tatra tatrābhinandinī seyyathīdaɱ:||
kāma-taṇhā
bhava-taṇhā
vibhava-taṇhā.|| ||

Idaɱ vuccati bhikkhave bhārādānaɱ.|| ||

Katamañ ca bhikkhave bhāra-nikkhepanaɱ?|| ||

Yo tassāyeva taṇhāya asesa-virāga-nirodho cāgo paṭinissaggo mutti anālayo.|| ||

Idaɱ vuccati bhikkhave bhāra-nikkhepanan" ti.|| ||

Idam avoca Bhagavā idaɱ vatvā sugato athāparaɱ etad avoca satthā:|| ||

 

Bhārā bhave pañcakkhandhā bhāra-hāro ca puggalo,||
Bhārādānaɱ dukhaɱ loke bhāranikkhepanaɱ sukhaɱ.|| ||

Nikkhipitvā garuɱ bhāraɱ aññaɱ bhāraɱ anādiya,||
Samūlaɱ taṇhaɱ abbuyha nicchāto parinibbuto.|| ||

 


Contact:
E-mail
Copyright Statement   Webmaster's Page