Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
3. Khandha Vagga
22. Khandha Saɱyutta
3. Bhāra Vagga

Sutta 26

Paṭhama Assāda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[27]

[1][pts][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

"Pubbe me bhikkhave, sambodhā anabhisambuddhassa bodhisattassa sato etad ahosi:|| ||

'Ko nu kho rūpassa assādo,||
ko ādīnavo,||
kiɱ nissaraṇaɱ?|| ||

Ko vedanāya assādo,||
ko ādīnavo||
kiɱ nissaraṇaɱ?|| ||

Ko nu kho saññāya assādo,||
ko ādīnavo,||
kiɱ nissaraṇaɱ?|| ||

Ko nu kho sankhārānaɱ assādo,||
ko ādīnavo,||
kiɱ nissaraṇaɱ?|| ||

Ko nu kho viññāṇassa assādo,||
ko ādīnavo,||
kiɱ nissaraṇaɱ?'|| ||

 


 

[28] Tassa mayhaɱ bhikkhave etad ahosi:|| ||

'Yaɱ kho rūpaɱ paṭicca uppajjati sukhaɱ somanassaɱ,||
ayaɱ rūpassa assādo.|| ||

Yaɱ rūpaɱ aniccaɱ dukkhaɱ vipariṇāmadhammaɱ,||
ayaɱ rūpassa ādinavo.|| ||

Yo rūpasmiɱ chandarāgavinayo chandarāgappahānaɱ,||
idaɱ rūpasasa nissaraṇaɱ.|| ||

Yaɱ vedanaɱ paṭicca uppajjati sukhaɱ somanassaɱ,||
ayaɱ vedanassa assādo.|| ||

Yaɱ vedanaɱ aniccaɱ dukkhaɱ viparināmadhammaɱ,||
ayaɱ vedanassa ādinavo.|| ||

Yo vedanasmiɱ chandarāgavinayo chandarāgappahānaɱ,||
idaɱ vedanassa nissaraṇaɱ.|| ||

Yaɱ saññaɱ paṭicca uppajjati sukhaɱ somanassaɱ,||
ayaɱ saññassa assādo.|| ||

Yaɱ saññaɱ aniccaɱ dukkhaɱ viparināmadhammaɱ,||
ayaɱ saññassa ādinavo.|| ||

Yo saññasmiɱ chandarāgavinayo chandarāgappahānaɱ,||
idaɱ saññassa nissaraṇaɱ.|| ||

Yaɱ saɱkhāre paṭicca uppajjati sukhaɱ somanassaɱ,||
ayaɱ saɱkhārānaɱ assādo.|| ||

Ye saɱkhārā aniccā dukkhā viparināmadhammā,||
ayaɱ saɱkhārānaɱ ādinavo.|| ||

Yo saɱkhāresu chandarāgavinayo chandarāgappahānaɱ,||
idaɱ saɱkhārānaɱ nissaraṇaɱ.|| ||

Yaɱ viññāṇaɱ paṭicca uppajjati sukhaɱ somanassaɱ,||
ayaɱ viññāṇassa assādo.|| ||

Yaɱ viññāṇaɱ aniccaɱ dukkhaɱ viparināmadhammaɱ,||
ayaɱ viññāṇassa ādinavo.|| ||

Yo viññāṇasmiɱ chandarāgavinayo chandarāgappahānaɱ,||
idaɱ viññāṇassa nissaraṇaɱ.'|| ||

 


 

Yāva kīvañcāhaɱ bhikkhave imesaɱ pañcannaɱ upādānakkhandhānaɱ evaɱ assādañ ca assādato ādīnavañ ca ādīnavato nissaraṇañ ca nissaraṇato yathābhūtaɱ na abbhaññāsiɱ,||
n'eva tāvāhaɱ bhikkhave,||
sadevake loke samārake sabrahmake sassamaṇabrāhmaṇiyā pajāya sadeva-manussāya anuttaraɱ sammāsambodhiɱ abhisambuddhoti paccaññāsiɱ.|| ||

Yato ca kho'haɱ bhikkhave imesaɱ pañcannaɱ upādānakkhandhānaɱ evaɱ assādañ ca assādato ādīnavañ ca ādinavato nissaraṇañ ca nissaraṇato yathābhūtaɱ abbhaññāsiɱ,||
athāhaɱ bhikkhave,||
sadevake loke samārake sabrahmake sassamaṇabrahmaṇiyā pajāya sadeva-manussāya anuttaraɱ sammāsambodhiɱ abhisambuddhoti paccaññāsiɱ.|| ||

Ñāṇañ ca pana me dassanaɱ udapādi:|| ||

'Akuppā me ceto-vimutti,||
ayam antimā jāti n'atthidāni punabbhavo'" ti.|| ||

 


Contact:
E-mail
Copyright Statement   Webmaster's Page