Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
3. Khandha Vagga
22. Khandha Saɱyutta
3. Bhāra Vagga

Sutta 29

Abhinandana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[31]

[1][pts][olds][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Yo bhikkhave, rūpaɱ abhinandati,||
dukkhaɱ so abhinandati,||
yo dukkhaɱ abhinandati||
aparimutto so dukkhasmā ti vadāmi.|| ||

Yo vedanaɱ abhinandati,||
dukkhaɱ so abhinandati,||
yo dukkhaɱ abhinandati||
aparimutto so dukkhasmā ti vadāmi.|| ||

Yo bhikkhave, saññaɱ abhinandati,||
dukkhaɱ so abhinandati,||
yo dukkhaɱ abhinandati||
aparimutto so dukkhasmā ti vadāmi.|| ||

Yo bhikkhave, sankhāre abhinandati,||
dukkhaɱ so abhinandati,||
yo dukkhaɱ abhinandati||
aparimutto so dukkhasmā ti vadāmi.|| ||

Yo bhikkhave, viññāṇaɱ abhinandati,||
dukkhaɱ so abhinandati,||
yo dukkhaɱ abhinandati||
aparimutto so dukkhasmā ti vadāmi.|| ||

 

§

 

Yo ca kho bhikkhave, rūpaɱ nābhinandati,||
dukkhaɱ so nābhinandati,||
yo dukkhaɱ nābhinandati
parimutto so dukkhasmā ti vadāmi.|| ||

Yo ca kho bhikkhave, vedanaɱ nābhinandati,||
dukkhaɱ so nābhinandati,||
yo dukkhaɱ nābhinandati
parimutto so dukkhasmā ti vadāmi.|| ||

Yo ca kho bhikkhave, saññaɱ nābhinandati,||
dukkhaɱ so nābhinandati,||
yo dukkhaɱ nābhinandati
parimutto so dukkhasmā ti vadāmi.|| ||

Yo ca kho bhikkhave, sankhāre nābhinandati,||
dukkhaɱ so nābhinandati,||
yo dukkhaɱ nābhinandati
parimutto so dukkhasmā ti vadāmi.|| ||

Yo ca kho bhikkhave, viññāṇaɱ nābhinandati,||
dukkhaɱ so nābhinandati,||
yo dukkhaɱ nābhinandati
parimutto so dukkhasmā ti vadāmi.|| ||

 


Contact:
E-mail
Copyright Statement