Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya:
III. Khandha Vagga:
22: Khandha Saɱyutta
2.1. Upāya Vagga

Sutta 56

Upādāna Parivatta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

"Pañc'ime bhikkhave, upādāna-k-khandhā.|| ||

Katame pañca?|| ||

Seyyath'īdaɱ:||
rūp'ūpādāna-k-khandho,||
[59] vedanūpādā-k-khandho,||
saññ'ūpādāna-k-khandho,||
saɱkhār'ūpādāna-k-khandho,||
viññāṇ'ūpādāna-k-khandho.|| ||

Yāva kīvañc'āhaɱ bhikkhave,||
ime pañc'upādāna-k-khandhe catuparivattaɱ||
yathā-bhūtaɱ nābbhaññāsiɱ,||
n'eva tāvāhaɱ bhikkhave sa-devake loke||
sa-mārake sa-brahmake||
sa-s-samaṇa-brāhmaṇiyā||
pajāya sadeva-manussāya anuttaraɱ||
sammā-sambodhiɱ abhisambuddhoti paccaññāsiɱ.|| ||

Yato ca khohaɱ bhikkhave,||
ime pañc'upādāna-k-khandhe catuparivattaɱ||
yathā-bhūtaɱ abbhaññāsiɱ,||
ath'āhaɱ bhikkhave, sa-devake loke||
sa-mārake sa-brahmake||
sa-s-samaṇa-brāhmaṇīyā||
pajāya sadeva-manussāya anuttaraɱ||
sammā-sambodhiɱ abhisambuddhoti paccaññāsiɱ.|| ||

Kathaɱ catuparivattaɱ?|| ||

Rūpaɱ abbhaññāsiɱ,||
rūpa-samudayaɱ abbhaññāsiɱ,||
rūpa-nirodhaɱ abbhaññāsiɱ,||
rūpa-nirodha-gāminiɱ paṭipadaɱ abbhaññāsiɱ;|| ||

vedanaɱ abbhaññāsiɱ,||
vedanā-samudayaɱ abbhaññāsiɱ,||
vedanā-nirodhaɱ abbhaññāsiɱ,||
vedanā-nirodha-gāminiɱ paṭipadaɱ abbhaññāsiɱ;|| ||

saññaɱ abbhaññāsiɱ,||
saññā-samudayaɱ abbhaññāsiɱ,||
saññā-nirodhaɱ abbhaññāsiɱ,||
saññā-nirodha-gāminiɱ paṭipadaɱ abbhaññāsiɱ;|| ||

saɱkhāre abbhaññāsiɱ,||
sankhāra-samudayaɱ abbhaññāsiɱ,||
sankhāra-nirodhaɱ abbhaññāsiɱ,||
sankhāra-nirodha-gāminiɱ paṭipadaɱ abbhaññāsiɱ;|| ||

viññāṇaɱ abbhaññāsiɱ,||
viññāṇa-samudayaɱ abbhaññāsiɱ,||
viññāṇa-nirodhaɱ abbhaññāsiɱ,||
viññāṇa-nirodha-gāminiɱ paṭipadaɱ abbhaññāsiɱ.|| ||

 


 

Katamañ ca bhikkhave, rūpaɱ?|| ||

Cattaro ca mahā-bhūtā,||
catunnañ ca mahā-bhūtānaɱ upādāya rūpaɱ.|| ||

Idaɱ vuccati bhikkhave, rūpaɱ.|| ||

Āhāra-samudayā rūpa-samudayo,||
āhāra-nirodhā rūpa-nirodho.|| ||

Ayam eva Ariyo Aṭṭhaŋgiko Maggo rūpa-nirodha-gāminī paṭipadā||
seyyath'īdaɱ:|| ||

sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Ye hi keci, bhikkhave, samaṇā vā brāhmaṇā vā||
evaɱ rūpaɱ abhiññāya||
evaɱ rūpa-samudayaɱ abhiññāya||
evaɱ rūpa-nirodhaɱ abhiññāya||
evaɱ rūpa-nirodha-gāminiɱ paṭipadaɱ abhiññāya||
rūpassa nibbidāya||
virāgāya nirodhāya paṭipannā,||
te su-paṭipannā,||
ye su-paṭipannā||
te imasmiɱ Dhamma-Vinaye gādhanti.|| ||

Ye ca kho keci bhikkhave, samaṇā vā brāhmaṇā vā||
evaɱ rūpaɱ abhiññāya||
evaɱ rūpa-samudayaɱ abhiññāya||
evaɱ rūpa-nirodhaɱ abhiññāya||
evaɱ rūpa-nirodha-gāminiɱ paṭipadaɱ abhiññāya||
rūpassa nibbidā||
virāgā nirodhā anupādā vimuttā,||
te suvimuttā,||
ye suvimuttā te kevalino,||
ye kevalino,||
vaṭṭaɱ tesaɱ n'atthi paññāpanāya.|| ||

Katamā ca bhikkhave, vedanā?|| ||

Chayime ca bhikkhave, [60] vedanā-kāyā:||
cakkhu-samphassajā vedanā,||
sota-samphassajā vedanā,||
ghāna-samphassajā vedanā,||
jivhā-samphassajā vedanā,||
kāya-samphassajā vedanā,||
mano-samphassajā vedanā.|| ||

Ayaɱ vuccati bhikkhave, vedanā.|| ||

Phassa-samudayā vedanā-samudayo,||
phassa-nirodhā vedanā-nirodho,||
ayam eva Ariyo Aṭṭhaŋgiko Maggo vedanā-nirodha-gāmīni paṭipadā||
seyyath'īdaɱ:|| ||

sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Ye hi keci, bhikkhave, samaṇā vā brāhmaṇā vā||
evaɱ vedanaɱ abhiññāya||
evaɱ vedanā-samudayaɱ abhiññāya||
evaɱ vedanā-nirodhaɱ abhiññāya||
evaɱ vedanā-nirodha-gāminiɱ paṭipadaɱ abhiññāya||
vedanāya nibbidāya||
virāgāya nirodhāya paṭipannā,||
te su-paṭipannā||
ye su-paṭipannā,||
te imasmiɱ Dhamma-Vinaye gādhanti.|| ||

Ye ca kho keci bhikkhave, samaṇā vā brāhmaṇā vā||
evaɱ vedanaɱ abhiññāya||
evaɱ vedanā-samudayaɱ abhiññāya||
evaɱ vedanā-nirodhaɱ abhiññāya||
evaɱ vedanā-nirodha-gāminiɱ paṭipadaɱ abhiññāya||
vedanāya nibbidā||
virāgā nirodhā anupādā vimuttā,||
te suvimuttā,||
ye suvimuttā,||
te kevalino,||
ye kevalino,||
vaṭṭaɱ tesaɱ n'atthi paññāpanāya.|| ||

Katamā ca bhikkhave, saññā?|| ||

Chayime bhikkhave, saññā-kāyā||
rūpa-saññā||
sadda-saññā||
gandha-saññā||
rasa-saññā||
phoṭṭhabba-saññā||
dhamma-saññā.|| ||

Ayaɱ vuccati bhikkhave, saññā.|| ||

Phassa-samudayā saññā-samudayo,||
phassa-nirodhā saññā-nirodho,||
ayam eva Ariyo Aṭṭhaŋgiko Maggo saññā-nirodha-gāminī-paṭipadā||
seyyath'īdaɱ:|| ||

sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Ye hi keci, bhikkhave, samaṇā vā brāhmaṇā vā||
evaɱ saññaɱ abhiññāya||
evaɱ saññā-samudayaɱ abhiññāya||
evaɱ saññā-nirodhaɱ abhiññāya||
evaɱ saññā-nirodha-gāminiɱ paṭipadaɱ||
abhiññāya saññāya||
nibbidā virāgā||
nirodhā anupādā vimuttā,||
te suvimuttā,||
ye suvimuttā,||
te kevalino,||
ye kevalino,||
vaṭṭaɱ tesaɱ n'atthi paññāpanāya.|| ||

Katame ca bhikkhave, saɱkhārā?|| ||

Chayime bhikkhave, cetanākāyā:||
rūpa-sañcetanā||
sadda-sañcetanā||
gandha-sañcetanā||
rasa-sañcetanā||
phoṭṭhabba-sañcetanā||
dhamma-sañcetanā.|| ||

Ime vuccanti bhikkhave, saɱkhārā.|| ||

Phassa-samudayā sankhāra-samudayo,||
phassa-nirodhā sankhāra-nirodho,||
ayam eva Ariyo Aṭṭhaŋgiko Maggo sankhāra-nirodha-gāminī paṭipadā||
seyyath'īdaɱ:|| ||

sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Ye hi keci, bhikkhave, samaṇā vā brāhmaṇā vā||
evaɱ saɱkhāre abhiññāya||
evaɱ saɱkhārā-samudayaɱ abhiññāya||
evaɱ sankhāra-nirodhaɱ abhiññāya||
evaɱ sankhāra-nirodha-gāminiɱ paṭipadaɱ||
abhiññāya saɱkhārāya||
nibbidā virāgā||
nirodhā anupādā vimuttā,||
te suvimuttā,||
ye suvimuttā,||
te kevalino,||
ye kevalino,||
vaṭṭaɱ tesaɱ n'atthi paññāpanāya.|| ||

Katamā ca bhikkhave, viññāṇaɱ?|| ||

Chayime bhikkhave, viññāṇa-kāyā:||
cakkhu-viññāṇaɱ,||
sota-viññāṇaɱ,||
ghāna-viññāṇaɱ||
jivhā-viññāṇaɱ,||
kāya-viññāṇaɱ,||
mano-viññāṇaɱ.|| ||

Idaɱ vuccati bhikkhave, viññāṇaɱ.|| ||

Nāma-rūpa-samudayā viññāṇa-samudayo,||
nāma-rūpa-nirodhā viññāṇa-nirodho,||
ayam eva Ariyo Aṭṭhaŋgiko Maggo viññāṇa-nirodha-gāminī paṭipadā||
seyyath'īdaɱ:|| ||

sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Ye hi keci, bhikkhave, samaṇā vā brāhmaṇā vā||
evaɱ viññāṇaɱ abhiññāya||
evaɱ viññāṇa-samudayaɱ abhiññāya||
evaɱ viññāṇa-nirodhaɱ abhiññāya||
evaɱ viññāṇa-nirodha-gāminiɱ paṭipadaɱ||
abhiññāya viññāṇassa||
nibbidā [61] virāgāya||
nirodhāya paṭipannā,||
te su-paṭipannā,||
ye su-paṭipannā,||
te imasmiɱ Dhamma-Vinaye gādhanti.|| ||

Ye ca kho keci bhikkhave, samaṇā vā brāhmaṇā vā||
evaɱ viññāṇaɱ abhiññāya||
evaɱ viññāṇa-samudayaɱ abhiññāya||
evaɱ viññāṇa-nirodhaɱ abhiññāya||
evaɱ viññāṇa-nirodha-gāminiɱ paṭipadaɱ||
abhiññāya viññāṇassa||
nibbidā virāgā||
nirodhā anupādā vimuttā,||
te suvimuttā||
ye suvimuttā||
te kevalino,||
ye kevalino,||
vaṭṭaɱ tesaɱ n'atthi paññāpanāyā" ti.|| ||

 


Contact:
E-mail
Copyright Statement