Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.1. Upāya Vagga

Sutta 57

Sattaṭṭhāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

"Sattaṭṭhānakusalo bhikkhave, bhikkhu tividhūpaparikkhī imasmiɱ dhamma-vinaye kevalī vusitavā uttamapuriso ti vuccati.|| ||

Kathañ ca bhikkhave, bhikkhu sattaṭṭhānakusalo hoti?|| ||

[62] Idha bhikkhave, bhikkhu||
rūpaɱ pajānāti,||
rūpas-amudayaɱ pajānāti,||
rūpa-nirodhaɱ pajānāti,||
rūpa-nirodha-gāminiɱ paṭipadaɱ pajānāti,||
rūpassa assādaɱ pajānāti,||
rūpassa ādinavaɱ pajānāti,||
rūpassa nissaraṇaɱ pajānāti.|| ||

Vedanaɱ pajānāti,||
vedanā-samudayaɱ pajānāti,||
vedanā-nirodhaɱ pajānāti,||
vedanā-nirodha-gāminiɱ paṭipadaɱ pajānāti,||
vedanāya assādaɱ pajānāti,||
vedanāya ādinavāɱ pajānāti,||
vedanāya nissaraṇaɱ pajānāti.|| ||

Saññaɱ pajānāti,||
saññā-samudayaɱ pajānāti,||
saññā-nirodhaɱ pajānāti,||
saññā-nirodha-gāminiɱ paṭipadaɱ pajānāti,||
saññāya assādaɱ pajānāti,||
saññāya ādināɱ pajānāti,||
saññassa nissaraṇaɱ pajānāti.|| ||

Saɱkhāre pajānāti,||
saɱkhāra-samudayaɱ pajānāti,||
saɱkhārā-nirodhaɱ pajānāti,||
saɱkhārā-nirodha-gāminiɱ paṭipadaɱ pajānāti,||
saɱkhāresu assādaɱ pajānāti,||
saɱkhārānaɱ ādinavaɱ pajānāti,||
saɱkhārānaɱ nissaraṇaɱ pajānāti.|| ||

Viññāṇaɱ pajānāti,||
viññaṇa-samudayaɱ pajānāti,||
viññāṇa-nirodhaɱ pajānāti,||
viññāṇa-nirodha-gāminiɱ paṭipadaɱ pajānāti,||
viññāṇassa assādaɱ pajānāti,||
viññāṇassa ādinavaɱ pajānāti,||
viññāṇassa nissaraṇaɱ pajānāti.|| ||

Katamañ ca bhikkhave, rūpaɱ?|| ||

Cattāro ca mahābhūtā catunnañ ca mahābhūtānaɱ upādāya rūpaɱ.|| ||

Idaɱ vuccati bhikkhave rūpaɱ.|| ||

Āhāra-samudayā rūpa-samudayo,||
āhāra-nirodhā rūpa-nirodho,||
ayam eva ariyo aṭṭhaŋgiko maggo rūpa-nirodha-gāminī paṭipadā,||
seyyathīdaɱ:||
sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Yaɱ rūpaɱ paṭicca uppajjati sukhaɱ somanassaɱ ayaɱ rūpassa assādo.|| ||

Yaɱ rūpaɱ aniccaɱ dukkhaɱ vipariṇāmadhammaɱ,||
ayaɱ rūpassa ādīnavo.|| ||

Yo rūpasmiɱ chandarāgavinayo chandarāgappahānaɱ idaɱ rūpassa nissaraṇaɱ.|| ||

Ye hi keci, bhikkhave, samaṇā vā brāhmaṇā vā||
evaɱ rūpaɱ abhiññāya||
evaɱ rūpasamudayaɱ abhiññāya||
evaɱ rūpanirodhaɱ abhiññāya||
evaɱ rūpanirodhagāminiɱ paṭipadaɱ abhiññāya||
evaɱ rūpassa assādaɱ abhiññāya||
evaɱ rūpassa ādīnavaɱ abhiññāya||
evaɱ rūpassa nissaraṇaɱ abhiññāya||
rūpassa nibbidāya||
virāgāya nirodhāya paṭipannā,||
te supaṭipannā,||
ye supaṭipannā||
te imasmiɱ dhamma-vinaye gādhanti.|| ||

Ye ca kho keci bhikkhave, samaṇā vā brāhmaṇā vā||
evaɱ rūpaɱ abhiññāya||
evaɱ rūpasamudayaɱ abhiññāya||
evaɱ rūpanirodhaɱ abhiññāya||
evaɱ rūpanirodhagāminiɱ paṭipadaɱ abhiññāya||
evaɱ rūpassa assādaɱ abhiññāya||
evaɱ rūpassa ādīnavaɱ abhiññāya||
evaɱ rūpassa [63] nissaraṇaɱ abhiññāya||
rūpassa nibbidā||
virāgā nirodhā anupādā vimuttā||
te suvimuttā,||
ye suvimuttā||
te kevalino,||
ye kevalino||
vaṭṭaɱ tesaɱ n'atthi paññāpanāya.|| ||

Katamā ca bhikkhave, vedanā?|| ||

Chayime bhikkhave, vedanākāyā:||
cakkhu-samphassajā vedanā,||
sota-samphassajā vedanā,||
ghāna-samphassajā vedanā||
jivhā-samphassajā vedanā||
kāya-samphassajā vedanā,||
mano-samphassajā vedanā.|| ||

Ayaɱ vuccati bhikkhave, vedanā.|| ||

Phassa-samudayā vedanā-samudayo,||
phassa-nirodhā vedanā-nirodho,||
ayam eva ariyo aṭṭhaŋgiko maggo vedanānirodhagāminī paṭipadā,||
seyyathīdaɱ:||
sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Yaɱ vedanaɱ paṭicca uppajjati sukhaɱ somanassaɱ,||
ayaɱ vedanāya assādo.|| ||

Yā vedanā aniccā dukkhā vipariṇāma-dhammā,||
ayaɱ vedanāya ādīnavo.|| ||

Yo vedanāya chandarāgavinayo chandarāgappahānaɱ,||
idaɱ vedanāya nissaraṇaɱ.|| ||

Ye hi keci, bhikkhave, samaṇā vā brāhmaṇā vā||
evaɱ vedanaɱ abhiññāya||
evaɱ vedanā-samudayaɱ abhiññāya||
evaɱ vedanā-nirodhaɱ abhiññāya||
evaɱ vedanā-nirodha-gāminiɱ paṭipadaɱ abhiññāya||
evaɱ vedanāya assādaɱ abhiññāya||
evaɱ vedanāya ādīnavaɱ abhiññāya||
evaɱ vedanāya nissaraṇaɱ abhiññāya||
vedanāya nibbidāya virāgāya nirodhāya paṭipannā,||
te supaṭipannā,||
ye supaṭipannā||
te imasmiɱ dhamma-vinaye gādhanti.|| ||

Ye ca kho keci bhikkhave, samaṇā vā brāhmaṇā vā||
evaɱ vedanaɱ abhiññāya||
evaɱ vedanā-samudayaɱ abhiññāya||
evaɱ vedanā-nirodhaɱ abhiññāya||
evaɱ vedanā-nirodha-gāminiɱ paṭipadaɱ abhiññāya||
evaɱ vedanāya assādaɱ abhiññāya||
evaɱ vedanāya ādīnavaɱ abhiññāya||
evaɱ vedanāya nissaraṇaɱ abhiññāya||
vedanāya nibbidā virāgā nirodhā anupādā vimuttā,||
te suvimuttā||
Ye suvimuttā||
te kevalino||
ye kevalino vaṭṭaɱ tesaɱ n'atthi paññāpanāya.|| ||

Katamā ca bhikkhave saññā?|| ||

Chayive bhikkhave saññākāya:||
rūpa-saññā,||
sadda-saññā,||
gandha-saññā,||
rasa-saññā,||
phoṭṭhabba-saññā,||
dhamma-saññā.|| ||

Ayaɱ vuccati bhikkhave, saññā.|| ||

Phassa-samudayā saññā-samudayo,||
phassa-nirodhā saññā-nirodho,||
ayam eva ariyo aṭṭhaŋgiko maggo saññā-nirodha-gāminī paṭipadā,||
seyyathīdaɱ:||
sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Yaɱ saññaɱ paṭicca uppajjati sukhaɱ somanassaɱ,||
ayaɱ saññāya assādo.|| ||

Yā saññā aniccā dukkhā vipariṇāma-dhammā,||
ayaɱ saññāya ādīnavo.|| ||

Yo saññāya chandarāgavinayo chandarāgappahānaɱ,||
idaɱ saññāya nissaraṇaɱ.|| ||

Ye hi keci, bhikkhave, samaṇā vā brāhmaṇā vā||
evaɱ saññaɱ abhiññāya||
evaɱ saññā-samudayaɱ abhiññāya||
evaɱ saññā-nirodhaɱ abhiññāya||
evaɱ saññā-nirodha-gāminiɱ paṭipadaɱ abhiññāya||
evaɱ saññāya assādaɱ abhiññāya||
evaɱ saññāya ādīnavaɱ abhiññāya||
evaɱ saññāya nissaraṇaɱ abhiññāya||
saññāya nibbidāya virāgāya nirodhāya paṭipannā,||
te supaṭipannā,||
ye supaṭipannā||
te imasmiɱ dhamma-vinaye gādhanti.|| ||

Ye ca kho keci bhikkhave, samaṇā vā brāhmaṇā vā||
evaɱ saññaɱ abhiññāya||
evaɱ saññā-samudayaɱ abhiññāya||
evaɱ saññā-nirodhaɱ abhiññāya||
evaɱ saññā-nirodha-gāminiɱ paṭipadaɱ abhiññāya||
evaɱ saññāya assādaɱ abhiññāya||
evaɱ saññāya ādīnavaɱ abhiññāya||
evaɱ saññāya nissaraṇaɱ abhiññāya||
saññāya nibbidā virāgā nirodhā anupādā vimuttā,||
te suvimuttā||
te kevalino||
ye kevalino||
vaṭṭaɱ tesaɱ n'atthi paññāpanāya.|| ||

Katame ca bhikkhave, sankhārā?|| ||

Chayime bhikkhave cetanā-kāyā:||
rūpa-sañcetanā||
sadda-sañcetanā||
gandha-sañcetanā||
rasa-sañcetanā||
phoṭṭhabba-sañcetanā||
dhamma-sañcetanā.|| ||

Ime vuccanti bhikkhave sankhārā.|| ||

Phassa-samudayā sankhārā-samudayo,||
phassa-nirodhā sankhārā-nirodho,||
ayam eva ariyo aṭṭhaŋgiko maggo saññā-nirodha-gāminī paṭipadā,||
seyyathīdaɱ:||
sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Yaɱ sankhāre paṭicca uppajjati sukhaɱ somanassaɱ,||
ayaɱ sankhārānaɱ assādo.|| ||

Yā sankhārā aniccā dukkhā vipariṇāma-dhammā,||
ayaɱ sankhārānaɱ ādīnavo.|| ||

Yo sankhāresu chandarāgavinayo chandarāgappahānaɱ,||
idaɱ sankhārānaɱ nissaraṇaɱ.|| ||

Ye hi keci, bhikkhave, samaṇā vā brāhmaṇā vā||
evaɱ sankhāre abhiññāya||
evaɱ sankhāra-samudayaɱ abhiññāya||
evaɱ sankhāra-nirodhaɱ abhiññāya||
evaɱ sankhāra-nirodha-gāminiɱ paṭipadaɱ abhiññāya||
evaɱ sankhārassa assādaɱ abhiññāya||
evaɱ sankhāre ādīnavaɱ abhiññāya||
evaɱ sankhārassa nissaraṇaɱ abhiññāya||
sankhārassa nibbidāya virāgāya nirodhāya paṭipannā,||
te supaṭipannā,||
ye supaṭipannā||
te imasmiɱ dhamma-vinaye gādhanti.|| ||

Ye ca kho keci bhikkhave, samaṇā vā brāhmaṇā vā||
evaɱ sankhāre abhiññāya||
evaɱ sankhāra-samudayaɱ abhiññāya||
evaɱ sankhāra-nirodhaɱ abhiññāya||
evaɱ sankhāra-nirodha-gāminiɱ paṭipadaɱ abhiññāya||
evaɱ sankhārassa assādaɱ abhiññāya||
evaɱ sankhāre ādīnavaɱ abhiññāya||
evaɱ sankhārassa nissaraṇaɱ abhiññāya||
sankhārassa nibbidā virāgā nirodhā anupādā vimuttā,||
te suvimuttā||
Ye suvimuttā||
te kevalino||
ye kevalino||
vaṭṭaɱ tesaɱ n'atthi paññāpanāya.|| ||

Katamañ ca bhikkhave, viññāṇaɱ?|| ||

Chayime bhikkhave, viññāṇa-kāyā:||
cakkhu-viññāṇaɱ,||
sota-viññāṇaɱ,||
ghāṇa-viññāṇaɱ,||
jivhā-viññāṇaɱ,||
kāya-viñañāṇaɱ,||
mano-viññāṇaɱ.|| ||

Idaɱ vuccati bhikkhave, viññāṇaɱ.|| ||

Nāmarūpa-samudayā viññāṇa-samudayo,||
nāmarūpa-nirodhā viññāṇa-nirodho,||
ayam eva ariyo aṭṭhaŋgiko maggo viññāṇa-nirodha-gāminī paṭipadā,||
seyyathīdaɱ:||
sammā-diṭṭhi||
sammā-saɱkappo||
sammā-vācā||
sammā-kammanto||
sammā-ājivo||
sammā-vāyāmo||
sammā-sati||
sammā-samādhi.|| ||

Yaɱ viññāṇaɱ paṭicca uppajjati sukhaɱ somanassaɱ,||
ayaɱ viññāṇassa assādo.|| ||

Yaɱ viññāṇaɱ aniccaɱ dukkhaɱ vipariṇāmadhammaɱ,||
ayaɱ viññāṇassa ādīnavo.|| ||

Yo viññāṇasmiɱ chandarāgavinayo chandarāgappahānaɱ,||
idaɱ viññāṇassa nissaraṇaɱ.|| ||

Ye hi keci, bhikkhave, samaṇā vā brāhmaṇā vā||
evaɱ viññāṇaɱ abhiññāyaɱ||
evaɱ viññāṇasamudayaɱ abhiññāya||
evaɱ viññāṇanirodhaɱ abhiññāya||
evaɱ viññāṇanirodhagāminiɱ paṭipadaɱ abhiññāya||
evaɱ viññāṇassa assādaɱ abhiññāya||
evaɱ viññāṇassa ādīnavaɱ abhiññāya||
evaɱ viññāṇassa nissaraṇaɱ abhiññāya||
viññāṇassa nibbidāya virāgāya nirodhāya paṭipannā,||
te supaṭipannā||
ye supaṭipannā||
te imasmiɱ||
dhamma-vinaye gādhanti.|| ||

[65] Ye ca kho keci bhikkhave, samaṇā vā brāhmaṇā vā||
evaɱ viññāṇaɱ abhiññāya||
evaɱ viññāṇasamudayaɱ abhiññāya||
evaɱ viññāṇanirodhaɱ abhiññāya||
evaɱ viññāṇanirodhagāminiɱ paṭipadaɱ abhiññāya||
evaɱ viññāṇassa assādaɱ abhiññāya||
evaɱ viññāṇassa ādīnavaɱ abhiññāya||
evaɱ viññāṇassa nissaraṇaɱ abhiññāya||
viññāṇassa nibbidā virāgā nirodhāanupādā vimuttā,||
te suvimuttā,||
ye suvimuttā,||
te kevalino,||
ye kevalino,||
vaṭṭaɱ tesaɱ n'atthi paññāpanāya.|| ||

Evaɱ kho bhikkhave, bhikkhu sattaṭṭhānakusalo hoti.|| ||

 


 

Kathañ ca bhikkhave, bhikkhu tividhūpaparikkhī hoti?|| ||

Idha, bhikkhave, bhikkhu dhātuso upaparikkhati.|| ||

Āyatanaso upaparikkhati.|| ||

Paṭicca-samuppādaso upaparikkhati.|| ||

Evaɱ kho bhikkhave, bhikkhu tividhūpaparikkhī hoti|| ||

Sattaṭṭhānakusalo bhikkhave,||
bhikkhu tividhūpaparikkhī||
imasmiɱ dhamma vinaye kevalī vusitavā uttamapurisoti vuccatī" ti.|| ||

 


Contact:
E-mail
Copyright Statement   Webmaster's Page