Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.1. Upāya Vagga

Sutta 58

Sambuddha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[65]

[1][pts][than][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

"Tathāgato bhikkhave, arahaɱ Sammā-sambuddho rūpassa nibbidā virāgā nirodhā anupādā vimutto 'Sammā-sambuddhā'ti vuccati,||
bhikkhūpi bhikkhave,||
paññāvimutto rūpassa nibbidā virāgā nirodhā anupādā vimutto 'paññāvimutto'ti vuccati.|| ||

Tathāgato bhikkhave,||
arahaɱ Sammā-sambuddho vedanāya nibbidā virāgā nirodhā anupādā vimutto 'Sammā-sambuddhā'ti vuccati,||
bhikkhūpi bhikkhave,||
paññāvimutto vedanāya nibbidā virāgā nirodhā anupādā vimutto 'paññāvimutto'ti vuccati.|| ||

Tathāgato bhikkhave,||
arahaɱ Sammā-sambuddho saññāya nibbidā virāgā nirodhā anupādā vimutto 'Sammā-sambuddhā'ti vuccati,||
bhikkhūpi bhikkhave,||
paññāvimutto saññāya nibbidā virāgā [66] nirodhā anupādā vimutto 'paññāvimutto'ti vuccati.|| ||

Tathāgato bhikkhave,||
arahaɱ Sammā-sambuddho saɱkhārānaɱ nibbidā virāgā nirodhā anupādā vimutto 'Sammā-sambuddhā'ti vuccati,||
bhikkhūpi bhikkhave,||
paññāvimutto sankhārānaɱ nibbidā virāgā nirodhā anupādā vimutto 'paññāvimutto'ti vuccati.|| ||

Tathāgato bhikkhave,||
arahaɱ Sammā-sambuddho viññāṇassa nibbidā virāgā nirodhā anupādā vimutto 'Sammā-sambuddhā'ti vuccati,||
bhikkhūpi bhikkhave,||
paññāvimutto viññāṇassa nibbidā virāgā nirodhā anupādā vimutto 'paññāvimutto'ti vuccati.|| ||

Tatra, bhikkhave,||
ko viseso ko adhippāyo kiɱ nānākaraṇaɱ Tathāgatassa arahato Sammā-sambuddhassa paññāvimuttena bhikkhunāti?|| ||

Bhagavaɱmūlakā no bhantena,||
dhammā Bhagavaɱnettikā Bhagavaɱpaṭi saraṇā,||
sādhu vata bhante,||
Bhagavantaɱ yeva paṭibhātu etassa bhāsitassa attho,||
Bhagavato sutvā bhikkhū dhāressantī ti.|| ||

Tena hi bhikkhave, suṇātha,||
sādhukaɱ manasi karotha, bhāsissāmīti.|| ||

Evaɱ bhante'ti kho te bhikkhū Bhagavato paccassosuɱ.|| ||

Bhagavā etad avoca:|| ||

Tathāgato bhikkhave,||
arahaɱ Sammā-sambuddho anuppannassa maggassa uppādetā.|| ||

Asañjātassa maggassa sañjanetā.|| ||

Anakkhātassa maggassa akkhātā.|| ||

Maggaññu maggavidu maggakovido,||
maggānugā ca bhikkhave,||
etarahi sāvakā viharanti,||
pacchā samannāgatā.|| ||

Ayaɱ kho bhikkhave,||
viseso ayaɱ adhippāyo,||
idaɱ nānākaraṇaɱ Tathāgatassa arahato Sammā-sambuddhassa paññāvimuttena bhikkhunāti.|| ||

 


Contact:
E-mail
Copyright Statement   Webmaster's Page