Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.2. Arahatta Vagga

Sutta 65

Abhinandana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[75]

[1][pts][bodh]Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho aññataro bhikkhu yena Bhagavā ten'upasaɱkami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu Bhagavantaɱ etad avoca:|| ||

"Sādhu me bhante Bhagavā saɱkhittena dhammaɱ desetu,||
yamahaɱ Bhagavato dhammaɱ sutvā eko vūpakaṭṭho appamatto ātāpi pahitatto vihareyyan" ti.|| ||

"Abhinandamāno kho bhikkhu, baddho Mārassa,||
anabhinandamāno mutto pāpimato" ti.|| ||

Aññātaɱ Bhagavā!|| ||

Aññātaɱ sugatā!" ti.|| ||

"Yathā kathaɱ pana tvaɱ bhikkhu,||
mayā saɱkhittena bhāsitassa vitthārena atthaɱ ājānāsī" ti?|| ||

"Rūpaɱ kho bhante, abhinandamāno baddho Mārassa,||
anabhinandamāno mutto pāpimato.|| ||

Vedanaɱ abhinandamāno baddho Mārassa,||
anabhinandamāno mutto pāpimato.|| ||

Saññaɱ abhinandamāno baddho Mārassa,||
anabhinandamāno mutto pāpimato.|| ||

Saɱkhāra abhinandamāno baddho Mārassa,||
anabhinandamāno mutto pāpimato.|| ||

Viññāṇaɱ abhinandamāno baddho Mārassa,||
anabhinandamāno mutto pāpimato.|| ||

Imssa khvāhaɱ bhante, Bhagavatā||
saɱkhittena bhāsitassa evaɱ vitthārena atthaɱ ājānāmī" ti.|| ||

"Sādhu sādhu bhikkhu!|| ||

Sādhu kho tvaɱ bhikkhu,||
mayā saɱkhittena bhāsitassa vitthārena atthaɱ ājānāsi.|| ||

Rūpaɱ kho bhikkhu, abhinandamāno baddho Mārassa,||
anabhinandamāno mutto pāpimato.|| ||

Vedanaɱ abhinandamāno baddho Mārassa,||
anabhinandamāno mutto pāpimato.|| ||

Saññaɱ abhinandamāno baddho Mārassa,||
anabhinandamāno mutto pāpimato.|| ||

Saɱkhāre abhinandamāno baddho Mārassa,||
anabhinandamāno mutto pāpimato.|| ||

Viññāṇaɱ abhinandamāno baddho Mārassa,||
anabhinandamāno mutto pāpimato.|| ||

Imassa kho bhikkhu,||
mayā saŋkhittena bhāsitassa evaɱ vitthārena attho daṭṭhabbo" ti.|| ||

Atha kho so bhikkhu Bhagavato bhāsitaɱ abhinanditvā anumoditvā uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho so bhikkhu eko vūpakaṭṭho||
appamatto||
ātāpī||
pahitatto viharanto||
na cirass'eva yassatthāya kulaputtā samma-d-eva agārasmā anagāriyaɱ pabbajanti,||
tad anuttaraɱ brahmacariya pariyosānaɱ diṭṭh'evadhamme sayaɱ abhiññā sacchikatvā upasampajja vihāsi:|| ||

'Khīṇā jāti,||
vusitaɱ brahmacariyaɱ||
kataɱ karaṇīyaɱ||
nāparaɱ itthattāyā' ti abbhaññāsi.|| ||

Aññataro ca pana so bhikkhu arahataɱ ahosī" ti.|| ||

 


Contact:
E-mail
Copyright Statement   Webmaster's Page