Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.3. Khajjaniya Vagga

Sutta 76

Paṭhama Arahanta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[82]

[1][pts][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

"Rūpaɱ bhikkhave, aniccaɱ.|| ||

Yad aniccaɱ taɱ dukkhaɱ.|| ||

Yaɱ dukkhaɱ tadanattā.|| ||

Yadanattā taɱ|| ||

'N'etaɱ [83] mama,||
neso ham asmi,||
na meso attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Vedanā aniccā.|| ||

Yad aniccaɱ taɱ dukkhaɱ.|| ||

Yaɱ dukkhaɱ tadanattā.|| ||

Yadanattā taɱ|| ||

'N'etaɱ mama,||
neso ham asmi,||
na meso attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Saññā aniccā.|| ||

Yad aniccaɱ taɱ dukkhaɱ.|| ||

Yaɱ dukkhaɱ tadanattā.|| ||

Yadanattā taɱ|| ||

'N'etaɱ mama,||
neso ham asmi,||
na meso attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Saɱkhārā aniccā.|| ||

Yad aniccaɱ taɱ dukkhaɱ.|| ||

Yaɱ dukkhaɱ tadanattā.|| ||

Yadanattā taɱ|| ||

'N'etaɱ mama,||
neso ham asmi,||
na meso attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Viññāṇaɱ aniccaɱ.|| ||

Yad aniccaɱ taɱ dukkhaɱ.|| ||

Yaɱ dukkhaɱ tadanattā.|| ||

Yadanattā taɱ|| ||

'N'etaɱ mama,||
neso ham asmi,||
na meso attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

 


 

Evaɱ passaɱ bhikkhave,||
sutavā ariyasāvako rūpasmim pi nibbindati,||
vedanāya pi nibbindati,||
saññāya pi nibbindati,||
saɱkhāresu pi nibbindati,||
viññāṇasmim pi nibbindati.|| ||

Nibbindaɱ virajjatī,||
virāgā vimuccati.|| ||

Vimuttaɱ vimuttamiti ñāṇaɱ hoti:|| ||

'Khīṇā jāti||
vusitaɱ brahmacariyaɱ||
kataɱ karaṇīyaɱ||
nāparaɱ itthattāyā' ti pajānāti.|| ||

Yāvatā bhikkhave, sattāvāsā,||
yāvatā bhavaggaɱ,||
ete aggā ete seṭṭhā lokasmiɱ||
yad idaɱ arahanto" ti.|| ||

Idam avoca Bhagavā,||
idaɱ vatvā sugato athāparaɱ etad avoca satthā:|| ||

"Sukhino vata arahanto||
taṇhā tesaɱ na vijjati||
Asmimāno samucchinno||
mohajālaɱ padālitaɱ.|| ||

Anejato anuppattā||
cittaɱ tesaɱ anāvilaɱ||
Loke anupalittā te||
brahmabhūtā anāsavā.|| ||

Pañcakkhandhe pariññāya||
sattasaddhammagocarā||
Pāsaɱsiyā sappurisā||
puttā Buddhassa orasā.|| ||

Sattaratanasampannā||
tīsu sikkhāsu sikkhitā||
Anuvicaranti mahāvīrā||
pahīnabhayabheravā.|| ||

Dasahaŋgehi sampannā||
mahānāgā samāhitā||
Ete kho seṭṭhā lokasmiɱ||
taṇhā tesaɱ na vijjati.|| ||

Asekhañāṇaɱ uppannaɱ||
antimo yaɱ samussayo||
Yo sāro brahmacariyassa||
tasmiɱ aparapaccayā.|| ||

[84] Vidhāsu na vikampanti||
vippamuttā punabbhavā||
Dantabhumiɱ anuppattā||
te loke vijitāvino.|| ||

Uddhaɱ tiriyaɱ apācīnaɱ||
nandī tesaɱ na vijjati||
Nandanti te sīhanādaɱ||
Buddhā loke anuttarā" ti.|| ||

 


Contact:
E-mail
Copyright Statement   Webmaster's Page