Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
3. Khandha Vagga
22. Khandha Saɱyutta
8. Khajjaniya Vagga

Sutta 80

Piṇḍolya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[91]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sakkesu viharati Kapilavatthusmiɱ Nigrodhārāme.|| ||

Atha kho Bhagavā kismiñcid eva pakaraṇe bhikkhu-sanghaɱ paṇāmetvā pubbaṇha-samayaɱ nivāsetvā patta-cīvaram ādāya Kapilavatthuɱ piṇḍāya pāvisi.|| ||

Kapilavatthusmiɱ piṇḍāya caritvā pacchā-bhattaɱ piṇḍa-pāta paṭikkanto yena Mahāvanaɱ ten'upasankami divā-vihārāya,||
Mahāvanaɱ ajjhoga-hetvā veluvalaṭṭhikāya mūle divā-vihāraɱ nisīdi.|| ||

Atha kho Bhagavato raho-gatassa paṭisallīnassa evaɱ cetaso parivitakko udapādi:|| ||

"Mayā kho bhikkhu saɱgho pavāḷho.|| ||

Santettha bhikkhū navā acira-pabba-jitā adhunā-gatā imaɱ Dhamma-Vinayaɱ,||
tesaɱ mamaɱ apassantānaɱ||
siyā aññathattaɱ siyā vipariṇāmo.|| ||

Seyyathā pi nāma vacchassa taruṇassa mātaraɱ apassantassa||
siyā aññathattaɱ siyā vipariṇāmo.|| ||

Evam evaɱ santettha bhikkhū navā acira-pabba-jitā adhunā-gatā imaɱ Dhamma-Vinayaɱ||
tesaɱ mamaɱ apassantānaɱ||
siyā aññathattaɱ siyā vipariṇāmo|| ||

Seyyathā pi nāma bījānaɱ taruṇānaɱ udakaɱ alabhantānaɱ||
siyā aññathattaɱ siyā vipariṇāmo.|| ||

Evam etaɱ santettha bhikkhū navā acira-pabba-jitā adhunā-gatā imaɱ Dhamma-Vinayaɱ||
tesaɱ mamaɱ alabhantānaɱ dassanāya||
siyā aññathattaɱ siyā vipariṇāmo.|| ||

Yan nūnāhaɱ yath eva mayā pubbe bhikkhusaɱgho anuggahito,||
evam eva etarahi anuggaheyyaɱ bhikkhu-sanghan" ti?|| ||

Atha kho Brahmā Sahampati Bhagavato cetasā ceto-parivitakka-maññāya||
seyyathā pi nāma balavā puriso||
sammiñjitaɱ vā bāhaɱ pasāreyya pasāritaɱ vā bāhaɱ sammiñjeyya,||
evam evaɱ Brahmaloke antara-hito Bhagavato purato pātur ahosi.|| ||

[92] Atha kho Brahmā samampati ekaɱsaɱ uttarā-saŋgaɱ karitvā yena Bhagavā tenañjalim paṇāmetvā Bhagavantaɱ etad avoca:|| ||

"Evam etaɱ Bhagavā,||
evam etaɱ Sugata,||
Bhagavatā bhante,||
bhikkhu-saŋgho pavāḷho.|| ||

Santettha bhikkhū navā acira-pabba-jitā adhunā-gatā imaɱ Dhamma-Vinayaɱ,||
tesaɱ Bhagavantaɱ apassantānaɱ||
siyā aññathattaɱ siyā vipariṇāmo.|| ||

Seyyathā pi nāma vacchassa taruṇassa mātaraɱ apassantassa||
siyā aññathattaɱ siyā vipariṇāmo.|| ||

Evam eva santettha bhikkhū navā acira-pabba-jitā adhunā-gatā imaɱ Dhamma-Vinayaɱ,||
tesaɱ Bhagavantaɱ apassantānaɱ||
siyā aññathattaɱ siyā vipariṇāmo.|| ||

Seyyathā pi nāma bījānaɱ taruṇānaɱ udakaɱ alabhantānaɱ||
siyā aññathattaɱ siyā vipariṇāmo|| ||

Evam eva santettha bhikkhu navā acira-pabba-jitā adhunā-gatā imaɱ Dhamma-Vinayaɱ,||
tesaɱ Bhagavantaɱ alabhantānaɱ dassanāya||
siyā aññathattaɱ siyā vipariṇāmo.|| ||

Abhinandatu bhante,||
Bhagavā bhikkhu-sanghaɱ abhivadatu bhante,||
Bhagavā bhikkhu-sanghaɱ.|| ||

Yatheva bhante,||
Bhagavatā pubbe bhikkhu-saŋgho anuggahito,||
evam evaɱ etarahi anuggaṇhātu bhikkhu-sanghan" ti.|| ||

Adhivāsesi Bhagavā tuṇhī-bhāvena.|| ||

Atha kho Brahmā Sahampati Bhagavato adhivāsanaɱ viditvā Bhagavantaɱ abhivādetvā padakkhiṇaɱ katvā tatth'evantara-dhāyi.|| ||

Atha kho Bhagavā sāyaṇha-samayaɱ paṭisallāṇā vuṭṭhito yena nigrodhārāmo ten'upasankami.|| ||

Upasaŋkamitvā paññatte āsane nisīdi.|| ||

Nisajja kho Bhagavā tathā-rūpaɱ iddhā-bhisankhāraɱ abhisaɱkhāsi yathā te bhikkhū ekadvīhikāya sārajjamānarūpā yena Bhagavā ten'upasankameyyuɱ.|| ||

"Te pi bhikkhū ekadvihikāya sārajjamānurūpā yena [93] Bhagavā ten'upasankamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu,||
eka-m-antaɱ nisinno kho te bhikkhu Bhagavā etad avoca:|| ||

"Antamidaɱ bhikkhave,||
jīvikānaɱ yad idaɱ piṇḍolyaɱ.|| ||

Abhisāpoyaɱ lokasmiɱ||
'piṇḍolo vicarasi pattapāṇī' ti.|| ||

Taɱ ca kho evaɱ bhikkhave kula-puttā upenti atthavasikā attha-vasaɱ paṭicca,||
n'eva rājābhinītā na corābhinītā||
na iṇaṭṭā||
na bhayaṭṭā||
na ājivikāpakatā.|| ||

Api ca kho otiṇṇamhā jātiyā jarāya maraṇena sokehi paridevehi dukkhehi domanassehi upāyāsehi dukkh'otiṇṇā dukkha-paretā app'eva nāma imassa kevalassa dukkha-k-khandhassa antakiriyā paññāyethā' ti.|| ||

Evaɱ pabba-jito cāyaɱ bhikkhave,||
kula-putto so ca hoti abhijjhālū kāmesu tibbasārāgo vyāpanna-citto paduṭṭhamanasaɱkappo muṭṭha-s-sati asampajāno asamāhito vibbhanta-citto pākat'indriyo.|| ||

Seyyathā pi bhikkhave,||
chavālātaɱ ubhato padittaɱ majjhe gūthagataɱ n'eva gāme kaṭṭhatthaɱ pharati,||
nāraññe kaṭṭhatthaɱ pharati,||
tath'ūpamāhaɱ bhikkhave,||
imaɱ puggalaɱ vadāmi gihībhogā ca parihīno sāmaññ'atthañ ca na paripūreti.|| ||

Tayo me bhikkhave, akusala-vitakkā.|| ||

Kāma-vitakko||
vyāpāda-vitakko||
vihiɱsā-vitakko.|| ||

Ime ca kho bhikkhave,||
tayo akusala citakkā taɱ kva aparisesā nirujjhanti:||
catusu vā sati-paṭṭhānesu||
supatiṭṭhita-cittassa viharato animittaɱ vā samādhiɱ bhāvayato.|| ||

Yāvañ c'idaɱ bhikkhave alam eva animitto samādhi bhāvetuɱ animitto bhikkhave,||
samādhi bhāvito bahulī-kato||
maha-p-phalo hoti mahā-nisaɱso.|| ||

Dvemā bhikkhave,||
diṭṭhiyo bhavadiṭṭhi ca vibhavadiṭṭhi ca [94] tatra bhikkhave,||
sutavā ariya-sāvako iti paṭisañcikkhati:|| ||

'Atthi nu kho taɱ kiñci lokasmiɱ yamahaɱ upādiyamāno na vajjavā assan' ti.|| ||

So evaɱ pajānāti:|| ||

'N'atthi nu kho taɱ kiñci lokasmiɱ yamahaɱ upādiyamāno na vajjavā assaɱ.|| ||

Ahaɱ ca rūpaɱ yeva upādiyamāno upādiyeyyaɱ,||
vedanaɱ yeva upādiyamāno upādiyeyyaɱ,||
saññaɱ yeva upādiyamāno upādiyeyyaɱ||
sankhāreyeva upādiyamāno upādiyeyyaɱ||
viññāṇaɱ yeva upādiyamāno upādiyeyyaɱ.|| ||

Tassa me assa upādāna-paccayā bhavo,||
bhava-paccayā jāti,||
jāti-paccayā jarā-maraṇaɱ soka-parideva-dukkha-domanass' - upāyāsā sambhaveyyuɱ.|| ||

Evam etassa kevalassa dukkha-k-khandhassa samudayo assa.|| ||

 


 

"Taɱ kiɱ maññatha bhikkhave?|| ||

Rūpaɱ niccaɱ vā aniccaɱ vā" ti?|| ||

"Aniccaɱ bhante."|| ||

"Yam pan-ā-niccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yam pan-ā-niccaɱ dukkhaɱ||
vipari-ṇāma-dhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attāti'?"|| ||

"No h'etaɱ bhante."|| ||

Vedanā niccaɱ vā aniccaɱ vā" ti?|| ||

"Aniccaɱ bhante."|| ||

"Yam pan-ā-niccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yam pan-ā-niccaɱ dukkhaɱ||
vipari-ṇāma-dhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attāti'?"|| ||

"No h'etaɱ bhante."|| ||

Saññā niccaɱ vā aniccaɱ vā" ti?|| ||

"Aniccaɱ bhante."|| ||

"Yam pan-ā-niccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yam pan-ā-niccaɱ dukkhaɱ||
vipari-ṇāma-dhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attāti'?"|| ||

"No h'etaɱ bhante."|| ||

Sankhārā niccaɱ vā aniccaɱ vā" ti?|| ||

"Aniccaɱ bhante."|| ||

"Yam pan-ā-niccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yam pan-ā-niccaɱ dukkhaɱ||
vipari-ṇāma-dhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attāti'?"|| ||

"No h'etaɱ bhante."|| ||

Viññāṇaɱ niccaɱ vā aniccaɱ vā" ti?|| ||

"Aniccaɱ bhante."|| ||

"Yam pan-ā-niccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yam pan-ā-niccaɱ dukkhaɱ||
vipari-ṇāma-dhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attāti'?"|| ||

"No h'etaɱ bhante."|| ||

Tasmā ti ha bhikkhave,||
yaɱ kiñci rūpaɱ atīt-ā-nāgata-pacc'uppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ rūpaɱ||
'n'etaɱ mama,||
neso ham asmi,||
na me so attā' ti.|| ||

Evam etaɱ yathā-bhūtaɱ samma-p-paññāya daṭṭhabbaɱ.|| ||

Yā kāci vedanā atīt-ā-nāgata-pacc'uppannaɱ ajjhattaɱ vā bahiddhā vā olārikaɱ vā sukhumaɱ vā hīnaɱ paṇītaɱ vā yaɱ dūre santike vā sabbaɱ vedanaɱ||
'n'etaɱ mama,||
neso ham asmi,||
na me so attā' ti.|| ||

Evam etaɱ yathā-bhūtaɱ samma-p-paññāya daṭṭhabbaɱ.|| ||

Yā kāci saññā atīt-ā-nāgata-pacc'uppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ saññā||
'n'etaɱ mama,||
neso ham asmi,||
na me so attā' ti.|| ||

Evam etaɱ yathā-bhūtaɱ samma-p-paññāya daṭṭhabbaɱ.|| ||

Yā kāci sankhārā atīt-ā-nāgata-pacc'uppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ sankhārā||
'n'etaɱ mama,||
neso ham asmi,||
na me so attā' ti.|| ||

Evam etaɱ yathā-bhūtaɱ samma-p-paññāya daṭṭhabbaɱ.|| ||

Yā kāci viññāṇaɱ atīt-ā-nāgata-pacc'uppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ viññāṇaɱ||
'n'etaɱ mama,||
neso ham asmi,||
na me so attā' ti.|| ||

Evam etaɱ yathā-bhūtaɱ samma-p-paññāya daṭṭhabbaɱ.|| ||

Evaɱ passaɱ bhikkhave,||
sutavā ariya-sāvako rūpasmim pi nibbindati||
vedanāya pi nibbindati||
saññāya pi nibbindati||
sankhāresu pi nibbindati||
viññāṇasmim pi nibbindati,||
nibbindaɱ virajjati||
virāgā vimuccati||
vimuttasmiɱ vimuttamiti||
ñāṇaɱ hoti:|| ||

'Khīṇā jāti||
vusitaɱ Brahma-cariyaɱ||
kataɱ karaṇīyaɱ||
nāparaɱ itthattāyā' ti pajānātī" ti.|| ||

 


Contact:
E-mail
Copyright Statement