Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
3. Khandha Vagga
22. Khandha Saɱyutta
8. Khajjaniya Vagga

Sutta 81

Pārileyyaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[94]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Kosambīyaɱ viharati Ghositārāme.|| ||

Atha kho Bhagavā pubbaṇha-samayaɱ nivāsetvā,||
patta-cīvaraɱ ādāya Kosambīyaɱ piṇḍāya pāvisi.|| ||

Kosambīyaɱ piṇḍāya caritvā pacchā-bhattaɱ piṇḍa-pāta-paṭikkanto sāmaɱ [95] senāsaɱ saɱsāmetvā patta-cīvaraɱ ādāya anāmantetvā upaṭṭhāke anapaloketvā bhikkhu-sanghaɱ eko adutiyo cārikaɱ pakkāmi.|| ||

Atha kho aññataro bhikkhu acira-pakkantassa Bhagavato yen'āyasmā Ānando ten'upasankami.|| ||

Upasaŋkamitvā āyasmantaɱ Ānandaɱ etad avoca:|| ||

"Ehā'vuso Ānanda, Bhagavā sāmaɱ sen'āsanaɱ saɱsāmetvā pattacivaramādāya anāmantetvā upaṭṭhāke anapaloketvā bhikkhu-sanghaɱ eko adutiyo cārikaɱ pakkanto" ti.|| ||

"Yasmiɱ āvuso samaye Bhagavā sāmaɱ sen'āsanaɱ saɱsāmetvā patta-cīvaraɱ ādāya anāmantetvā upaṭṭhāke anapaloketvā bhikkhu-sanghaɱ eko adutiyo cārikaɱ pakkamati eko va Bhagavā tasmiɱ samaye viharitukāmo hoti.|| ||

Na Bhagavā tasmiɱ samaye kenaci anubandhitabbo hotī" ti.|| ||

Atha kho Bhagavā anupubbena cārikaɱ cara-māno yena Pārileyyakaɱ tad avasari.|| ||

Tatra sudaɱ Bhagavā Pārileyyake viharati bhadda-sāla-mūle atha kho sambahulā bhikkhu yen'āyasmā Ānando ten'upasankamiɱsu.|| ||

Upasaɱkamitvā āyasmatā Ānandena saddhiɱ sammodiɱsu.|| ||

Sammodanīyaɱ kathaɱ sārāṇiyaɱ vīti-sāretvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū āyasmantaɱ Ānandaɱ etad avocuɱ:|| ||

"Cira-s-sutā kho no āvuso Ānanda Bhagavato sammukhā dhammīkathā icchāma mayaɱ āvuso Ānanda,||
Bhagavato sammukhā dhammiɱ kathaɱ sotun" ti.|| ||

Atha kho āyasmā Ānando tehi bhikkhūhi saddhiɱ yena Pārileyyakaɱ bhaddasālamūlaɱ yena Bhagavā ten'upasankami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinne kho te bhikkhū Bhagavā dhammiyā kathāya sandassesi||
samādapesi||
samuttejasi||
sampahaɱsesi.|| ||

[96] Tena kho pana samayena aññatarassa bhikkhuno evaɱ cetaso parivitakko udapādi:|| ||

"Kathaɱ nu kho jānato||
kathaɱ passato||
anantarā āsavānaɱ khayo hotī" ti?|| ||

Atha kho Bhagavā tassa bhikkhuno cetasā ceto-parivitakkam-aññāya bhikkhū āmantesi:|| ||

"Vicayaso desito bhikkhave, mayā dhammo:|| ||

Vicayaso desitā cattāro sati-paṭṭhānā.|| ||

Vicayaso desitā cattāro samma-p-padhānā.|| ||

Vicayaso desitā cattāro iddhi-pādā.|| ||

Vicayaso desitāni pañc'indriyāni.|| ||

Vicayaso desitāni pañca-balāni.|| ||

Vīcayaso desitā satta-bojjh-a-ŋgā.|| ||

Vicayaso desito Ariyo Aṭṭhaŋgiko Maggo.|| ||

Evaɱ vicayaso kho desito bhikkhave, mayā dhammo.|| ||

Evaɱ vicayaso desite kho bhikkhave, mayā dhamme||
atha ca panidh'ekaccassa bhikkhuno evaɱ cetaso parivitakko udapādi:|| ||

'Kathaɱ nu kho jānato||
kathaɱ passato||
anantarā āsavānaɱ khayo hotī' ti?|| ||

Kathaɱ ca bhikkhave, jānato||
kathaɱ passato||
anantarā āsavānaɱ khayo hoti?|| ||

Idha bhikkhave, a-s-sutavā puthujjano||
ariyānaɱ adassāvī||
ariya-Dhammassa akovido||
ariya-Dhamme avinīto||
sappurisānaɱ adassāvī||
sappurisa-Dhammassa akovido||
sappurisa-Dhamme avinīto,||
rūpaɱ attato samanupassati||
yā kho pana sā bhikkhave, samanupassanā sankhāro so.|| ||

So pana sankhāro||
kiɱ nidāno||
kiɱ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so sankhāro.|| ||

Iti kho bhikkhave,||
so pi kho sankhāro anicco saŋkhato paṭicca-samuppanno,||
sā pi taṇhā aniccā saŋkhatā paṭicca-samuppannā,||
sā pi vedanā aniccā saŋkhatā paṭicca-samuppannā||
so pi phasso anicco saŋkhato paṭicca-samuppanno||
sā pi avijjā aniccā saŋkhatā paṭicca-samuppannā.|| ||

[97] Evam pi kho bhikkhave, jānato||
evaɱ passato anantarā āsavānaɱ khayo hoti.|| ||

Na heva kho rūpaɱ attato samanupassati||
api ca kho rūpa-vantaɱ attānaɱ samanupassati.|| ||

Yā kho pana sā bhikkhave,||
samanupassanā sankhāro so.|| ||

So pana sankhāro||
kiɱ nidāno||
kiɱ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so sankhāro.|| ||

Iti kho bhikkhave,||
so pi kho sankhāro anicco saŋkhato paṭicca-samuppanno,||
sā pi taṇhā aniccā saŋkhatā paṭicca-samuppannā,||
sā pi vedanā aniccā saŋkhatā paṭicca-samuppannā||
so pi phasso anicco saŋkhato paṭicca-samuppanno||
sā pi avijjā aniccā saŋkhatā paṭicca-samuppannā.|| ||

Evam pi kho bhikkhave, jānato||
evaɱ passato anantarā āsavānaɱ khayo hoti.|| ||

Na heva kho rūpaɱ attato samanupassati,||
na rūpa-vantaɱ attānaɱ samanupassati.|| ||

Api ca kho attani rūpaɱ samanupassati.|| ||

Yā kho pana sā bhikkhave,||
samanupassanā sankhāro so.|| ||

So pana sankhāro||
kiɱ nidāno||
kiɱ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so sankhāro.|| ||

Iti kho bhikkhave,||
so pi kho sankhāro anicco saŋkhato paṭicca-samuppanno,||
sā pi [98] taṇhā aniccā saŋkhatā paṭicca-samuppannā,||
sā pi vedanā aniccā saŋkhatā paṭicca-samuppannā||
so pi phasso anicco saŋkhato paṭicca-samuppanno||
sā pi avijjā aniccā saŋkhatā paṭicca-samuppannā.|| ||

Evam pi kho bhikkhave, jānato||
evaɱ passato anantarā āsavānaɱ khayo hoti.|| ||

Na heva kho rūpaɱ attato samanupassati,||
na rūpa-vantaɱ attānaɱ samanupassati,||
na attani rūpaɱ samanupassati.|| ||

Api ca kho rūpasmiɱ attānaɱ samanupassati.|| ||

Yā kho pana sā bhikkhave,||
samanupassanā sankhāro so.|| ||

So pana sankhāro||
kiɱ nidāno||
kiɱ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so sankhāro.|| ||

Iti kho bhikkhave,||
so pi kho sankhāro anicco saŋkhato paṭicca-samuppanno,||
sā pi taṇhā aniccā saŋkhatā paṭicca-samuppannā,||
sā pi vedanā aniccā saŋkhatā paṭicca-samuppannā||
so pi phasso anicco saŋkhato paṭicca-samuppanno||
sā pi avijjā aniccā saŋkhatā paṭicca-samuppannā.|| ||

Evam pi kho bhikkhave, jānato||
evaɱ passato anantarā āsavānaɱ khayo hoti.|| ||

Na heva kho rūpaɱ attato samanupassati||
na rūpa-vantaɱ attānaɱ samanupassati||
na attani rūpaɱ samanupassati||
na rūpasmiɱ attānaɱ samanupassati.|| ||

Api ca kho [99] vedanaɱ attato samanupassati||
api ca kho vedanā-vantaɱ attānaɱ samanupassati||
api ca kho attani vedanaɱ samanupassati||
api ca kho vedanāya attānaɱ samanupassati.|| ||

Api ca kho saññaɱ attato samanupassati||
api ca kho saññā-vantaɱ attānaɱ samanupassati||
api ca kho attani saññaɱ samanupassati||
api ca kho saññāya attānaɱ samanupassati.|| ||

Api ca kho sankhāre attato samanupassati||
api ca sankhāra-vantaɱ attānaɱ samanupassati||
api ca kho attani sankhāre samanupassati||
na sankhāresu attānaɱ samanupassati

Api ca kho viññāṇaɱ attato samanupassati||
api ca kho viññāṇa-vantaɱ attānaɱ samanupassati||
api ca kho attani viññāṇaɱ samanupassati||
api ca kho viññāṇasmiɱ attānaɱ samanupassati.|| ||

Yā kho pana sā bhikkhave samanupassanā, sankhāro so.

So pana sankhāro kiɱ nidāno||
kiɱ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so sankhāro.|| ||

Iti kho bhikkhave,||
so pi kho sankhāro anicco saŋkhato paṭicca-samuppanno,||
sā pi taṇhā aniccā saŋkhatā paṭicca-samuppannā,||
sā pi vedanā aniccā saŋkhatā paṭicca-samuppannā||
so pi phasso anicco saŋkhato paṭicca-samuppanno||
sā pi avijjā aniccā saŋkhatā paṭicca-samuppannā.|| ||

Evam pi kho bhikkhave, jānato||
evaɱ passato anantarā āsavānaɱ khayo hoti.|| ||

Na heva kho rūpaɱ attato samanupassati||
na rūpa-vantaɱ attānaɱ samanupassati||
na attani rūpaɱ samanupassati||
na rūpasmiɱ attānaɱ samanupassati.|| ||

Na vedanaɱ attato samanupassati||
na vedanā-vantaɱ attānaɱ samanupassati||
na attani vedanaɱ samanupassati||
na vedanāya attānaɱ samanupassati.|| ||

Na saññaɱ attato samanupassati||
na saññā-vantaɱ attānaɱ samanupassati||
na attani saññaɱ samanupassati||
na saññāya attānaɱ samanupassa ti.|| ||

Na sankhāre attato samanupassati||
na sankhāra-vantaɱ attānaɱ samanupassati||
na attani sankhāre samanupassati||
na sankhāresu attānaɱ samanupassati.|| ||

Na viññāṇaɱ attato samanupassati||
na viññāṇa-vantaɱ attānaɱ samanupassati||
na attani viññāṇaɱ samanupassati||
na viññāṇasmiɱ attānaɱ samanupassati.|| ||

Api ca kho evaɱ diṭṭhi hoti:|| ||

"So attā so loko so pecca bhavissāmi nicco dhuvo sassato avipariṇāma-dhammo" ti.|| ||

Yā kho pana sā bhikkhave,||
sassatadiṭṭhi sankhāro so.

So pana sankhāro||
kiɱ nidāno||
kiɱ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so sankhāro.|| ||

Iti kho bhikkhave,||
so pi kho sankhāro anicco saŋkhato paṭicca-samuppanno,||
sā pi taṇhā aniccā saŋkhatā paṭicca-samuppannā,||
sā pi vedanā aniccā saŋkhatā paṭicca-samuppannā||
so pi phasso anicco saŋkhato paṭicca-samuppanno||
sā pi avijjā aniccā saŋkhatā paṭicca-samuppannā.|| ||

Evam pi kho bhikkhave, jānato||
evaɱ passato anantarā āsavānaɱ khayo hoti.|| ||

Na heva kho rūpaɱ attato samanupassati||
na rūpa-vantaɱ attānaɱ samanupassati||
na attani rūpaɱ samanupassati||
na rūpasmiɱ attānaɱ samanupassati.|| ||

Na vedanaɱ attato samanupassati||
na vedanaɱ attato samanupassati vedanā-vantaɱ attānaɱ samanupassati||
na attani vedanaɱ samanupassati||
na vedanāya attānaɱ samanupassatī.|| ||

Na saññaɱ attato samanupassati||
na saññā-vantaɱ attānaɱ samanupassati||
na attani saññaɱ samanupassati||
na saññāya attānaɱ samanupassati.|| ||

Na sankhāre attato samanupassati||
na sankhāra-vantaɱ attānaɱ samanupassati||
na attani sankhare samanupassati||
na sankhāresu attānaɱ samanupassati.|| ||

Na viññāṇaɱ attato samanupassati||
na viññāṇa-vantaɱ attānaɱ samanupassati||
na attani viññāṇaɱ samanupassati||
na viññāṇasmiɱ attānaɱ samanupassati.|| ||

Nā pi evaɱ diṭṭhi hoti:|| ||

'So attā so loko so pecca bhavissāmi nicco dhuvo sassato avipariṇāma-dhammo' ti.|| ||

Api ca kho evaɱ diṭṭhi hoti:|| ||

'No c'assaɱ no ca me siyā||
na bhavissāmi' na me bhavissati' ti.|| ||

Yā kho pana sā bhikkhave, ucchedadiṭṭhi sankhāro so.|| ||

So pana sankhāro||
kiɱ nidāno||
kiɱ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so sankhāro.|| ||

Iti kho bhikkhave,||
so pi kho sankhāro anicco saŋkhato paṭicca-samuppanno,||
sā pi taṇhā aniccā saŋkhatā paṭicca-samuppannā,||
sā pi vedanā aniccā saŋkhatā paṭicca-samuppannā||
so pi phasso anicco saŋkhato paṭicca-samuppanno||
sā pi avijjā aniccā saŋkhatā paṭicca-samuppannā.|| ||

Evam pi kho bhikkhave, jānato||
evaɱ passato anantarā āsavānaɱ khayo hoti.|| ||

Na heva kho rūpaɱ attato samanupassati||
na rūpa-vantaɱ attānaɱ samanupassati||
na attani rūpaɱ samanupassati||
na rūpasmiɱ attānaɱ samanupassati.|| ||

Na vedanaɱ attato samanupassati||
na vedanā-vantaɱ attānaɱ samanupassti||
na attani vedanaɱ samanupassati||
na vedanāya attānaɱ samanupassati.|| ||

Na saññaɱ attato samanupassati||
na saññā-vantaɱ attānaɱ samanupassati||
na attani saññaɱ samanupassati||
na saññāya attānaɱ samanupassati.|| ||

Na sankhāre samanupassati||
na sankhāra-vantaɱ attānaɱ samanupassati||
na attani sankhāre samanupassati||
na sankhāresu attānaɱ samanupassati.|| ||

Na viññāṇaɱ attato samanupassati||
na viññāṇa-vantaɱ attānaɱ samanupassati||
na attani viññāṇaɱ samanupassati||
na viññāṇasmiɱ attānaɱ samanupassati.|| ||

Nā'pi evaɱ diṭṭhi hoti:|| ||

'So attā so loko so pecca bhavissāmi nicco dhuvo sassato avipariṇāma-dhammo' ti.|| ||

Nā pi evaɱ diṭṭhi hoti:|| ||

'No c'assaɱ no ca me siyā||
na bhavissāmi- na me bhavissatī' ti.|| ||

Api ca kho|| ||

'Kaŋkhī hoti vecikicchī aniṭṭhaŋ-gato Sad'Dhamme.'|| ||

Yā kho pana sā bhikkhave,||
kaɱkhitā vecikicchitā aniṭṭhaŋ-gatatā Sad'Dhamme,||
sankhāro so.|| ||

So pana sankhāro||
kiɱ nidāno||
kiɱ samudayo||
kiñ jātiko||
kim pabhavoti|| ||

Avijjā-samphassajena bhikkhave,||
vedayitena phuṭṭhassa a-s-sutavato puthu-j-janassa uppannā taṇhā||
tatojo so sankhāro.|| ||

Iti kho bhikkhave,||
so pi kho sankhāro anicco saŋkhato paṭicca-samuppanno,||
sā pi taṇhā aniccā saŋkhatā paṭicca-samuppannā,||
sā pi vedanā aniccā saŋkhatā paṭicca-samuppannā||
so pi phasso anicco saŋkhato paṭicca-samuppanno||
sā pi avijjā aniccā saŋkhatā paṭicca-samuppannā.|| ||

Evam pi kho bhikkhave, jānato||
evaɱ passato anantarā āsavānaɱ khayo hotī" ti.|| ||

 


Contact:
E-mail
Copyright Statement