Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.3. Khajjaniya Vagga

Sutta 82

Puṇṇamā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[100]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Pubbārāme Migāramātu pāsāde mahatā bhikkhusaɱghena saddhiɱ.|| ||

Tena kho pana samayena Bhagavā tadahuposathe paṇṇarase puṇṇāya puṇṇamāya rattiyā bhikkhusaɱghaparivuto ajjhokāse nisinno hoti.|| ||

Atha kho aññataro bhikkhu uṭṭhāy āsanā ekaɱsaɱ uttarāsaŋgaɱ karitvā yena Bhagavā tenañjaliɱ panāmetvā Bhagavantaɱ etad avoca:|| ||

"Puccheyyāhaɱ bhante.|| ||

Bhagavantaɱ kiñci'd'eva desaɱ.|| ||

Sace me Bhagavā okāsaɱ karoti pañhassa veyyākaraṇāyāti."|| ||

"Tena hi tvaɱ bhikkhu, sake āsane nisīditvā puccha yadākaŋkhasī" ti.|| ||

"Evaɱ bhante" te kho so bhikkhu Bhagavato paṭissutvā sake āsane nisīditvā Bhagavantaɱ etad avoca:|| ||

"Ime nu kho bhante, pañc-upādāna-kkhandhā, seyyathīdaɱ:|| ||

Rūpūpādānakkhandho,||
vedanūpādānakkhandho,||
saññūpādānakkhandho,||
saɱkhārūpādānakkhandho,||
viññāṇūpādānakkhandho" ti.|| ||

"Ime kho bhikkhu, pañc-upādāna-kkhandhā:|| ||

Rūpūpādānakkhandho,||
vedanūpādānakkhandho,||
saññūpādānakkhandho,||
saɱkhārūpādānakkhandho,||
viññāṇūpādānakkhandho" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Ime kho pana bhante, pañc-upādāna-kkhandhā kimmūlakā" ti?|| ||

"Ime kho bhikkhu, pañc-upādāna-kkhandhā chandamulakā" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Taɱ yeva nu kho bhante,||
upādānaɱ te pañc-upādāna-kkhandhā udāhu||
aññatra pañc-upādāna-kkhandhehi upādānan" ti?|| ||

"Na kho bhikkhu,||
taɱ yeva upādānaɱ te pañc-upādāna-kkhandhā [101]||
na pi aññatra pañc-upādāna-kkhandhehi upādānaɱ,||
api ca yo tattha chanda-rāgo taɱ tattha upādānan" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Siyā pana bhante,||
pañc-upādāna-kkhandhesu chanda-rāga-vemattatā" ti?|| ||

"Siyā bhikkhū" ti Bhagavā avoca.|| ||

"Idha bhikkhu ekaccassa evaɱ hoti:|| ||

Evaɱ rūpo siyaɱ anāgatam addhānaɱ,||
evaɱ vedano siyaɱ anāgatam addhānaɱ,||
evaɱ sañño siyaɱ anāgatam addhānaɱ,||
evaɱ saɱkhāro siyaɱ anāgatam addhānaɱ,||
evaɱ viññāṇo siyaɱ anāgatam addhānanti.|| ||

Evaɱ kho bhikkhu siyā pañc-upādāna-kkhandhesu chanda-rāga-vemattatā" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Kittāvatā nu kho bhante,||
khandhānaɱ khandhādhivacanan" ti?|| ||

"Yaɱ kiñci bhikkhu rūpaɱ atīnānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
ayaɱ vuccati rūpa-kkhandho.|| ||

Yā kāci vedanā atīnānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
ayaɱ vuccati vedanakkhandho.|| ||

Yā kāci saññā atīnānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
ayaɱ vuccati saññākkhandho.|| ||

Yā kāci saɱkhārā atīnānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
ayaɱ vuccati sankhārakkhandho.|| ||

Yaɱ kiñci viññāṇaɱ atīnānāgatapaccuppannaɱ ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
ayaɱ vuccati viññāṇakkhandho.|| ||

Ettāvatā kho bhikkhu, khandhānaɱ khandhādhivacanan" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Ko nu kho bhante,||
hetu ko paccayo||
rūpa-kkhandhassa paññāpanāya?|| ||

Ko hetu||
ko paccayo||
vedanā-kkhandhassa paññāpanāya?|| ||

Ko hetu||
ko paccayo||
saññā-kkhandhassa paññāpanāya?|| ||

Ko hetu||
ko paccayo||
sankhāra-kkhandhassa paññāpanāya?|| ||

Ko hetu||
ko paccayo||
viññāṇa-kkhandhassa paññāpanāyā" ti?|| ||

Cattāro kho bhikkhu, mahābhūtā||
hetu cattāro||
mahābhūtā paccayo||
rūpa-kkhandhassa paññāpanāya.|| ||

Phasso hetu||
phasso paccayo||
vedanā-kkhandhassa paññāpanāya.|| ||

Phasso hetu||
phasso paccayo||
saññā-kkhandhassa paññāpanāya.|| ||

[102] Phasso hetu||
phasso paccayo||
saɱkhāra-kkhandhassa paññāpanāya.|| ||

Nāma-rūpaɱ hetu||
nāma-rūpaɱ paccayo||
viññāṇa-kkhandhassa paññāpanāyā" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Kathaɱ nu kho bhante,||
sakkāya-diṭṭhi hotī" ti?|| ||

"Idha bhikkhu, assutavā puthujjano||
ariyānaɱ adassāvī||
ariya-Dhammassa akovido||
ariya-Dhamme avinīto||
sappurisānaɱ adassāvī||
sappurisa-Dhammassa||
akovido sasappurisa dhamme avinīto|| ||

rūpaɱ attato samanupassati||
rūpa vantaɱ vā attānaɱ samanupassati||
attani vā rūpaɱ samanupassati||
rūpasmiɱ vā attānaɱ samanupassati;|| ||

vedanaɱ attato samanupassati||
vedanā vantaɱ vā attānaɱ samanupassati||
attani vā vedanaɱ samanupassati||
vedanāya vā attānaɱ samanupassati;|| ||

saññaɱ atkato samanupassati||
saññā vantaɱ vā attānaɱ samanupassati||
attani vā saññaɱ samanupassati||
saññāya vā attānaɱ samanupassati;|| ||

saɱkhāre attato samanupassati||
saɱkhāre vantaɱ vā attānaɱ samanupassati||
attani vā saɱkhāra samanupassati||
saɱkhārāṇasmīɱ vā attānaɱ samanupassati;|| ||

viññāṇaɱ attato samanupassati||
viññāṇa vantaɱ vā attānaɱ samanupassati||
attani vā viññāṇaɱ samanupassati||
viññāsmiɱ vā attānaɱ samanupassati.|| ||

Evaɱ kho bhikkhu, sakkāyadiṭṭhi hotī" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Kathaɱ pana bhante, sakkāyadiṭṭhi na hotī" ti?|| ||

"Idha bhikkhu Sutavā ariyasāvako||
ariyānaɱ dassāvī||
ariya-Dhammassa kovido||
ariya-Dhamme suvinīto||
sappurisānaɱ dassāvī||
sappurisa-Dhammassa kovido||
sappurisa-Dhamme suvinīto||
na rūpaɱ attato samanupassati||
na rūpavantaɱ vā attānaɱ samanupassati||
na attani vā rūpaɱ samanupassati||
na rūpasmīɱ vā attānaɱ samanupassati.|| ||

Na vedanaɱ attato samanupassati||
na vedanāvantaɱ vā attānaɱ samanupassati||
na attani vā vedanaɱ samanupassati||
na vedanāya vā attānaɱ samanupassati;|| ||

na saññaɱ attato samanupassati||
na saññāvantaɱ vā attānaɱ samanupassati||
na attani vā saññaɱ samanupassati||
na saññāya vā attānaɱ samanupassati;|| ||

na saɱkhāre attato samanupassati||
na saɱkhārāvantaɱ vā attānaɱ samanupassati||
na attani vā saɱkhāre samanupassati||
na saɱkhārasmiɱ vā attānaɱ samanupassati;|| ||

na viññāṇaɱ attato samanupassati||
na viññāṇavantaɱ vā attānaɱ samanupassati||
na attani vā viññāṇaɱ samanupassati||
na viññāṇasmiɱ vā attānaɱ samanupassati.|| ||

Evaɱ kho bhikkhu sakkāyadiṭṭhi na hotī" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Ko nu kho bhante, rūpassa assādo,||
ko ādīnavo,||
kiɱ nissaraṇaɱ,|| ||

ko vedanā assādo,||
ko ādīnavo,||
kiɱ nissaraṇaɱ,|| ||

ko saññāya assādo,||
ko ādīnavo,||
kiɱ nissaraṇaɱ,|| ||

ko saɱkhārānaɱ assādo,||
ko ādīnavo,||
kiɱ nissaraṇaɱ,|| ||

ko viññāṇassa assādo,||
ko ādīnavo,||
kiɱ nissaraṇan" ti?|| ||

"Yaɱ kho bhikkhu, rūpaɱ paṭicca upajjati sukhaɱ somanassaɱ,||
ayaɱ rūpassa assādo.|| ||

Yaɱ rūpaɱ aniccaɱ dukkhaɱ vipariṇāmadhammaɱ,||
ayaɱ rūpassa ādīnavo.|| ||

Yo rūpasmiɱ chandarāgavinayo chandarāgappahānaɱ,||
idaɱ rūpassa nissaraṇaɱ.|| ||

Yaɱ vedanaɱ paṭicca uppajjati sukhaɱ somanassaɱ,||
ayaɱ vedanāya assādo.|| ||

Yā vedanā aniccā dukkhā vipariṇāma-dhammā,||
ayaɱ vedanāya ādīnavo.|| ||

Yo vedanāya chandarāga vinayo chandarāgappahānaɱ,||
idaɱ vedanāya nissaraṇaɱ.|| ||

Yaɱ [103] saññaɱ paṭicca uppajjati sukhaɱ somanassaɱ,||
ayaɱ saññāya assādo.|| ||

Yaɱ saññaɱ aniccaɱ dukkhaɱ vipariṇāmadhammaɱ,||
ayaɱ saññāya ādīnavo.|| ||

Yaɱ saññāya chandarāga vinayo chandarāgappahānaɱ,||
idaɱ saññāya nissaraṇaɱ.|| ||

Ye saɱkhārā paṭicca uppajjati sukhaɱ somanassaɱ,||
ayaɱ saɱkhārānaɱ assādo.|| ||

Ye saɱkhārā aniccā dukkhā vipariṇāma-dhammā,||
ayaɱ saɱkhārānaɱ ādīnavo.|| ||

Yo saɱkhāresu chandarāga vinayo chandarāgappahānaɱ,||
idaɱ saɱkhārānaɱ nissaraṇaɱ.|| ||

Yaɱ viññāṇaɱ paṭicca uppajjati sukhaɱ somanssaɱ,||
ayaɱ viññāṇassa assādo.|| ||

Yaɱ viññāṇaɱ aniccaɱ dukkhaɱ vipariṇāmadhammaɱ,||
ayaɱ viññāṇassa ādīnavo.|| ||

Yo viññāṇasmiɱ chandarāgavinayo chandarāgappahānaɱ,||
idaɱ viññāṇassa nissaraṇan" ti.|| ||

Sādhu bhante' ti||
kho so bhikkhu Bhagavato bhāsitaɱ||
abhinanditvā anumoditvā||
Bhagavantaɱ uttariɱ pañhaɱ āpucchi.|| ||

"Kathaɱ nu kho bhante, jānato||
kathaɱ passato||
imasmiɱ ca saviññāṇake kāye bahiddhā ca sabba nimittesu ahiŋkāramamiŋkāramānānusayā na honti?|| ||

Yaɱ kiñci bhikkhu rūpaɱ atītānāgatapaccuppannaɱ||
ajjhattaɱ vā bahiddha vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ rūpaɱ:|| ||

"Netaɱ mama||
neso ham asmi||
na me so attā" ti.|| ||

Evam etaɱ yathābhūtaɱ sammappaññāya passati.|| ||

Yā vedanā atītānāgata paccuppannā||
ajjhattaɱ vā bahiddha vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ vedanaɱ:|| ||

"Netaɱ mama||
neso ham asmi||
na me so attā" ti.|| ||

Evam etaɱ yathābhūtaɱ sammappaññāya passati.|| ||

Yā kāci saññā atītānāgata paccuppannā||
ajjhattaɱ vā bahiddha vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ saññaɱ:|| ||

"Netaɱ mama||
neso ham asmi||
na me so attā" ti.|| ||

Evam etaɱ yathābhūtaɱ sammappaññāya passati.|| ||

Ye keci saɱkhārā atītānāgata paccuppannā||
ajjhattaɱ vā bahiddha vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ sankhāraɱ:|| ||

"Netaɱ mama||
neso ham asmi||
na me so attā" ti.|| ||

Evam etaɱ yathābhūtaɱ sammappaññāya passati.|| ||

Yaɱ kiñci viññāṇaɱ atītānāgata paccuppannaɱ||
ajjhattaɱ vā bahiddha vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ sabbaɱ:|| ||

"Netaɱ mama||
neso ham asmi||
na me so attā" ti.|| ||

Evam etaɱ yathābhūtaɱ sammappaññāya passati.|| ||

Evaɱ kho bhikkhu, jānato||
kathaɱ passato||
imasmiɱ ca saviññāṇake kāye bahiddhā ca sabba nimittesu ahiŋkāramamiŋkāramānānusayā na honti" ti.|| ||

 


 

Tena kho pana samayena aññatarassa bhikkhuno evaɱ cetaso parivitakko udapādi:|| ||

"Iti kira bho rūpaɱ anattā,||
vedanā anattā,||
saññā anattā,||
saɱkhārā anattā,||
viññāṇaɱ anattā,||
anattakatāni kammāni kathamattānaɱ phusissantī" ti?"|| ||

Atha kho Bhagavā tassa bhikkhuno cetasā ceto parivitakkamaññāya bhikkhu āmantesi:|| ||

"ṭhānaɱ kho pan'etaɱ bhikkhave, vijjati:||
yaɱ idh'ekacco moghapuriso avidvā avijjāgato taṇhādhigatena cetasā satthusāsanaɱ atidhāvitabbaɱ maññeyya:|| ||

'Iti kira bho rūpaɱ anattā,||
vedanā anattā,||
saññā anattā,||
saɱkhārā anattā,||
viññāṇaɱ anattā,||
anattakatāni [104] kammāni kathamattānaɱ phusissantī' ti?|| ||

Paṭipucchāvinitā kho me tumhe bhikkhave,||
tatra tatra tesu tesu dhammesu.|| ||

 


 

Taɱ kiɱ maññatha bhikkhave?|| ||

Rūpaɱ niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti?"|| ||

"No h'etaɱ bhante."

Vedanā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti?"|| ||

"No h'etaɱ bhante."

Saññā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti?"|| ||

"No h'etaɱ bhante."

Saɱkhārā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti?"|| ||

"No h'etaɱ bhante."

Viññāṇaɱ niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti?"|| ||

"No h'etaɱ bhante."

Tasmāt iha bhikkhave, yaɱ kiñci rūpaɱ atītānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
sabbaɱ rūpaɱ:||
'n'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci vedanā atītānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
sabbaɱ vedanaɱ:||
'n'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci saññā atītānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
sabbaɱ saññāṇaɱ:||
'n'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Ye keci saɱkhārā atītānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
sabbaɱ sankhārānaɱ:||
'n'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yaɱ kiñci viññāṇaɱ atītānāgatapaccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā||
sabbaɱ viññāṇaɱ:||
'n'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.

Evaɱ passaɱ bhikkhave, sutavā ariyasāvako||
rūpasmim pi nibbindati||
vedanāya pi nibbindati||
saññāya pi nibbindati||
saɱkhāresu pi nibbindati||
viññāṇasmim pi nibbindati.|| ||

Nibbidaɱ virajjati.|| ||

Virāgā vimuccati.|| ||

Vimuttasmiɱ 'vimuttami' ti||
ñāṇaɱ hoti:|| ||

'Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyā' ti pajānātī" ti.|| ||

Khajjanīya vaggo tatiyo

 


Contact:
E-mail
Copyright Statement   Webmaster's Page