Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.4. Thera Vagga

Sutta 86

Anurādha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[116]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane kuṭāgārasālāyaɱ.|| ||

Tena kho pana samayena āyasmā Anurādho Bhagavato avidūre araññakuṭikāyaɱ viharati.|| ||

Atha kho sambahulā aññatitthiyā paribbājakā yenāyasmā Anurādho ten'upasaɱkamiɱsu, upasaɱkamitvā āyasmatā Anurādhena saddhiɱ sammodiɱsu, sammodanīyaɱ kathaɱ sārāṇīyaɱ vitisāretvā eka-m-antaɱ nisīdiɱsu.|| ||

Eka-m-antaɱ nisinnā kho te aññatitthiyā paribbājakā āyasmantaɱ Anurādhaɱ etad avocuɱ:|| ||

"Yo so āvuso Anurādha,||
Tathāgato uttamapuriso paramapuriso paramapattipatto,||
taɱ Tathāgato imesu catusu ṭhānesu paññāpayamāno paññāpeti:|| ||

'Hoti Tathāgato param maraṇā' ti vā||
'na hoti Tathāgato parammaraṇa' ti vā||
'hoti ca na ca hoti Tathāgatato param maraṇā' ti vā||
'n'eva hoti na na hoti Tathāgato param maraṇā' ti vā" ti.|| ||

Evaɱ vutte āyasmā Anurādho te aññatitthiye paribbājake etad avoca:|| ||

"Ye so āvuso Tathāgato uttamapuriso paramapuriso paramapattipatto,||
taɱ Tathāgato aññatiramehi catūhi ṭhānehi paññāpayamāno paññāpeti|| ||

'Hoti Tathāgato param maraṇā' ti vā||
'na hoti Tathāgato parammaraṇa' ti vā||
'hoti ca na ca hoti Tathāgatato param maraṇā' ti vā||
'n'eva hoti na na hoti Tathāgato param maraṇā' ti vā" ti.|| ||

Evaɱ vutte te aññatitthiyā paribbājakā āyasmantaɱ Anurādhaɱ etad avocuɱ:|| ||

"So cāyaɱ bhikkhu navo bhavissati acirapabbajito,||
thero vā pana bālo avyatto" ti.|| ||

Atha kho te aññatitthiyā paribbājakā āyasmantaɱ Anurādhaɱ navavādena ca bālavādena ca apasādetvā uṭṭhāy āsanā pakkamiɱsu.|| ||

[117] Atha kho āyasmato Anurādhassa acirapakkantesu tesu aññatitthiyesu paribbājakesu etad ahosi:|| ||

"Sa ce kho maɱ te aññatitthiyā paribbajakā uttariɱ pañhaɱ puccheyyuɱ.|| ||

Kathaɱ khyākaramāno nu khvāhaɱ tesaɱ aññatitthiyānaɱ paribbājakānaɱ vuttavādi c'eva Bhagavāto assaɱ,||
na ca Bhagavantaɱ abhūtena abbhācikkheyyaɱ,||
Dhammassa cānudhammaɱ vyākareyyaɱ,||
na ca koci sahadhammiko vādānupāto gārayhaɱ ṭhānaɱ āgaccheyyā" ti.|| ||

Atha kho āyasmā Anurādho yena Bhagavā ten'upasaɱkami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Anurādho Bhagavantaɱ etad avoca:|| ||

"Idāhaɱ bhante, Bhagavato avidūre araññakuṭikāyaɱ viharāmi.|| ||

Atha kho bhante sambahulā aññatitthiyā paribbājakā yenāhaɱ ten'upasaɱkamiɱsu.|| ||

Upasaɱkamitvā mama saddhiɱ sammodiɱsu.|| ||

Sammodanīyaɱ kathaɱ sārāṇīyaɱ vitisāretvā eka-m-antaɱ nisīdiɱsu.|| ||

Eka-m-antaɱ nisinnā kho bhante, te aññatitthiyā paribbājakā maɱ etad avocuɱ:|| ||

Yo so āvuso Anurādha,||
Tathāgato uttamapuriso paramapuriso paramapattipatto,||
taɱ Tathāgato imesu catusu ṭhānesu paññāpayamāno paññāpeti:|| ||

'Hoti Tathāgato param maraṇā' ti vā||
'na hoti Tathāgato parammaraṇa' ti vā||
'hoti ca na ca hoti Tathāgatato param maraṇā' ti vā||
'n'eva hoti na na hoti Tathāgato param maraṇā' ti vā" ti.|| ||

Evaɱ vuttāhaɱ bhante, te aññatitthiye paribbājake etad avocaɱ:|| ||

"Yo so āvuso Tathāgato uttamapuriso paramapuriso paramapattipatto, taɱ Tathāgato aññatiramehi catuhi ṭhānehi paññāpayamāno paññāpeti:|| ||

'Hoti Tathāgato param maraṇā' ti vā||
'na hoti Tathāgato parammaraṇa' ti vā||
'hoti ca na ca hoti Tathāgatato param maraṇā' ti vā||
'n'eva hoti na na hoti Tathāgato param maraṇā' ti vā" ti.|| ||

Evaɱ vutte bhante, te aññatitthiyā paribbājakā maɱ etad avocuɱ:|| ||

"So cā'yaɱ bhikkhu navo bhavissati acirapabbajito,||
thero vā pana bālo avyatto" ti.|| ||

Atha kho maɱ bhante, te aññatitthiyā paribbājakā navavādena ca bālavādena ca apasādetvā uṭṭhāy āsanā pakkamiɱsu.|| ||

[118] Tassa mayhaɱ bhante, acirapakkantesu tesu aññatitthiyesu paribbājakesu etad ahosi:|| ||

"Sace kho maɱ te aññatitthiyā paribbājakā uttariɱ pañhaɱ puccheyyuɱ.|| ||

Kathaɱ khyākaramāno nu khohaɱ tesaɱ aññatitthiyānaɱ paribbājakānaɱ vuttavādi c'eva Bhagavato assaɱ, na ca Bhagavantaɱ abhūtena abbhācikkheyyaɱ, Dhammassa cānudhammaɱ khyākareyyaɱ, na ca koci sahadhammiko vādānuvādo gārayhaɱ ṭhānaɱ āgaccheyyā" ti.|| ||

 


 

Taɱ kiɱ maññasi Anurādha?|| ||

Rūpaɱ niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Vedanā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Saññā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Saɱkhārā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Viññāṇaɱ niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Tasmāt iha Anurādha,||
yaɱ kiñci rūpaɱ atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ rūpaɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci vedanā atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ vedanaɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci saññā atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ saññaɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Ye keci saɱkhārā atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ saɱkhāraɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yaɱ kiñci viññāṇaɱ atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ viññāṇaɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

 


 

Evaɱ passaɱ Anurādha, sutavā ariyasāvako||
rūpasmim pi nibbandati,||
vedanāya pi nibbandati,||
saññāya pi nibbindati,||
saɱkhāresu pi nibbindati,||
viññāṇasmim pi nibbindati.|| ||

Nibbidaɱ virajjati.|| ||

Virāgā vimuccati.|| ||

Vimuttasmiɱ 'vimuttami' ti||
ñāṇaɱ hoti:|| ||

'Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyā' ti pajānātī.|| ||

 


 

Taɱ kiɱ maññasi Anurādha?|| ||

'Rūpasmiɱ Tathāgato' ti samanupassasī" ti?|| ||

"No h'etaɱ bhante."|| ||

"'Vedanaɱ Tathāgato' ti samanupassasī" ti?|| ||

"No h'etaɱ bhante."|| ||

"'Saññaɱ Tathāgato' ti samanupassasī" ti?|| ||

"No h'etaɱ bhante."|| ||

"'Saɱkhāre Tathāgato' ti samanupassasī" ti?|| ||

"No h'etaɱ bhante."|| ||

"'Viññāṇaɱ Tathāgato' ti samanupassasī" ti?|| ||

"No h'etaɱ bhante."|| ||

"Taɱ kiɱ maññasi Anurādha?

'Rūpasmiɱ Tathāgato' ti samanupassasī" ti?|| ||

"No h'etaɱ bhante."|| ||

"'Aññatra rūpā Tathāgato' ti samanupassasī" ti.|| ||

"No h'etaɱ bhante."|| ||

"'Aññatra viññāṇā Tathāgato' ti samanupassasī" ti?|| ||

"No h'etaɱ bhante."|| ||

"Taɱ kiɱ maññasi Anurādha?|| ||

'Rūpaɱ Tathāgato' ti samanupassasī" ti?|| ||

"No h'etaɱ bhante."|| ||

Vedanā Tathāgato'ti samanupassasīti?|| ||

No h'etaɱ bhante.|| ||

Saññā Tathāgato'ti samanupassasīti?|| ||

No h'etaɱ bhante.|| ||

Saɱkhārā Tathāgato'ti samanupassasīti?|| ||

No h'etaɱ bhante.|| ||

Viññāṇaɱ Tathāgato'ti samanupassasīti?|| ||

No h'etaɱ bhante.|| ||

Taɱ kim maññasi Anurādha, ayaɱ so arūpī avedano asaññī asaɱkhāro aviññāṇo Tathāgato'ti samanupassasiti?|| ||

No h'etaɱ bhante.|| ||

Ettha ca te Anurādha, diṭṭhe va dhamme saccato thetato tathāgate anupalabbhiyamāne1 kallannu te taɱ vyākaraṇaɱ "yo so āvuso, Tathāgato uttamapuriso paramapuriso paramapattipatto taɱ Tathāgato aññatiramehi [119] catūhi ṭhānehi paññāpayamāno paññāpeyya- "hoti Tathāgato param maraṇāti vā na hoti Tathāgato param maraṇāti vā hoti ca na ca hoti Tathāgato param maraṇā'ti vā n'eva hoti na na hoti Tathāgato param maraṇāti vā" ti.|| ||

No h'etaɱ bhante.|| ||

Sādhu sādhu Anurādha, pubbe cāhaɱ Anurādha, etarahi ca dukkhañce va paññāpemi dukkhassa ca nirodhanti.|| ||

 


Contact:
E-mail
Copyright Statement   Webmaster's Page