Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.4. Thera Vagga

Sutta 87

Vakkali Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[119]

[1][pts][wlsh][bodh] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

[2] Tena kho pana samayena āyasmā Vakkali kumbhakāranivesane viharati ābādhiko dukkhito bāḷhagilāno.|| ||

[3] Atha kho āyasmā Vakkali upaṭṭhāke āmantesi:|| ||

Etha tumhe āvuso,||
yena Bhagavā ten'upasaɱkamatha||
upasaɱkamitvā mama vacanena Bhagavato pāde sirasā vandatha.|| ||

Vakkali bhante bhikkhu ābādhiko dukkhito bāḷhagilāno||
so Bhagavato pāde sirasā vandatī ti.|| ||

Evaɱ ca vadetha 'Sādhu kira bhante, Bhagavā yena Vakkali bhikkhu ten'upasaɱkamatu anukampaɱ upādāya' ti.|| ||

[4] Evam āvuso ti kho te bhikkhū āyasmato Vakkalissa paṭissutvā yena Bhagavā ten'upasaɱkamiɱsu.|| ||

Upasaɱkamitvā Bhagavantaɱ abhivādetvā eka-m-antaɱ nisīdiɱsu.|| ||

[5] Eka-m-antaɱ nisinnā kho te bhikkhū Bhagavantaɱ etad avocuɱ:|| ||

Vakkali bhante, bhikkhu ābādhiko dukkhito bāḷhagilāno||
so Bhagavato pāde sirasā vandati||
evaŋ ca pana vadeti||
"Sādhu kira bhante, Bhagavā yena Vakkali bhikkhu ten'upasaɱkamatu anukampaɱ upādāyā" ti.|| ||

Adhivāsesi Bhagavā tuṇhībhāvena.|| ||

[6] Atha kho Bhagavā nivāsetvā pattacīvaram ādāya yenāyasmā Vakkali ten'upasaɱkami.|| ||

[120] [7] Addasā kho āyasmā Vakkali Bhagavantaɱ durato āgacchantaɱ||
disvāna mañcake samadhosi.|| ||

[8] Atha kho Bhagavā āyasmantaɱ Vakkaliɱ etad avoca:|| ||

"Alaɱ Vakkali mā tvaɱ mañcake samadhosi||
santimāni āsanāni paññattāni,||
tatthāhaɱ nisīdissāmī, ti.|| ||

Nisīdi Bhagavā paññatte āsane.|| ||

[9] Nisajja kho Bhagavā āyasmantaɱ Vakkaliɱ etad avoca:|| ||

Kacci te Vakkali, khamanīyaɱ?|| ||

Kacci yāpanīyaɱ?|| ||

Kacci dukkhā vedanā paṭikkamanti no abhikkamanti||
paṭikkamosānaɱ paññāyati no abhikkamoti.|| ||

Na me bhante, khamanīyaɱ, na yāpanīyaɱ||
bā'hā me dukkhā vedanā abhikkamanti no paṭikkamanti||
abhikkamosānaɱ paññāyati no paṭikkamo ti.|| ||

[10] Kacci te Vakkali, na kiñci kukkuccaɱ na koci vippaṭisāroti?|| ||

Taggha me bhante, anappakaɱ kukkuccaɱ anappako vippaṭisāro ti.|| ||

[11] Kacci pana taɱ Vakkali, attā sīlato na upavadatīti?|| ||

Na kho maɱ bhante, attā sīlato upavadatī ti.|| ||

[12] No ce kira Vakkali, attā sīlato upavadati,||
atha kiñci te kukkuccaɱ ko ca vippaṭisāro ti?|| ||

Cirapaṭikāhaɱ bhante, Bhagavantaɱ dassanāya upasaɱkamitukāmo n'atthi ca me kāyasmīɱ tāvatikā balamattā,||
yāyāhaɱ Bhagavantaɱ dassanāya upasaɱkameyyan ti.|| ||

[13][pts][bps][wp] Alaɱ Vakkali kiɱ te iminā pūtikāyena diṭṭhena.|| ||

Yo kho Vakkali, dhammaɱ passati so maɱ passati,||
yo maɱ passati so dhammaɱ passati.|| ||

Dhammaɱ hi Vakkali, passanto maɱ passati||
maɱ passanto dhammaɱ passati.|| ||

[14] Taɱ kiɱ maññasi Vakkali,||
"Rūpaɱ niccaɱ vā aniccaɱ vā ti?|| ||

[121] Aniccaɱ bhante.|| ||

Yam panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante.|| ||

Yam panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ||
'Etaɱ mama. So'hamasmi, eso me attā' ti.|| ||

No h'etaɱ bhante.|| ||

Vedanā niccaɱ vā aniccaɱ vāti?|| ||

Aniccaɱ bhante.|| ||

Yaɱ panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante.|| ||

Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ||
"Etaɱ mama, eso'hamasmi, eso me attā" ti.|| ||

No h'etaɱ bhante.|| ||

Saññā niccaɱ vā aniccaɱ vāti?|| ||

Aniccaɱ bhante.|| ||

Yaɱ panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante.|| ||

Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ||
"Etaɱ mama, eso'hamasmi, eso me attā" ti.|| ||

No h'etaɱ bhante.|| ||

Saɱkhārā niccaɱ vā aniccaɱ vāti?|| ||

Aniccaɱ bhante.|| ||

Yaɱ panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante.|| ||

Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ||
'Etaɱ mama, eso'hamasmi, eso me attā' ti.|| ||

No h'etaɱ bhante.|| ||

Viññāṇaɱ niccaɱ vā aniccaɱ vāti?|| ||

Aniccaɱ bhante.|| ||

Yaɱ panāniccaɱ dukkhaɱ vā taɱ sukhaɱ vā' ti?|| ||

Dukkhaɱ bhante.|| ||

Yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ||
"Etaɱ mama, eso'hamasmi eso, me attā' ti?|| ||

No h'etaɱ bhante.|| ||

Tasmāt iha Vakkali, yaɱ kiñci rūpaɱ atītānāgatapaccuppannaɱ ajjhattaɱ vā bahiddhā vā oḷārikaɱ vā sukhumaɱ vā hīnaɱ vā paṇītaɱ vā yaɱ dūre santike vā sabbaɱ rūpaɱ||
"N'etaɱ mama neso'hamasmi na me'so attā" ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci vedanā atītānāgatapaccuppannaɱ ajjhattaɱ vā bahiddhā vā oḷārikaɱ vā sukhumaɱ vā hīnaɱ vā paṇītaɱ vā yaɱ dūre santike vā sabbaɱ vedanaɱ:||
'n'etaɱ mama neso'hamasmi na me so attā" ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci saññā atītānāgatapaccuppannaɱ ajjhattaɱ vā bahiddhā vā oḷārikaɱ vā sukhumaɱ vā hīnaɱ vā paṇītaɱ vā yaɱ dūre santike vā sabbaɱ saññaɱ:||
'N'etaɱ mama neso'hamasmi na me so attā" ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Ye keci saɱkhārā atītānāgatapaccuppannaɱ ajjhattaɱ vā bahiddhā vā oḷārikaɱ vā sukhumaɱ vā hīnaɱ vā paṇītaɱ vā yaɱ dūre santike vā sabbaɱ sankhāraɱ:||
'N'etaɱ mama neso'hamasmi na me so attā" ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yaɱ kiñci viññāṇaɱ atītānāgatapaccuppannaɱ ajjhattaɱ vā bahiddhā vā oḷārikaɱ vā sukhumaɱ vā hīnaɱ vā paṇītaɱ vā yaɱ dūre santike vā sabbaɱ viññāṇaɱ:||
'N'etaɱ mama neso'hamasmi na me so attā" ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Evaɱ passaɱ ariyasāvako rūpasmimpi nibbindati nibbindaɱ virajjati,||
virāgā vimuccati,||
vimuttasmiɱ vimuttamiti ñāṇaɱ hoti,||
khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyāti pajānātī ti.|| ||

[17] Atha kho Bhagavā āysamantaɱ Vakkaliɱ iminā ovādena ovaditvā uṭṭhāy āsanā yena Gijjhakuṭo pabbato tena pakkāmi.|| ||

[18] Atha kho āyasmā Vakkali acirapakkantassa Bhagavato upaṭṭhāke āmantesi:|| ||

"Etha maɱ āvuso mañcakaɱ āropetvā yena Isigilipassakā'asīlā ten'upasaɱkamatha||
kathaɱ hi nāma mādiso antaraghare kālaɱ kattabbaɱ maññeyyā' ti.|| ||

[19] Evam āvuso ti kho te bhikkhū āyasmato Vakkalissa paṭissutvā āyasmantaɱ Vakkaliɱ mañcakaɱ āropetvā yena Isigilipassakālasilā ten'upasaɱkamiɱsu.|| ||

[20] Atha kho Bhagavā tañ ca rattiɱ tañ ca divasāvasesaɱ Gijjhakuṭe pabbate vihāsi.|| ||

[21] Atha kho dve devatāyo abhikkantāya rattiyā abhikkantavaṇṇā kevalakappaɱ Gijjhakūṭaɱ obhāsetvā yena Bhagavā ten'upasaɱkamiɱsu.|| ||

Upasaɱkamitvā Bhagavantaɱ abhivādetvā eka-m-antaɱ aṭṭhaɱsu.|| ||

[22] Eka-m-antaɱ ṭhitā kho ekā devatā Bhagavantaɱ etad avoca:|| ||

Vakkali bhante, bhikkhu vimokkhāya cetetī' ti.|| ||

[23] Aparā devatā Bhagavantaɱ etad avoca:||
"So hi nūna bhante,||
suvimutto vimuccissatī' ti.|| ||

[24] Idam avocuɱ tā devatāyo.|| ||

Idaɱ vatvā Bhagavantaɱ abhivādetvā padakkhiṇaɱ katvā tatthevantaradhāyiɱsu.|| ||

[25] Atha kho Bhagavā tassā rattiyā accayena bhikkhu āmantesi:|| ||

'Etha tumhe bhikkhave, yena Vakkali bhikkhu ten'upasaɱkamatha,||
upasaɱkamitvā Vakkaliɱ bhikkhuɱ evaɱ vadetha:|| ||

"Suṇāvuso Vakkali, Bhagavato vacanaɱ [122] dvinnaɱ ca devatānaɱ,||
imaɱ āvuso rattiɱ dve devatāyo abhikkantāya ratniyā abhikkantavaṇṇā kevalakappaɱ Gijjhakuṭaɱ obhāsetvā yena Bhagavā ten'upasaɱkamiɱsu.||
Upasaɱkamitvā Bhagavantaɱ abhivādetvā eka-m-antaɱ aṭṭhaɱsu.|| ||

Eka-m-antaɱ ṭhitā kho āvuso ekā devatā Bhagavantaɱ etad avoca:|| ||

"Vakkali bhante, bhikkhu vimokkhāya cetetī" ti.|| ||

Aparā devatā Bhagavantaɱ etad avoca:|| ||

'So hi nūna bhante vimutto vimuccissatī' ti.|| ||

Bhagavā ca taɱ āvuso Vakkali, evam āha.|| ||

'Mā bhāyi Vakkali,||
mā bhāyi Vakkali,||
apāpakaɱ te maraṇaɱ bhavissati apāpikā kālakiriyā' ti.|| ||

[26] 'Evaɱ bhante' ti kho te bhikkhu Bhagavato paṭissutvā yenāyasamā Vakkali ten'upasaɱkamiɱsu.||
Upasaɱkamitvā āyasmantaɱ Vakkaliɱ etad avocuɱ:|| ||

'Suṇāvuso Vakkali, Bhagavato vacanaɱ dvinnañ ca devatānan' ti.|| ||

[27] Atha tho āyasmā Vakkali upaṭṭhāke āmantesi:|| ||

'Etha maɱ āvuso, mañcakā oropetha, kathaɱ hi nāma mādiso ucce āsane nisīditvā tassa Bhagavato sāsanaɱ sotabbaɱ maññeyyā' ti.|| ||

[28] Evam āvuso ti kho te bhikkhū āyasmato Vakkalissa paṭissutvā āyasmantaɱ Vakkaliɱ mañcakā oropesuɱ.|| ||

[29] Imaɱ āvuso rattiɱ dve devatāyo abhikkantāya rattiyā abhikkantavaṇṇā kevalakappaɱ Gijjhakuṭaɱ obhāsetvā yena Bhagavā ten'upasaɱkamiɱsu,|| ||

Upasaɱkamitvā Bhagavantaɱ abhivādetvā eka-m-antaɱ aṭṭhaɱsu.|| ||

Eka-m-antaɱ ṭhītā kho āvuso ekā devatā Bhagavantaɱ etad avoca:|| ||

"Vakkali bhante, bhikkhu vimokkhāya cetetī' ti.|| ||

Aparā devatā Bhagavantaɱ etad avoca:|| ||

'So hi nūna bhante, suvimutto vimuccissatī" ti.|| ||

Bhagavā va taɱ āvuso Vakkalī, evam āha:|| ||

'Mā bhāsi Vakkali,||
mā bhāyi Vakkali,||
apāpakaɱ te maraṇaɱ bhavissati,||
apāpikā kālakiriyā' ti.|| ||

[30] Tena hāvuso mama vacanena Bhagavato pāde sirasā vandatha.|| ||

"Vakkali bhante, bhikkhu ābādhiko dukkhito bāḷhagilāno, so Bhagavato pāde sirasā vandati, evañca vadeti.|| ||

'Rūpaɱ aniccaɱ tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ n'atthi me tattha chando vā rāgo vā pemaɱ vā ti na vicikicchāmi.|| ||

[122] Vedanā aniccā tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ n'atthi me tattha chando vā rāgo vā pemaɱ vāti na vicikicchāmi.|| ||

Saññā aniccā tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ n'atthi me tattha chando vā rāgo vā pemaɱ vāti na vicikicchāmi.'|| ||

Saɱkhārā aniccā tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ n'atthi me tattha chando vā rāgo vā pemaɱ vāti na vicikicchāmi.'|| ||

Viññāṇaɱ aniccaɱ tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ, n'atthi me tattha chando vā rāgo vā pemaɱ vā' ti na vicikicchāmī' ti.|| ||

Evam āvuso ti kho te bhikkhu āyasmato Vakkalissa paṭissutvā pakkamiɱsu.|| ||

Atha kho āysamā Vakkali acirapakkantesu tesu bhikkhusu satthaɱ aharesi.|| ||

Atha kho te bhikkhu yena Bhagavā ten'upasaɱkamiɱsu,||
upasaɱkamitvā Bhagavantaɱ abhivādetvā||
eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū Bhagavantaɱ etad avocuɱ:|| ||

Vakkali bhante, bhikkhu ābādhiko dukkhito bāḷhagilāno.|| ||

So Bhagavato pāde sirasā vandati, evañca vadeti:|| ||

'Rūpaɱ aniccaɱ tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ n'atthi me tattha chando vā rāgo vā pemaɱ vā ti na vicikicchāmi.|| ||

Vedanā aniccā tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ n'atthi me tattha chando vā rāgo vā pemaɱ vāti na vicikicchāmi.|| ||

Saññā aniccā tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ n'atthi me tattha chando vā rāgo vā pemaɱ vāti na vicikicchāmi.'|| ||

Saɱkhārā aniccā tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ n'atthi me tattha chando vā rāgo vā pemaɱ vāti na vicikicchāmi.'|| ||

Viññāṇaɱ aniccaɱ tāhaɱ bhante, na kaŋkhāmi.|| ||

'Yad aniccaɱ taɱ dukkhan ti na vicikicchāmi.||
Yad aniccaɱ dukkhaɱ vipariṇāmadhammaɱ, n'atthi me tattha chando vā rāgo vā pemaɱ vā' ti na vicikicchāmī' ti.|| ||

[34] Atha kho Bhagavā bhikkhu āmantesi.|| ||

Āyāma bhikkhave, yena Isigilipassakālasilā ten'upasaɱkamissāma,||
yattha Vakkalinā kulaputtena satthaɱ āharitan ti.|| ||

'Evaɱ bhante' ti kho te bhikkhū Bhagavato paccassosuɱ.|| ||

[35] Atha kho Bhagavā sambahulehi bhikkhuhi saddhiɱ yena Isigilipassakālasilā ten'upasaɱkami.|| ||

[36] Addasā kho Bhagavā āyasmantaɱ Vakkaliɱ durato va mañcake vivattakkhāndhaɱ-semānaɱ.|| ||

[124] [37] Tena kho pana samayena dhumāyitattaɱ timirāyitattaɱ gacchateva purimaɱ disaɱ,||
gacchati pacchimaɱ disaɱ,||
gacchati uttaraɱ disaɱ,||
gacchati dakkhiṇaɱ disaɱ,||
gacchati uddhaɱ,||
gacchati adho,||
gacchati anudisaɱ.|| ||

[38] Atha kho Bhagavā bhikkhū āmantesi:|| ||

"Passatha no tumhe bhikkhave, etaɱ dhumāyitattaɱ timirāyitattaɱ gacchateva purimaɱ disaɱ,||
gacchati pacchimaɱ disaɱ,||
gacchati uttaraɱ disaɱ,||
gacchati dakkhiṇaɱ disaɱ,||
gacchati uddhaɱ,||
gacchati adho,||
gacchati anudisanti?|| ||

Evaɱ bhante.|| ||

[39] Eso kho bhikkhave, Māro pāpimā Vakkalissa kulaputtassa viññāṇaɱ samanvesati.|| ||

Kattha Vakkalissa kulaputtassa viññāṇaɱ patiṭṭhitan ti'.|| ||

[40] Appatiṭṭhatena ca bhikkhave, viññāṇena Vakkali kulaputto parinibbuto ti.|| ||

 


Contact:
E-mail
Copyright Statement   Webmaster's Page