Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.4. Thera Vagga

Sutta 88

Assaji Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[124]

[1][pts][bodh] Evaɱ me sutaɱ:|| ||

[116] Ekaɱ samayaɱ Bhagavā Rājagahe viharati veevane kalandaka nivāpe.|| ||

Tena kho pana samayena āyasmā Assaji Kassapakārāme viharati ābādhiko dukkhito bāḷhagilāno.|| ||

Atha kho āyasmā Assaji upaṭṭhāke āmantesi|| ||

"Etha tumhe āvuso yena Bhagavā ten'upasaɱkamatha,||
upasaɱkamitvā mama vacanena Bhagavato pāde sirasā vandatha:|| ||

'Assaji bhante, bhikkhu ābādhiko dukkhito bāḷhagilāno so Bhagavato pāde sirasā vandatī' ti.|| ||

evañ ca vadetha:|| ||

'Sādhu kira bhante, Bhagavā yena Assaji bhikkhu ten'upasaɱkamatu anukampaɱ upādāyā'" ti.|| ||

"Evam āvuso" ti kho te bhikkhu āyasmato Assajissa paṭissutvā yena Bhagavā ten'upasaɱkamiɱsu,||
upasaɱkamitvā Bhagavantaɱ abhivādetvā eka-m-antaɱ nisīdiɱsu,||
eka-m-antaɱ nisinnā kho te bhikkhū Bhagavantaɱ etad avocuɱ:|| ||

"Assaji bhante, bhikkhu ābādhiko dukkhito bāḷhagilāno so Bhagavato pāde sirasā vandati,||
evaɱ ca vadeti sādhu kira bhante, Bhagavā yena Assaji bhikkhu ten'upasaɱkamatu anukampaɱ upādāyā" ti.|| ||

Adhivāsesi Bhagavā tuṇhībhāvena.|| ||

[125] Atha kho Bhagavā sāyaṇhasamayaɱ paṭisallānā vuṭṭhito yenāyasmā Assaji ten'upasaɱkami.|| ||

Addasā kho āyasmā Assaji Bhagavantaɱ durato va āgacchannaɱ||
disvāna mañcake samadhosi.|| ||

Atha kho Bhagavā āyasmantaɱ Assajiɱ etad avoca:|| ||

"Alaɱ Assaji,||
mā tvaɱ mañcake samadhosi,||
santimāni āsanāni paññattāni.|| ||

Tatthāhaɱ nisīdissāmī" ti.|| ||

Nisīdi Bhagavā paññatena āsane,||
nissajja kho Bhagavā āyasmantaɱ Assajiɱ etad avoca:|| ||

"Kacci te Assaji khamanīyaɱ?|| ||

Kacci yāpanīyaɱ?|| ||

Kacci dukkhā vedanā paṭikkamanti no abhikkamanti?|| ||

Paṭikkamosānaɱ paññāyati no abhikkamo" ti?|| ||

"Na me bhante, khamanīyaɱ,||
na yāpanīyaɱ,||
bāḷhā me dukkhā vedanā,||
abhikkamanti no paṭikkamanti,||
abhikkamosānaɱ paññāyati,||
no paṭikkamo" ti.|| ||

"Kacci te Assaji na kiñci||
kukkuccaɱ na koci vippaṭisāro" ti?|| ||

"Taggha me bhante,||
anappakaɱ kukkuccaɱ||
anappako vippaṭisāro" ti.|| ||

"Kacci pana taɱ Assaji,||
attā sīlato na upavadatī" ti?|| ||

"Na kho maɱ bhante,||
attā sīlato upavadatī" ti.|| ||

"No ce kira taɱ Assaji||
attā sīlato upavadati||
atha kiñ ca te kukkuccaɱ,||
ko ca vippaṭisāro" ti?|| ||

Pubbe khvāhaɱ bhante,||
gelaññaɱ passambhetvā passambhetvā kāyasankhāre vippatisāri viharāmi||
so taɱ samādhiɱ na paṭilabhāmi.|| ||

Tassa mayhaɱ bhante,||
taɱ samādhiɱ appaṭilabhato evaɱ hoti no||
'no ca khvāhaɱ parihāyāmī' ti.|| ||

Ye te Assaji,||
samaṇa-brāhmaṇā samādhisārakā||
samādhi-sāmaññā tesaɱ taɱ samādhiɱ appaṭilabhataɱ evaɱ hoti|| ||

"No cassu mayaɱ parihāyāmā" ti.|| ||

 


 

Taɱ kiɱ maññasi Assaji?|| ||

Rūpaɱ niccaɱ vā aniccaɱ vā" ti?|| ||

"Aniccaɱ bhante."|| ||

[126] "Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Vedanā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Saññā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Saɱkhārā niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Viññāṇaɱ niccaɱ vā aniccaɱ vā" ti?|| ||

"Aniccaɱ bhante."|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallaɱ nu taɱ samanupassituɱ:|| ||

'Etaɱ mama,||
eso ham asmi,||
eso me attā' ti"?|| ||

"No h'etaɱ bhante."|| ||

Tasmāt iha Assaji,||
yaɱ kiñci rūpaɱ atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ rūpaɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci vedanā atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ vedanaɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci saññā atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ saññaɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Ye keci saɱkhārā atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ saɱkhāraɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yaɱ kiñci viññāṇaɱ atītānāgatapaccuppannaɱ||
ajjhattaɱ vā bahiddhā||
vā oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā sabbaɱ viññāṇaɱ:|| ||

'N'etaɱ mama||
neso ham asmi||
na me'so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

 


 

Evaɱ passaɱ Assaji, sutavā ariyasāvako||
rūpasmim pi nibbandati,||
vedanāya pi nibbandati,||
saññāya pi nibbindati,||
saɱkhāresu pi nibbindati,||
viññāṇasmim pi nibbindati.|| ||

Nibbidaɱ virajjati.|| ||

Virāgā vimuccati.|| ||

Vimuttasmiɱ 'vimuttami' ti||
ñāṇaɱ hoti:|| ||

'Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyā' ti pajānātī.|| ||

 


 

So sukhaɱ ce vedanaɱ vediyati sā aniccāti pajānāti||
anajjhositā ti pajānāti||
anabhinanditāti pajānāti.|| ||

Dukkhaɱ ce vedanaɱ vediyati sā aniccāti pajānāti,||
anajjhositā ti pajānāti,||
anabhinanditā ti pajānāti.|| ||

Adukkha-m-asukhaɱ ce vedanaɱ vediyati sā aniccāti pajānāti,||
anajjhositā ti pajānāti,||
anabhinanditā ti pajānāti.|| ||

So sukhaɱ ce vedanaɱ vediyati visaññunto naɱ vediyati.|| ||

Dukkhañ ce vedanaɱ vediyati visaññutto naɱ vediyati.|| ||

Adukkha-m-asukhañ ce vedanaɱ vediyati||
visaññutto naɱ vediyati.|| ||

So kāya-pariyantikañ ce vedanaɱ vediyamāno||
kāya-pariyantikaɱ vedanaɱ vediyāmīti pajānāti.|| ||

Jivita-pariyantikañ ce vedanaɱ vediyamāno||
jivita-pariyantikaɱ vedanaɱ vediyāmiti pajānāti.|| ||

Kāyassa bhedā uddhaɱ jīvita-pariyādānā idh'eva sabbavedayitāni anabhinanditāni sītibhavissantī ti pajānāti.|| ||

Seyyathā pi Assaji,||
telañ ca paṭicca||
vaṭṭiɱ ca paṭicca||
telapadīpo jhāyeyya.|| ||

Tass'eva telassa ca vaṭṭiyā ca pariyādānā anāhāro nibbāyeyya.|| ||

Evam eva kho Assaji bhikkhū kāya-pariyantikaɱ vedanaɱ vediyamāno||
kāya-pariyantikaɱ vedanaɱ vediyāmīti pajānāti|| ||

Jivita-pariyantikaɱ vedanaɱ vediyamāno||
jivita-pariyantikaɱ vedanaɱ vediyāmīti pajānāti.|| ||

Kāyassa bhedā uddhaɱ jīvita-pariyādānā idh'eva sabbavedayitāni anabhinanditāni sītibhavissantī ti pajānātī" ti.|| ||

 


Contact:
E-mail
Copyright Statement   Webmaster's Page