Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
3. Khandha Vagga
22. Khandha Saɱyutta
9. Thera Vagga

Sutta 89

Khemaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[126]

[1][pts][than][bodh] Evaɱ me sutaɱ:|| ||

Ekaɱ samayaɱ sambahulā therā bhikkhū Kosambīyaɱ viharanti Ghositārāme.|| ||

Tena kho pana samayen'āyasmā Khemako badarikārāme viharati ābādhiko dukkhito bāḷha-gilāno.|| ||

[127] Atha kho therā bhikkhū sāyaṇha-samayaɱ paṭisallāṇā vuṭṭhitā āyasmantaɱ Dāsakaɱ āmantesuɱ:|| ||

"Ehi tvaɱ āvuso Dāsaka,||
yena Khemako bhikkhu ten'upasankama.|| ||

Upasaɱkamitvā Khemakaɱ bhikkhuɱ evaɱ vadehi:|| ||

'Therā taɱ āvuso Khemaka, evam āhamsa:|| ||

"Kacci te āvuso khamanīyaɱ?|| ||

Kacci yāpanīyaɱ?|| ||

Kacci dukkhā vedanā paṭi-k-kamanti no abhi-k-kamanti?|| ||

Paṭikkamosānaɱ paññāyati no abhi-k-kamo"'" ti?|| ||

"Evam āvuso" ti kho āyasmā Dāsako therānaɱ bhikkhūnaɱ paṭissutvā.|| ||

Yenāyasmā Khemako ten'upasankami,||
upasankamitvā āyasmantaɱ Khemakaɱ etad avoca:|| ||

'Therā taɱ āvuso Khemaka, evam āhaɱsu:|| ||

"Kacci te āvuso khamanīyaɱ?|| ||

Kacci yāpanīyaɱ?|| ||

Kacci dukkhā vedanā paṭi-k-kamanti no abhi-k-kamanti?|| ||

Paṭikkamosānaɱ paññāyati no abhi-k-kamo"'" ti?|| ||

"Na me āvuso khamanīyaɱ.|| ||

Na yāpanīyaɱ.|| ||

Bāḷhā me dukkhā vedanā abhi-k-kamaniti no paṭi-k-kamanti.|| ||

Abhi-k-kam'osānaɱ paññāyati no paṭikkamo" ti.|| ||

Atha kho āyasmā Dāsako yena therā bhikkhu ten'upasankami.|| ||

Upasaɱkamitvā there bhikkhū etad avoca:|| ||

"Khemako āvuso, bhikkhū evam āha:|| ||

"Na me āvuso khamanīyaɱ.|| ||

Na yāpanīyaɱ.|| ||

Bāḷhā me dukkhā vedanā abhi-k-kamaniti no paṭi-k-kamanti.|| ||

Abhi-k-kam'osānaɱ paññāyati no paṭikkamo" ti.|| ||

Ehi tvaɱ āvuso Dāsaka, yena Khemako bhikkhu ten'upasankama.|| ||

Upasaɱkamitvā Khemakaɱ bhikkhuɱ evaɱ vadehi:|| ||

"Therā taɱ āvuso Khemaka, evam āhaɱsu:|| ||

"Pañc'ime āvuso upādāna-k-khandhā vuttā Bhagavatā seyyath'īdaɱ:||
rūp'ūpādāna-k-khandho||
vedan'ūpādāna-k-khandho||
saññ'ūpādāna-k-khandho||
sankhār'ūpādāna-k-khandho||
viññāṇ'ūpādāna-k-khandho||
imesu āyasmā Khemako pañcasu upādāna-k-khandhesu||
kiñci attānaɱ vā||
attaniyaɱ vā samanupassatī" ti?|| ||

"Evam āvuso" ti kho āyasmā Dāsako therānaɱ bhikkhūnaɱ paṭissutvā||
yen'āyasmā Khemako ten'upasankami||
upasankamitvā āyasmantaɱ Khemakaɱ etad avoca:|| ||

"Therā taɱ āvuso Khemaka, evam āhaɱsu:|| ||

'Pañc'ime āvuso upādāna-k-khandhā vuttā Bhagavatā seyyath'īdaɱ:||
rūp'ūpādāna-k-khandho||
vedan'ūpādāna-k-khandho||
saññ'ūpādāna-k-khandho||
sankhār'ūpādāna-k-khandho||
viññāṇ'ūpādāna-k-khandho.|| ||

Imesu āyasmā Khemako pañcasu upādāna-k-khandhesu||
kiñci attānaɱ vā||
attaniyaɱ vā samanupassatī' ti?|| ||

[128] "Pañc'ime āvuso upādāna-k-khandhā vuttā Bhagavatā seyyath'īdaɱ:|| ||

Rūp'ūpādāna-k-khandho||
vedan'ūpādāna-k-khandho||
saññ'ūpādāna-k-khandho||
sankhār'ūpādāna-k-khandho||
viññāṇ'ūpādāna-k-khandho||
imesu khvāhaɱ āvuso pañcasu upādāna-k-khandhesu||
na kiñci attānaɱ vā||
attanīyaɱ vā samanupassāmī" ti.|| ||

Atha kho āyasmā Dāsako yena therā bhikkhū ten'upasankami.|| ||

Upasaɱkamitvā there bhikkhū etad avoca:|| ||

"Khemako āvuso bhikkhu evam āha:|| ||

'Pañc'ime āvuso upādāna-k-khandhā vuttā Bhagavatā,||
seyyath'īdaɱ:|| ||

Rūp'ūpādāna-k-khandho||
vedan'ūpādāna-k-khandho||
saññ'ūpādāna-k-khandho||
sankhār'ūpādāna-k-khandho||
viññāṇ'ūpādāna-k-khandho||
imesu khvāhaɱ āvuso pañcasu upādāna-k-khandhesu na kiñci attānaɱ vā attanīyaɱ vā samanupassāmī' ti.|| ||

Ehi tvaɱ āvuso Dāsaka,||
yena Khemako bhikkhu ten'upasankama,||
upasankamitvā Khemakaɱ bhikkhuɱ evaɱ vadehi:|| ||

"Therā taɱ āvuso Khemaka, evam āhaɱsu:|| ||

'Pañc'ime āvuso upādāna-k-khandhā vuttā Bhagavatā, seyyath'īdaɱ:|| ||

Rūp'ūpādāna-k-khandho||
vedan'ūpādāna-k-khandho||
saññ'ūpādāna-k-khandho||
sankhār'ūpādāna-k-khandho||
viññāṇ'ūpādāna-k-khandho.|| ||

No ce kir'āyasmā Khemako imesu pañcasu upādāna-k-khandhesu kiñci attānaɱ vā attanīyaɱ||
vā samanupassati,||
tena'hāyasmā Khemako arahaɱ khīṇ'āsavo'" ti.|| ||

Evam āvuso ti kho āyasmā Dāsako therānaɱ bhikkhūnaɱ paṭissutvā yen'āyasmā Khemako ten'upasankami.|| ||

Upasaɱkamitvā āysamantaɱ Khemakaɱ etad avoca:|| ||

"Therā taɱ āvuso Khemaka, evam āhaɱsu:|| ||

Pañc'ime āvuso upādāna-k-khandhā vuttā Bhagavatā, seyyath'īdaɱ:|| ||

Rūp'ūpādāna-k-khandho||
vedan'ūpādāna-k-khandho||
saññ'ūpādāna-k-khandho||
sankhār'ūpādāna-k-khandho||
viññāṇ'ūpādāna-k-khandho||
no ce kir'āyasmā Khemako imesu pañcasu upādāna-k-khandhesu kiñci attānaɱ vā attanīyaɱ vā samanupassati.|| ||

Tena hāyasmā Khemako arahaɱ khīṇ'āsavo" ti.|| ||

"Pañc'ime āvuso upādāna-k-khandhā vuttā Bhagavatā seyyath'īdaɱ:|| ||

Rūp'ūpādāna-k-khandho||
vedan'ūpādāna-k-khandho||
saññ'ūpādāna-k-khandho||
sankhār'ūpādāna-k-khandho||
viññāṇ'ūpādāna-k-khandho.|| ||

Imesu khohaɱ āvuso pañcasu upādāna-k-khandhesu na kiñci attānaɱ vā attanīyaɱ vā samanupassāmi||
na c'amhi arahaɱ khīṇ'āsavo.|| ||

Api ca me āvuso, pañcasu upādāna-k-khandhesu 'asmī' ti adhigataɱ||
'ayam ahamasmī' ti ca na samanupassāmī" ti.|| ||

[129] Atha kho āyasmā Dāsako yena therā bhikkhū ten'upasankami.|| ||

Upasaɱkamitvā there bhikkhū etad avoca:|| ||

"Khemako āvuso, bhikkhu evam āhaɱ:|| ||

'Pañc'ime āvuso upādāna-k-khandhā vuttā Bhagavatā, seyyath'īdaɱ:|| ||

Rūp'ūpādāna-k-khandho||
vedan'ūpādāna-k-khandho||
saññ'ūpādāna-k-khandho||
sankhār'ūpādāna-k-khandho||
viññāṇ'ūpādāna-k-khandho.|| ||

Imesu khvāhaɱ āvuso pañcasu upādāna-k-khandhesu na kiñci attānaɱ vā attanīyaɱ vā samanupassāmi||
na c'amhi arahaɱ khīṇ'āsavo.|| ||

Api ca me āvuso pañcasu upādāna-k-khandhesu "asamī" ti adhigataɱ,||
"ayam ahamasmī" ti ca na samanupassāmī'" ti.|| ||

"Ehi tvaɱ āvuso Dāsaka, yena Khemako bhikkhu ten'upasankama,||
upasankamitvā Khemakaɱ bhikkhuɱ evaɱ vadehi:|| ||

'Therā taɱ āvuso Khemaka, evam āhaɱsu:|| ||

"Yam etaɱ āvuso Khemaka, 'asmī' ti vadesi,||
kim etaɱ 'asmī' ti vadesi?|| ||

Rūpaɱ 'asmī' ti vadesi||
aññatra rūpā 'asmī' ti vadesi?|| ||

Vedanaɱ 'asmī' ti vadesi||
aññatra vedanāya 'asmī' ti vadesi?|| ||

Saññaɱ 'asmī' ti vadesi||
aññatra saññāya 'asmī' ti vadesi?|| ||

Sankhāre 'asmī' ti vadesi||
aññatra sankhārehi 'asmī' ti vadesi?|| ||

Viññāṇaɱ 'asmī' ti vadesi||
aññatra viññāṇā 'asmī' ti vadesi?|| ||

Yam etaɱ āvuso Khemaka, 'asmī' ti vadesi||
kim etaɱ 'asmī' ti vadesī' ti?|| ||

"Evam āvuso" ti kho āyasmā Dāsako, therānaɱ bhikkhūnaɱ paṭissutvā yen'āyasmā Khemako ten'upasankami,||
upasankamitvā āyasmantaɱ Khemakaɱ etad avoca:|| ||

'Therā taɱ āvuso Khemaka, evam āhaɱsu:|| ||

"Yam etaɱ āvuso Khemaka, 'asmī' ti vadesi,||
kim etaɱ 'asmī' ti vadesi?|| ||

Rūpaɱ 'asmī' ti vadesi||
aññatra rūpā 'asmī' ti vadesi?|| ||

Vedanaɱ 'asmī' ti vadesi||
aññatra vedanāya 'asmī' ti vadesi?|| ||

Saññaɱ 'asmī' ti vadesi||
aññatra saññāya 'asmī' ti vadesi?|| ||

Sankhāre 'asmī' ti vadesi||
aññatra sankhārehi 'asmī' ti vadesi?|| ||

Viññāṇaɱ 'asmī' ti vadesi||
aññatra viññāṇā 'asmī' ti vadesi?|| ||

Yam etaɱ āvuso Khemaka, 'asmī' ti vadesi||
kim etaɱ 'asmī' ti vadesī'" ti?|| ||

"Alaɱ āvuso Dāsaka, kiɱ imāya sandhāvanikāya,||
āharāvuso daṇḍaɱ aham eva yena therā bhikkhū ten'upasankamissāmī" ti?|| ||

Atha kho āyasmā Khemako, daṇḍam olubbha yena therā bhikkhū ten'upasankami,||
upasankamitvā therehi bhikkhūhi saddhiɱ sammodi.|| ||

Sammodanīyaɱ kathaɱ sārāṇīyaɱ visāretvā eka-m-antaɱ nisīdi.|| ||

[130] Eka-m-antaɱ nisinnaɱ kho āyasmantaɱ Khemakaɱ therā bhikkhū etad avocuɱ:|| ||

"Yam etaɱ āvuso Khemaka, 'asmī' ti vadesi,||
kim etaɱ 'asmī' ti vadesi?|| ||

Rūpaɱ 'asmī' ti vadesi||
aññatra rūpā 'asmī' ti vadesi?|| ||

Vedanaɱ 'asmī' ti vadesi||
aññatra vedanāya 'asmī' ti vadesi?|| ||

Saññaɱ 'asmī' ti vadesi||
aññatra saññāya 'asmī' ti vadesi?|| ||

Sankhāre 'asmī' ti vadesi||
aññatra sankhārehi 'asmī' ti vadesi?|| ||

Viññāṇaɱ 'asmī' ti vadesi||
aññatra viññāṇā 'asmī' ti vadesi?|| ||

Yam etaɱ āvuso Khemaka, 'asmī' ti vadesi||
kim etaɱ 'asmī' ti vadesī" ti?|| ||

Na khvāhaɱ āvuso rūpaɱ 'asmi' ti vadāmi||
aññatra rūpaɱ 'asmi' ti vadāmi.|| ||

Na vedanaɱ 'asmi' ti vadāmi||
na pi aññatra vedanāya 'asmi' ti vadāmi.|| ||

Na saññaɱ 'asmi' ti vadāmi||
na pi aññatra saññāya 'asmi' ti vadāmi.|| ||

Na sankhāre 'asmi' ti vadāmi||
na pi aññatra sankhārehi 'asmi' ti vadāmi.|| ||

Na viññāṇaɱ 'asmi' ti vadāmi||
na pi aññatra viññāṇā 'asmi' ti vadāmi.|| ||

Api ca me āvuso pañcasu upādāna-k-khandhesu 'asamī' ti||
adhigataɱ 'ayam aham asmi' ti na ca samanupassāmi.|| ||

Seyyathā pi āvuso, uppalassa vā||
padumassa vā||
puṇḍarīkassa vā gandho.|| ||

Yo nu kho evaɱ vadeyya:|| ||

'Pattassa gandho' ti vā||
'vaṇṇassa gandho' ti vā||
'kiñjakkhassa gandho' ti vā||
sammā nu kho so vadamāno vadeyyā" ti?|| ||

"No h'etaɱ āvuso."|| ||

"Yathā katham pan'āvuso,||
sammā vyākaramāno vyākareyyā" ti?|| ||

'Pupphassa gandho' ti kho āvuso,||
sammā vyākaramāno vākareyyāti.|| ||

Evam eva khohaɱ āvuso,||
na rūpaɱ 'asmī' ti vadāmi||
na pi aññatra rūpaɱ 'asmī' ti vadāmi.|| ||

Na vedanaɱ 'asmī' ti vadāmi||
na pi aññatra vedanāya 'asmi' ti vadāmi.|| ||

Na saññaɱ 'asmī' ti vadāmi||
na pi aññatra saññā 'asmī' ti vadāmi.|| ||

Na sankhāre 'asmī' ti vadāmi||
na pi aññatra sankhārehi 'asmī' ti vadāmi.|| ||

Na viññāṇaɱ 'asmī' ti vadāmi||
na pi aññatra viññāṇā 'asmi' ti vadāmi.|| ||

Api ca me āvuso pañcasu upādāna-k-khandhesu 'asmi' ti||
adhigataɱ 'ayam aham asmī' ti na ca samanupassāmi.|| ||

Kiñcā pi āvuso, ariya-sāvakassa pañc'ora-m-bhāgiyāni saŋyojanāni pahīnāni bhavanti||
atha khvassa hoti yeva pañcasu upādāna-k-khandhesu aṇusahagato||
'asmi' ti māno||
'asmi' ti chando||
'asmi' ti anusayo asamūhato.|| ||

So aparena samayena pañcasu upādāna-k-khandhesu udayabbayānupassī viharati:|| ||

"Iti rūpaɱ||
iti rūpassa samudayo,||
iti [131] rūpassa attha-gamo:|| ||

iti vedanā||
iti vedanāya samudayo,||
iti vedanāya attha-gamo,|| ||

iti saññā,||
iti saññāya samudayo,||
iti sa ññāya attha-gamo,|| ||

iti sankhārā||
iti sankhāre samudayo,||
iti sankhāre attha-gamo,|| ||

iti viññāṇaɱ||
iti viññāṇassa samudayo,||
iti viññāṇassa attha-gamo ti.|| ||

Tassa imesu pañcasu upādāna-k-khandhesu udayabbayānupassino viharato yo pissa hoti pañcasu upādāna-k-khandhesu aṇusahagato||
'asmi' ti māno||
'asmī' ti chando||
'asmi' ti anusayo asamūhato,||
so pi samugghātaɱ gacchati.|| ||

Seyyathā pi āvuso, vatthaɱ saɱkiliṭṭhaɱ malaggahitaɱ.|| ||

Tam enaɱ sāmikā rajakassa anuppadajjuɱ,||
tam enaɱ rajako ūse vā||
khāre vā||
gomaye vā samam madditvā acche udake vikkhāleti.|| ||

Kiñ cāpi taɱ hoti vatthaɱ parisuddhaɱ pariyodātaɱ||
atha khvassa hoti yo ca aṇusahagato ūsagandho vā||
khāragandho vā||
gomayagandho vā asamūhato,||
tam enaɱ rajako sāmikānaɱ deti||
tam enaɱ sāmikā gandhaparibhāvite karaṇḍake nikkhipanti||
yo pissa hoti aṇusahagato ūsagandho vā||
khāragandho vā||
gomayagandho vā asamuhato||
so pi samugghātaɱ gacchati.|| ||

Evam eva kho āvuso, kiñcā pi ariya-sāvakassa pañc'ora-m-bhāgiyāni saŋyojanāni pahīnāni bhavanti||
atha khvassa hoti yo ca pañcasu upādāna-k-khandhesu aṇusahagato 'asmī' ti māno||
'asmī' ti chando||
'asmī' ti anusayo asamūhato,||
so aparena samayena pañcasu upādāna-k-khandhesu udayabbayānupassi viharati:|| ||

"Iti rūpaɱ||
iti rūpassa samudayo,||
iti rūpassa attha-gamo,|| ||

iti vedanā||
iti vedanāya samudayo,||
iti vedanāya attha-gamo,|| ||

iti saññā,||
iti saññassa samudayo,||
iti saññassa attha-gamo,|| ||

iti sankhārā||
iti sankhāre samudayo,||
iti sankhāre attha-gamo,|| ||

iti viññāṇaɱ||
iti viññāṇassa samudayo,||
iti viññāṇassa attha-gamoti.|| ||

Tassa imesu pañcasu upādāna-k-khandhesu udayabbayānupassino viharato yo pissa hoti pañcasu upādāna-k-khandhesu aṇusahagato||
'asmi' ti māno||
'asmī' ti chando||
'asmi' ti anusayo asamūhato,||
so pi samugghātaɱ gacchatī" ti.|| ||

Evaɱ vutte therā bhikkhū āyasmantaɱ Khemakaɱ etad avocuɱ:|| ||

"Na kho mayaɱ āyasmantaɱ Khemakaɱ [132] vihesā apekhā āpucchimhā||
api cāyasmā Khemako pahoti tassa Bhagavato sāsanaɱ vitthārena ācikkhituɱ desetuɱ paññapetuɱ paṭṭhapetuɱ vivarituɱ vibhajituɱ uttānīkātuɱ.|| ||

Tayidaɱ āysamatā Khemakena tassa Bhagavato sāsanaɱ vitthārena ācikkhitaɱ desitaɱ paññapitaɱ paṭṭhapitaɱ vivaṭaɱ vibhattaɱ uttānīkatan" ti.|| ||

Idam avoca āyasmā Khemako,||
attamanā therā bhikkhū āyasmato Khemakassa bhāsitaɱ abhinanduɱ.|| ||

Imasmiñ ca pana veyyā-karaṇasmiɱ bhaññamāne saṭṭhimattānaɱ therānaɱ bhikkhūnaɱ anupādāya āsavehi cittāni mucciɱsu āyasmato Khemakassa cāti.|| ||

 


Contact:
E-mail
Copyright Statement