Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.4. Thera Vagga

Sutta 90

Channa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[132]

[1][pts][than][bodh] Evaɱ me sutaɱ:|| ||

Ekaɱ samayaɱ sambahulā therā bhikkhū Bārāṇasiyaɱ viharanti||
Isipatane Migadāye.|| ||

Atha kho āyasmā Channo sāyaṇhasamayaɱ paṭisallāṇā vuṭṭhito avāpūraṇaɱ||
ādāya vihārena vihāraɱ||
upasaɱkamitvā there bhikkhū etad avoca:|| ||

"Ovadantu maɱ āyasmanto therā anusāsantu maɱ āyasmanto therā.|| ||

Karontu me āyasmanto therā dhammiɱ kathaɱ yathā'haɱ dhammaɱ passeyyan" ti.|| ||

Evaɱ vutte āyasmantaɱ Channaɱ therā bhikkhū etad avocuɱ:|| ||

"Rūpaɱ kho āvuso Channa, aniccaɱ,||
vedanā aniccā,||
saññā aniccā,||
saɱkhārā aniccā,||
viññāṇaɱ aniccaɱ|| ||

Rūpaɱ anantā,||
vedanā anattā,||
saññā anattā,||
saɱkhārā anattā,||
viññāṇaɱ anattā.|| ||

Sabbe saɱkhārā aniccā,||
sabbe dhammā anttā" ti.|| ||

Atha kho āysmato Channassa etad ahosi:|| ||

"Mayham pi kho etaɱ evaɱ hoti:|| ||

Rūpaɱ aniccaɱ,||
vedanā aniccā,||
saññā aniccā,||
saɱkhārā aniccā,||
viññāṇaɱ aniccaɱ.|| ||

Rūpaɱ anantā,||
[133] vedanā anattā,||
saññā anattā,||
saɱkhārā anattā,||
viññāṇaɱ anattā.|| ||

Sabbe saɱkhārā aniccā,||
sabbe dhammā anattā.|| ||

Atha ca pana me sabbasaɱkhāra samathe sabbūpadhipaṭinissagge taṇhakkhaye virāge nirodhe nibbāne cittaɱ na pakkhandati nappasīdati na santiṭṭhati nāvimuccati paritassanā||
upādānaɱ uppajjati,||
paccudāvattati mānasaɱ,||
atha kho carahi me attāti,||
na kho panetaɱ -||
dhammaɱ passato hoti:|| ||

Ko nu kho me tathā dhammaɱ deseyya yathā'haɱ dhammaɱ passeyyan" ti.|| ||

Atha kho āyasmato Channassa etad ahosi:|| ||

"Ayaɱ kho āymā Ānando Kosambiyaɱ viharati Ghositārāme.|| ||

Satthu c'eva saɱvaṇṇito sambhāvito ca viññūṇaɱ sabrahmacārīnaɱ||
pahoti ca me āyasmā Ānando tathā dhammaɱ desetaɱ yathā'haɱ dhammaɱ passeyyaɱ.|| ||

Atthi ca me āyasmante Ānande tāvatikā visaṭṭhi yaɱ nūnāhaɱ yenāyasmā Ānando ten'upasaŋkameyyan" ti.|| ||

Atha kho āysamā Channo senāsanaɱ saɱsāmetvā pattacīvaramādāya yena Kosambi Ghositārāmo,||
yenāyasmā Ānando ten'upasaɱkami.|| ||

Upasaɱkamitvā āyasmatā Ānandena saddhiɱ sammodi.|| ||

Sammodanīyaɱ kathaɱ sārāṇīyaɱ visāretvā eka-m-antaɱ nisīdi.|| ||

Ekamanataɱ nisinno kho āyasmā Channo āyasmantaɱ Ānandaɱ etad avoca:|| ||

"Ekam idāhaɱ āvuso Ānanda,||
samayaɱ Bārāṇasiyaɱ viharāmi Isipatane Migadāye.|| ||

Atha kho ahaɱ āvuso sāyaṇhasamayaɱ paṭisallāṇā vuṭṭhito avāpūraṇaɱ ādāya vihārena vihāraɱ upasaɱkamiɱ.|| ||

Upasaɱkamitvā there bhikkhū etad avocuɱ:|| ||

"Ovadantu maɱ āyasmanto therā||
anusāsantu maɱ āyasmanto therā,||
karontu me āyasmanto therā||
dhammiɱ kathaɱ yathā'haɱ dhammaɱ passeyyan" ti.|| ||

Evaɱ vutte maɱ āvuso,||
therā bhikkhū etad avocuɱ:|| ||

Rūpaɱ kho āvuso Channa, aniccaɱ,||
vedanā aniccā,||
saññā aniccā,||
saɱkhārā aniccā,||
viññāṇaɱ aniccaɱ.|| ||

Rūpaɱ anantā,||
vedanā anattā,||
saññā anattā,||
saɱkhārā anattā,||
viññāṇaɱ anattā.|| ||

Sabbe saɱkhārā aniccā,||
sabbe dhammā anattā" ti.|| ||

Tassa mayhaɱ āvuso, etad ahosi:|| ||

"Mayham pi kho [134] etaɱ evaɱ hoti:|| ||

Rūpaɱ aniccaɱ,||
vedanā aniccā,||
saññā aniccā,||
saɱkhārā aniccā,||
viññāṇaɱ aniccaɱ.|| ||

Rūpaɱ anantā,||
vedanā anattā,||
saññā anattā,||
saɱkhārā anattā,||
viññāṇaɱ anattā.|| ||

Sabbe saɱkhārā aniccā,||
sabbe dhammā anattā" ti.|| ||

Atha ca pana me sabbasaɱkhārasamathe sabbūpadhipaṭinissagge taṇhakkhaye virāge nirodhe nibbāne cittaɱ na pakkhandati nappasīdati||
na santiṭṭhati||
nā vimuccati paritassanā||
upādānaɱ uppajjati paccudāvattati mānasaɱ.|| ||

Atha kho carahi me attāti.|| ||

Na kho pan'etaɱ dhammaɱ passato hoti,||
ko nu kho me tathā dhammaɱ deyeyya yathā'haɱ dhammaɱ passeyyan" ti.|| ||

Tassa mayhaɱ āvuso, etad ahosi:|| ||

"Ayaɱ kho āysamā Ānando Kosambiyaɱ viharati Ghositārāme||
satthu c'eva saɱvaṇṇito sambhāvito ca viññūnaɱ sabrahmacārinaɱ pahoti ca me āyasmā Ānando tathā dhammaɱ desetuɱ,||
yathā'haɱ dhammaɱ passeyyaɱ.|| ||

Atthi ca me āyasmante Ānande tāvatikā vissaṭṭhi,||
yaɱ nūnāhaɱ yenāyasmā Ānando ten'upasaɱkameyyan" ti.|| ||

Ovadatu maɱ āyasmā Ānando,||
anusāsatu maɱ āyasmā Ānando,||
karotu me āyasmā Ānando dhammiɱ kathaɱ,||
yathā'haɱ dhammaɱ passeyyanti.|| ||

Ettakena pi mayaɱ āyasmato Channassa attamanā||
api nāma taɱ āyasmā Channo āvī akāsi khilaɱ pabhindi,||
odahāvuso Channa sotaɱ||
bhabbo si dhammaɱ viññātun" ti.|| ||

Atha kho āysamato Channassa tāvataken eva uḷāraɱ pītipāmojjaɱ uppajji.|| ||

Bhabbo kirasmi dhammaɱ viññātun" ti.|| ||

Sammukhā me taɱ āvuso Channa,||
Bhagavato sutaɱ sammukhā ca paṭiggahitaɱ Kaccānagottaɱ bhikkhuɱ ovadantassa|| ||

'Dvayanissito khoyaɱ Kaccāna, loko [135] yebhuyyena atthi tañ ce va n'atthi tañ ca.|| ||

Lokasamudayaɱ kho Kaccāna yathābhūtaɱ sammappaññāya passato yā loke n'atthitā sā na hoti.|| ||

Lokanirodhaɱ kho Kaccāna yathābhūtaɱ sammappaññāya passato yā loke atthitā sā na hoti.|| ||

Upayūpādānābhinivesavinibandho khāyaɱ Kaccāna, loko yebhuyyena,||
tañ cāyaɱ upayūpādānaɱ cetaso adhiṭṭhānābhinivesānusayaɱ na upeti,||
na upādiyati||
na adhiṭṭhāti||
"attā me" ti.|| ||

"Dukkham eva uppajjamānaɱ uppajjati||
dukkhaɱ niruddhamānaɱ nirujjhatī" ti.|| ||

Na kaŋkhati||
na vicikicchati||
aparapaccayā ñāṇam evassa ettha hoti.|| ||

Ettavatā kho Kaccāna sammādiṭṭhi hoti.|| ||

"Sabbam atthi" ti kho Kaccāna, ayam eko anto.|| ||

"Sabbaɱ n'atthi" ti kho ayaɱ dutiyo anto.|| ||

Ete te Kaccāna, ubho ante anupagamma majjhena Tathāgato dhammaɱ deseti:|| ||

"Avijjā-paccayā saɱkhārā,||
saɱkhārā-paccayā viññāṇaɱ,||
viññāṇa-paccayā nāmarūpaɱ,||
nāma-rūpa-paccayā saḷāyatanaɱ,||
saḷāyatana-paccayā phasso,||
phassa-paccayā vedanā,||
vedanā-paccayā taṇhā,||
taṇhā-paccayā upādānaɱ,||
upadāna-paccayā bhavo,||
bhava-paccayā jāti,||
jāti-paccayā jarā-maraṇaɱ soka-parideva-dukkha-domanass'-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

Avijjāya tv eva asesavirāganirodhā saɱkhāranirodho,||
saɱkhāranirodhā viññāṇanirodho,||
viññāṇanirodhā nāmarūpanirodho,||
nāmarūpanirodhā saḷāyatananirodho,||
saḷāyatanirodhā phassanirodho,||
phassanirodhā vedanānirodho,||
vedanānirodhā taṇhānirodho,||
taṇhānirodhā upādānanirodho,||
upādānanirodhā bhavanirodho,||
bhavanirodhā jātinirodho,||
jātinirodhā jarā-maraṇaɱ soka-parideva-dukkha-domanass'-upāyāsā nirujjhanti.

Evam etassa kevalassa dukkhakkhandhassa nirodho hotī'" ti.|| ||

"Evam etaɱ āvuso Ānanda hohi,||
yesaɱ āyasmantānaɱ tādisā sabrahmacārayo anukampakā attakāmā ovādakā anusāsakā.|| ||

Idañ ca pana me āyasmato Ānandassa dhammadesanaɱ sutvā dhammo abhisameto" ti.|| ||

 


Contact:
E-mail
Copyright Statement   Webmaster's Page