Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.5. Puppha Vagga

Sutta 95

Pheṇa-Piṇḍ'ūpama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Ayujjhāyaɱ - viharati Gaɱgāya nadiyā tīre.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti||
te bhikkh Bhagavato paccassosuɱ|| ||

Bhagavā etad avoca:|| ||

"Seyyathā pi bhikkhave, ayaɱ Gaɱgā nadī mahantaɱ pheṇapiṇḍaɱ āvaheyya.|| ||

Tam enaɱ cakkhumā puriso passeyya nijjhāyeyya yoniso upaparikkheyya.|| ||

Tassa taɱ passato nijjhāyato yoniso upaparikkhato rittakaññeva khāyeyya||
tucchakaññeva khāyeyya,||
asārakaññeva khāyeyya||
kiɱ hi siyā bhikkhave pheṇapiṇḍe sāro?|| ||

Evam eva kho bhikkhave,||
yaɱ kiñci rūpaɱ||
atītānāgatam paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
taɱ [141] bhikkhu passati nijjhāyati yoniso upaparikkhati.|| ||

Tassa taɱ passato nijjhāyato yoniso upaparikkhato rittakaññeva khāyati||
tucchakaññeva khāyati||
asārakaññeva khāyati||
kiɱ hi siyā bhikkhave rūpe sāro?|| ||

Seyyathā pi bhikkhave, saradasamaye thullaphusitake deve vassante udake udake bubbuḷaɱ uppajjati c'eva nirujjhati ca.|| ||

Tam enaɱ cakkhumā puriso passeyya nijjhāyeyya yoniso upaparikkheyya.|| ||

Tassa taɱ passato nijjhāyato yoniso upaparikkhato rittakaññeva khāyeyya||
tucchakaññeva khāyeyya,||
asārakaññeva khāyeyya||
kiɱ hi siyā bhikkhave udaka bubbuḷe sāro?|| ||

Evam eva kho bhikkhave, yā kāci vedanā||
atītānāgatam paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
taɱ bhikkhu passati nijjhāyati yoniso upaparikkhati.|| ||

Tassa taɱ passato nijjhāyato yoniso upaparikkhato rittakaññeva khāyati||
tucchakaññeva khāyati||
asārakaññeva khāyati||
kiɱ hi siyā bhikkhave vedanāya sāro?|| ||

Seyyathā pi bhikkhave, gimhānaɱ pacchime māse ṭhite majjhantike kāle marīcikā.|| ||

Tam enaɱ cakkhumā puriso passeyya nijjhāyeyya yoniso upaparikkheyya.|| ||

Tassa taɱ passato nijjhāyato yoniso upaparikkhato rittakaññeva khāyeyya||
tucchakaññeva khāyeyya,||
asārakaññeva khāyeyya||
kiɱ hi siyā bhikkhave marīcikāya sāro?|| ||

Evam eva kho bhikkhave, yā kāci saññā||
atītānāgatam paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
taɱ bhikkhu passati nijjhāyati yoniso upaparikkhati.|| ||

Tassa taɱ passato nijjhāyato yoniso upaparikkhato rittakaññeva khāyati||
tucchakaññeva khāyati||
asārakaññeva khāyati||
kiɱ hi siyā bhikkhave saññāya sāro?|| ||

Seyyathā pi bhikkhave, puriso sāratthiko sāragavesī sārapariyesanaɱ caramāno tiṇhaɱ kuṭhāriɱ ādāya vanaɱ paviseyya,||
so tattha passeyya mahantaɱ kadalikkhandhaɱ ujuɱ navaɱ akukkukajātaɱ||
tam enaɱ mūle chindeyya,||
mūle chetvā agge chindeyya,||
agge chetvā pattavaṭṭiɱ vinibbhujeyya,||
so tassa pattavaṭṭiɱ vinibbhujanto pheggum pi nādhigaccheyya||
kuto sāraɱ?

Tam enaɱ cakkhumā puriso passeyya nijjhāyeyya yoniso upaparikkheyya.|| ||

Tassa taɱ passato nijjhāyato yoniso [142] upaparikkhato rittakaññeva khāyeyya||
tucchakaññeva khāyeyya,||
asārakaññeva khāyeyya||
kiɱ hi siyā bhikkhave kadalikkhandhe sāro?|| ||

Evam eva kho bhikkhave, ye keci saɱkhārā||
atītānāgatam paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
taɱ bhikkhu passati nijjhāyati yoniso upaparikkhati.|| ||

Tassa taɱ passato nijjhāyato yoniso upaparikkhato rittakaññeva khāyati||
tucchakaññeva khāyati||
asārakaññeva khāyati||
kiɱ hi siyā bhikkhave saɱkhāresu sāro?|| ||

Seyyathā pi bhikkhave, māyākāro vā māyākārantevāsī vā mahāpathe māyāɱ vidaɱseyya,||
tam enaɱ cakkhumā puriso passeyya nijjhāyeyya yoniso upaparikkheyya.|| ||

Tassa taɱ passato nijjhāyato yoniso upaparikkhato rittakaññeva khāyeyya||
tucchakaññeva khāyeyya,||
asārakaññeva khāyeyya||
kiɱ hi siyā bhikkhave māyāya sāro?|| ||

Evam eva kho bhikkhave, yaɱ kiñci viññāṇaɱ||
atītānāgatam paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
taɱ bhikkhu passati nijjhāyati yoniso upaparikkhati.|| ||

Tassa taɱ passato nijjhāyato yoniso upaparikkhato rittakaññeva khāyati||
tucchakaññeva khāyati||
asārakaññeva khāyati||
kiɱ hi siyā bhikkhave viññāṇe sāro?|| ||

Evaɱ passaɱ bhikkhave, sutavā ariyasāvako||
rūpasmiɱ nibbindati||
vedanāya pi nibbindati||
saññāya pi nibbindati||
sankhāresu pi nibbindati||
viññāṇasmim pi nibbindati||
nibbindaɱ virajjati||
virāgā vimuccati||
vimuttasmim vimuttam iti ñāṇaɱ hoti:|| ||

'Khīṇā jāti||
vusitam brahmacariyaɱ||
kataɱ karaṇīyaɱ||
nāparam itthattāyā' ti pajānātī" ti.|| ||

Idam avoca Bhagavā.|| ||

Idaɱ vatvā sugato athāparaɱ etad avoca satthā:

"Pheṇapiṇḍūpamaɱ rūpaɱ||
vedanā bubbuḷupamā||
Marīcikūpamā saññā||
saɱkhārā kadalūpamā,||
Māyūpamañ ca viññāṇaɱ||
dīpitā diccabandhunā.

Yathā yathā nijjhāyati||
yoniso upaparikkhati,||
Rittakaɱ tucchakaɱ hoti||
yo naɱ passati yoniso

Yo [143] Imaɱ kāyaɱ ārabbha||
bhūripaññena desitaɱ,||
Pahānaɱ tiṇṇaɱ dhammānaɱ||
rūpaɱ passetha chaḍḍhitaɱ.

Āyu usmā ca viññāṇaɱ||
yadā kāyaɱ jahantimaɱ||
Apaviddho tadā seti||
parabhattaɱ acetanaɱ.

Etādisāyaɱ santāno||
māyāyaɱ bālalāpinī,||
Vadhako eso akkhāto||
sāro ettha na vijjati.

Evaɱ khandhe avekkheyya||
bhikkhu āraddhavīriyo,||
Divāvāya divā-rattiɱ||
sampajāno patissato.

Jaheyya sabbasaññyogaɱ||
kareyya saraṇattano,||
Careyyādittasīso va||
patthayaɱ accutaɱ padan" ti.|| ||

 


Contact:
E-mail
Copyright Statement   Webmaster's Page