Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.5. Puppha Vagga

Sutta 96

Gomaya-Piṇḍ'upama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññataro bhikkhu yena Bhagavā ten'upasaɱkami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu Bhagavantaɱ etad avoca:|| ||

"Atthi nu kho bhante, kiñci rūpaɱ yaɱ rūpaɱ||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati?|| ||

Atthi nu kho bhante, kāci vedanā yā vedanā||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati?|| ||

Atthi nu kho bhante, kāci saññā yā saññā||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati?|| ||

Atthi nu kho bhante, keci saɱkhārā ye saɱkhārā||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati?|| ||

Atthi nu kho bhante, kiñci viññāṇaɱ yaɱ viññāṇaɱ||
[144] niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati" ti?|| ||

"N'atthi kho bhikkhu, kiñci rūpaɱ yaɱ rūpaɱ||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati.|| ||

N'atthi kho bhikkhu, kāci vedanā yā vedanā||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati.|| ||

N'atthi kho bhikkhu, kāci saññā yā saññā||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati.|| ||

N'atthi kho bhikkhu, keci saɱkhārā ye saɱkhārā||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati.|| ||

N'atthi kho bhikkhu, kiñci viññāṇaɱ, yaɱ viññāṇaɱ||
niccaɱ||
dhuvaɱ||
sassataɱ,||
avipariṇāma-dhammaɱ||
sassatisamaɱ tath'eva ṭhassati" ti.|| ||

 


 

14. Atha kho Bhagavā parittaɱ gomayapiṇḍaɱ pāṇinā gahetvā taɱ bhikkhuɱ etad avoca:|| ||

"Ettako pi kho bhikkhu, attabhāvapaṭilābho||
n'atthi nicco||
dhuvo||
sassato||
aviparināmadhammo,||
ettako ce pi bhikkhu,||
attabhāvapaṭilābho abhavissa||
nicco||
dhuvo||
sassato||
aviparināmadhammo||
nayidaɱ brahmacariyavāso paññāyetha sammā dukkhakkhayāya,||
yasmā ca kho bhikkhu, ettako pi attabhāvapaṭilābho||
n'atthi||
nicco||
dhuvo||
sassato||
aviparināmadhammo||
tasmā brahmacariyavāso paññāyati sammā dukkhakkhayāya.|| ||

Bhutapubbāhaɱ bhikkhu,||
rājā ahosiɱ khattiyo muddhāvasitto.|| ||

Tassa mayhaɱ bhikkhu,||
rañño sato khattiyassa muddhāvasittassa caturāsīti||
nagarasahassāni ahesuɱ Kusāvatī nāma rājadhānippamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
pāsādasahassāni ahesuɱ dhammapāsādappamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
kuṭāgārasahassati ahesuɱ mahābyūhakuṭāgārappamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
pallaŋkasahassāni ahesuɱ||
dantamayāni||
sāramayāni||
sovaṇṇamayāni||
rūpiyamayāni||
gonakatthatāni||
paṭikatthatāni||
paṭalikatthatāni||
kādalimiga pava- [145] rapaccattharaṇāni||
sauttaracchadāni||
ubhato lohitakupadhānāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
pallaɱkasahassāni ahesuɱ||
sovaṇṇālaɱkārāni||
sovaṇṇaddhajāni||
hemajālapaṭicchannāni||
Uposatha nāgarājappamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
pallaɱkasahassāni ahesuɱ||
sovaṇṇālaɱkārāni||
sovaṇṇaddhajāni||
hemajālapaṭicchantāni||
Valāhakaassarājappamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
pallaɱkasahassāni ahesuɱ||
sovaṇṇālaɱkārāni||
sovaṇṇaddhajāni||
hemajālapaṭacchantāni||
Vejayantarathappamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
maṇisahassāni ahesuɱ maṇiratanappamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
itthisahassāni ahesuɱ subhaddādevippamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
khattiyasahassāni ahesuɱ anuyuttāni parināyakaratanappamukhāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
dhenusahassāni ahesuɱ dukūlasandanāni kaɱsupadhāraṇāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
vatthakoṭisahassāni ahesuɱ:||
khomasukhumāni||
koseyyasukhumāni||
kambalasukhumāni||
kappāsikasukhumāni.|| ||

Tassa mayhaɱ bhikkhu, rañño sato khattiyassa muddhāvasittassa caturāsīti||
thālipākasahassāni ahesuɱ sāyaɱ pātaɱ bhattābhihāro abhiharittha.|| ||

Tesaɱ kho pana bhikkhu, caturāsītiyā||
nagarasahassānaɱ ekaɱ yeva taɱ nagaraɱ hoti||
yamahaɱ tena samayena ajjhāvasāmi kusāvatī rājadhāni.|| ||

Tesaɱ kho pana bhikkhu, caturāsītiyā||
pasādasahassānaɱ [146] ekoyeva pāsādo hoti||
yamahaɱ tena samayena ajjhāvasāmi dhammapāsādo.|| ||

Tesaɱ kho pana bhikkhu, caturāsītiyā||
kuṭāgārasahassānaɱ ekaɱ yeva taɱ kuṭāgāraɱ hoti||
yamahaɱ tena samayena ajjhāvasāmi mahākhyuhaɱ kuṭāgāraɱ.|| ||

Tesaɱ kho pana bhikkhu, caturāsītiyā||
pallaɱkasahassānaɱ ekoyeva so pallaɱko hoti yamahaɱ tena samayena paribhuñjāmi dantamayo vā sāramayo vā sovaṇṇamayo vā rūpiyamayo vā.|| ||

Tesaɱ kho pana bhikkhu, caturāsītiyā||
nagarasahassānaɱ ekoyeva so nāgo hoti||
yamahaɱ tena samayena abhiruhāmi uposatho nāgarājā.|| ||

Tesaɱ kho pana bhikkhu, caturāsītiyā||
assasahassānaɱ ekoyeva so asso hoti||
yamahaɱ tena samayena abhiruhāmi valāhako assarājā.|| ||

Tesaɱ kho pana bhikkhu, caturāsītiyā||
rathasahassānaɱ ekoyeva so ratho hoti||
yamahaɱ tena samayena abhiruhāmi vejayanto ratho.|| ||

Tesaɱ kho pana bhikkhu, caturāsītiyā||
itthisahassānaɱ ekoyeva sā itthi hoti||
yā maɱ tena samayena paccupaṭṭhāti khattiyā vā velāmikā vā.|| ||

Tesaɱ kho pana bhikkhu, caturāsītiyā||
vatthakoṭisahassānaɱ ekaɱ yeva taɱ vatthayugaɱ hoti||
yamahaɱ tena samayena paridahāmi||
khomasukhumaɱ vā||
koseyyasukhumaɱ vā||
kambalasukhumaɱ vā||
kappāsikasukhumaɱ vā.|| ||

Tesaɱ kho pana bhikkhu, caturāsītiyā||
thālipākasahassānaɱ ekoyeva so thālipāko hoti||
yato nāḷikodanaparamaɱ bhuñjāmi tadupiyañ ca supeyyaɱ.|| ||

Iti kho bhikkhū, sabbe te saɱkhārā||
atītā niruddhā,||
viparinatā.|| ||

Evaɱ aniccā kho bhikkhu, saɱkhārā,||
evaɱ addhuvā kho bhikkhu saɱkhārā,||
evaɱ anassāsikā kho bhikkhu saɱkhārā,||
[147] yāvañ c'idaɱ bhikkhu, alam eva sabbasaɱkhāresu nibbindituɱ||
alaɱ virajjituɱ alaɱ vimuccitun" ti.|| ||

 


Contact:
E-mail
Copyright Statement   Webmaster's Page