Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.5. Puppha Vagga

Sutta 101

Vāsijaṭopama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][than][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti||
te bhikkh Bhagavato paccassosuɱ|| ||

Bhagavā etad avoca:|| ||

"Jānato'haɱ bhikkhave, passato āsavānaɱ khayaɱ vadāmi.|| ||

No ajānato no apassato.|| ||

Kiñ ca bhikkhave, jānato||
kiɱ passato āsavānaɱ khayo hoti?|| ||

Iti rūpaɱ||
iti rūpassa samudayo||
iti rūpassa atthagamo.|| ||

Evaɱ kho bhikkhave, jānato||
evaɱ passato āsavānaɱ khayo hoti.|| ||

Iti vedanā||
iti vedanāya samudayo||
iti vedanāya atthagamo.|| ||

Evaɱ kho bhikkhave, jānato||
evaɱ passato āsavānaɱ khayo hoti.|| ||

Iti saññā||
iti saññassa samudayo||
iti saññassa atthagamo.|| ||

Evaɱ kho bhikkhave, jānato||
evaɱ passato āsavānaɱ khayo hoti.|| ||

Iti saɱkhārā||
iti saɱkhārassa samudayo||
iti saɱkhārassa atthagamo.|| ||

Evaɱ kho bhikkhave, jānato||
evaɱ passato āsavānaɱ khayo hoti.|| ||

Iti viññāṇaɱ,||
iti viññāṇassa samudayo||
iti viññāṇassa [153] atthagamoti.|| ||

Evaɱ kho bhikkhave, jānato||
evaɱ passato āsavānaɱ khayo hoti.|| ||

 


 

Bhāvanānuyogam ananuyuttassa bhikkhave, bhikkhuno viharato kiñ cā pi evaɱ icchā uppajjeyya:|| ||

'Aho vata me anupādāya āsavehi cittaɱ vimucceyyā' ti.|| ||

atha khvassa n'eva anupādāya āsavehi cittaɱ vimuccati.|| ||

Taɱ kissa hetu?|| ||

Abhāvitattā tissa vacanīyaɱ.|| ||

Kīssa abhāvitattā?|| ||

Abhāvitattā catunnaɱ satipaṭṭhānānaɱ,||
abhāvitattā catunnaɱ sammappadhānānaɱ,||
abhāvitattā catunnaɱ iddhīpādānaɱ,||
abhāvitattā pañcannaɱ indriyānaɱ,||
abhāvitattā pañcannaɱ balānaɱ,||
abhāvitattā sattannaɱ bojjhaɱgānaɱ,||
abhāvitattā ariyassa aṭṭhaŋgikassa maggassa.|| ||

Seyyathā pi bhikkhave, kukkuṭiyā aṇḍāni aṭṭha vā dasa vā dvādasa vā tānassu kukkuṭiyā na sammā adhisayitāni na sammā pariseditāni na sammā paribhāvitāni.|| ||

Kiñ cā pi tassā kukkuṭiyā evaɱ icchā uppajjeyya:|| ||

'Aho vata me kukkuṭapotakā pādanakhasikhāya vā mukhatuṇḍakena vā aṇḍakosaɱ padāletvā sotthinā abhinibbhijjeyyun' ti.|| ||

Atha kho abhabbā va te kukkuṭapotakā pādanakhasikhāya vā mukhatuṇḍakena vā aṇḍakosaɱ padāletvā sotthinā abhinibbhijjituɱ.|| ||

Taɱ kisasa hetu?|| ||

Tathā hi pana bhikkhave, kukkuṭiyā aṇḍāni aṭṭha vā dasa vā dvādasa vā tāni kukkuṭiyā na sammā adhisayitāni na sammā pariseditāni na sammā paribhāvitāni.|| ||

Evam eva kho bhikkhave, bhāvanānuyogam ananuyuttassa bhikkhuno viharato kiñ cā pi evaɱ icchā uppajjeyya:|| ||

'Aho vata me anupādāya āsavehi cittaɱ vimucceyyā' ti.|| ||

Atha khvassa n'eva anupādāya āsavehi cittaɱ vimuccati.|| ||

Taɱ kissa hetu?|| ||

Abhāvitattā tissa vacanīyaɱ.|| ||

Kissa abhāvitattā?|| ||

Abhāvitattā catunnaɱ satipaṭṭhānānaɱ,||
abhāvitattā catunnaɱ sammappadhānānaɱ,||
abhāvitattā catunnaɱ iddhipādānaɱ,||
abhāvitattā pañcannaɱ indriyānaɱ,||
abhāvitattā pañcannaɱ balānaɱ,||
abhāvitattā sattannaɱ bojjhaɱgānaɱ,||
abhāvitattā ariyassa aṭṭhaŋgikassa maggassa.|| ||

Bhāvanānuyogam ananuyuttassa bhikkhave, bhikkhuno [154] viharato kiñ cā pi evaɱ icchā uppajjeyya,|| ||

'Aho vata me anupādāya āsavehi cittaɱ vimucceyyā' ti|| ||

atha khvassa anupādāya āsavehi cittaɱ vimuccati.|| ||

Taɱ kissa hetu?|| ||

Bhāvitattātissa vacanīyaɱ.|| ||

Kissa bhāvitattā?|| ||

Bhāvitattā catunnaɱ satipaṭṭhānānaɱ,||
bhāvitattā catunnaɱ sammappadhānānaɱ,||
bhāvitattā catunnaɱ iddhipādānaɱ,||
bhāvitattā pañcannaɱ indriyānaɱ,||
bhāvitattā pañcannaɱ balānaɱ,||
bhāvitattā sattannaɱ bojjhaŋgānaɱ,||
bhāvitattā ariyassa aṭṭhaŋgikassa maggassa.|| ||

Seyyathā pi bhikkhave, kukkuṭiyā aṇḍāni aṭṭha vā dasa vā dvādasa vā tānassu kukkuṭiyā sammā adhisayitāni,||
sammā pariseditāni sammā paribhāvitāni.|| ||

Kiñ cā pi tassā kukkuṭiyā na evaɱ icchā uppajjeyya:|| ||

'Aho vata me kukkuṭapotakā pādanakhasikhāya vā mukhatuṇḍakena vā aṇḍakosaɱ padāletvā sotthinā abhinibbhijjeyyun' ti.|| ||

atha kho bhabbā va te kukkuṭapotakā pādanakhasikhāya vā mukhatuṇḍakena vā aṇḍakosaɱ padāletvā sotthinā abhinibbhijjituɱ.|| ||

Taɱ kisasa hetu?|| ||

Tathā hi pana bhikkhave, kukkuṭiyā aṇḍāni aṭṭha vā dasa vā dvādasa vā tāni kukkuṭiyā sammā adhisayitāni sammā pariseditāni sammā paribhāvitāni.|| ||

Evam eva kho bhikkhave, bhāvanānuyogam ananuyuttassa bhikkhuno viharato kiñ cā pi evaɱ icchā uppajjeyya:|| ||

'Aho vata me anupādāya āsavehi cittaɱ vimucceyyā' ti|| ||

atha khvassa n'eva anupādāya āsavehi cittaɱ vimuccati.|| ||

Taɱ kissa hetu?|| ||

Bhāvitattā tissa vacanīyaɱ.|| ||

Kissa bhāvitattā?|| ||

Bhāvitattā catunnaɱ satipaṭṭhānānaɱ,||
bhāvitattā catunnaɱ sammappadhānānaɱ,||
bhāvitattā catunnaɱ iddhipādānaɱ,||
bhāvitattā pañcannaɱ indriyānaɱ,||
bhāvitattā pañcannaɱ balānaɱ,||
bhāvitattā sattannaɱ bojjhaŋgānaɱ,||
bhāvitattā ariyassa aṭṭhaŋgikassa maggassa.|| ||

Seyyathā pi bhikkhave, palagaṇḍassa vā palagaṇḍante vāsissa vā vāsijaṭe dissante vā aŋgulipadāni dissanti aŋguṭṭhapadā||
no ca khvassa evaɱ ñāṇaɱ hoti:|| ||

'Ettakaɱ vata me ajja vāsijaṭaɱ khīṇaɱ ettakaɱ hiyyo,||
ettakaɱ pare' ti|| ||

atha khvassa khīṇe khīṇaɱtve va ñāṇaɱ hoti.|| ||

Evam eva kho bhikkhave, bhāvanānuyogam ananuyuttassa [155] viharato kiñ cā pi evaɱ ñāṇaɱ hoti|| ||

'Ettakaɱ vata me ajja āsavānaɱ khīṇaɱ, ettakaɱ hiyyo, ettakaɱ pare' ti|| ||

atha khvassa khīṇe khīṇaɱtve va ñāṇaɱ hoti|| ||

Seyyathā pi bhikkhave, sāmuddikāya nāvāya vettabandhanabaddhāya chammāsāni udake pariyādāya hemantikena thalaɱ ukkhittāya vātātapaparetāni bandhanāni,||
tāni pāvussakena meghena abhippavuṭṭhāni appakasiren'eva paṭippassambhanti putikāni bhavanti.|| ||

Evam eva kho bhikkhave, bhāvanānuyogam anuyuttassa bhikkhuno viharato appakasiren'eva saññojanāni paṭippassambhanti, putikāni bhavantī" ti.|| ||

 


Contact:
E-mail
Copyright Statement   Webmaster's Page