Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandhā Vagga:
22: Khandhāsaɱyutta

Sutta 135

Tatiya Koṭṭhita Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ āyasmā Sāriputto||
āysamā ca Mahā-Koṭṭhito,||
Bārāṇasiyaɱ viharanti||
Isipatane Migadāye.|| ||

Atha kho āyasmā Mahā-Kotthito sāyaṇhasamayaɱ paṭisallāṇā vuṭṭhito yenāyasmā Sāriputto ten'upasaɱkami.|| ||

Upasaɱkamitvā āyasmatā Sāriputtena saddhiɱ sammodi.|| ||

Sammodanīyaɱ kathaɱ sāraṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho āyasmā Mahā-Kotthito||
āyasmantaɱ Sāriputtaɱ etad avoca:|| ||

"Avijjā, avijjā" ti āvuso Sāriputta, vuccati.|| ||

Katamā nu kho āvuso, avijjā?|| ||

Kittāvatā ca avijjāgato hoti" ti?|| ||

"Idh'āvuso assutavā puthujjano|| ||

Rūpaɱ na pajānāti||
rūpa-samudayaɱ na pajānāti||
rūpa-nirodhaɱ na pajānāti||
rūpa-nirodhagāminiɱ paṭipadaɱ na pajānāti.|| ||

Vedanaɱ na pajānāti||
vedanā-samudayaɱ na pajānāti||
vedanā-nirodhaɱ na pajānāti||
vedanā-nirodhagāminiɱ paṭipadaɱ na pajānāti.|| ||

Saññaɱ na pajānāti||
saññā-samudayam na pajānāti||
saññā-nirodham na pajānāti||
saññā-nirodhagāminiɱ paṭipadaɱ na pajānāti.|| ||

Saɱkhāre na pajānāti||
saɱkhāra-samudayam na pajānāti||
saɱkhāra-nirodham na pajānāti||
saɱkhāra-nirodhagāminiɱ paṭipadaɱ na pajānāti.|| ||

Viññāṇaɱ na pajānāti||
viññāṇa-samudayam na pajānāti||
viññāṇa-nirodham na pajānāti||
viññāṇa-nirodhagāminiɱ paṭipadaɱ na pajānāti.|| ||

Ayaɱ vuccati āvuso, avijjā.|| ||

Ettāvatā ca avijjāgato hotī" ti.|| ||

 


 

"Vijjā, vijjā" ti āvuso Sāriputta, vuccati.|| ||

Katamā nu kho āvuso, vijjā?|| ||

Kittāvatā ca vijjāgato hoti" ti?|| ||

"Idh'āvuso sutavā ariyasāvako|| ||

Rūpaɱ pajānāti||
rūpa-samudayaɱ pajānāti||
rūpa-nirodhaɱ pajānāti||
rūpa-nirodhagāminiɱ paṭipadaɱ pajānāti.|| ||

Vedanaɱ pajānāti||
vedanā-samudayaɱ pajānāti||
vedanā-nirodhaɱ pajānāti||
vedanā-nirodhagāminiɱ paṭipadaɱ pajānāti.|| ||

Saññaɱ pajānāti||
saññā-samudayam pajānāti||
saññā-nirodham pajānāti||
saññā-nirodhagāminiɱ paṭipadaɱ pajānāti.|| ||

Saɱkhāre pajānāti||
saɱkhāra-samudayam pajānāti||
saɱkhāra-nirodham pajānāti||
saɱkhāra-nirodhagāminiɱ paṭipadaɱ pajānāti.|| ||

Viññāṇaɱ pajānāti||
viññāṇa-samudayam pajānāti||
viññāṇa-nirodham pajānāti||
viññāṇa-nirodhagāminiɱ paṭipadaɱ pajānāti.|| ||

Ayaɱ vuccati āvuso, vijjā.|| ||

Ettāvatā ca vijjāgato hotī" ti.|| ||

 


Contact:
E-mail
Copyright Statement   Webmaster's Page