Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
3. Khandha Vagga
28. Sāriputta Saɱyutta

Sutta 10

Sūci-Mukhī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[238]

[1][pts] Evaɱ me sutaɱ:|| ||

Ekaɱ samayaɱ āyasmā Sāriputto Rājagahe viharati vephavane kālandakanivāpe.|| ||

Atha kho āyasmā Sāriputto pubbaṇha-samayaɱ nivāsetvā patta-cīvaram ādāya Rājagahaɱ piṇḍāya pāvisi.|| ||

Rājagahe sapadānaɱ piṇḍāya caritvā taɱ piṇḍa-pātaɱ aññataraɱ kuḍḍamulaɱ nissāya bhuñjati.|| ||

Atha kho Sūci-mukhi paribbājikā yen'āyasmā Sāriputto ten'upasankami.|| ||

Upasaɱkamitvā āyasmantaɱ Sāriputtaɱ etad avoca:|| ||

"Kiɱ nu kho samaṇa,||
adho-mukho bhuñajasī" ti?|| ||

"Na khvāhaɱ bhagini,||
adho-mukho bhuñjāmī" ti.|| ||

"Tena hi samaṇa,||
uddhaɱ-mukho bhuñjasī" ti?|| ||

"Na khvāhaɱ bhagini,||
uddhaɱ-mukho bhuñjāmi" ti.|| ||

[239] "Tena hi samaṇa,||
disā-mukho bhuñjasi" ti?|| ||

"Na khvāhaɱ bhagini,||
disā-mukho bhuñjāmi" ti.|| ||

"Tena hi samaṇa,||
vidisā-mukho bhuñjasi" ti?|| ||

"Na khvāhaɱ bhagini,||
vidisā-mukho bhuñjāmi" ti.|| ||

"Kiɱ nu samaṇa,||
'adho-mukho bhuñjasi' ti||
iti puṭṭho samāno||
'na khvāhaɱ bhagini,||
adho-mukho bhuñjāmī' ti vadesi.|| ||

'Tena hi samaṇa,||
'uddhaɱ mukho bhuñjasi' ti||
iti puṭṭho samāno||
'na khvāhaɱ bhagini,||
uddhaɱ-mukho bhuñjāmi' ti vadesi.|| ||

'Tena hi samaṇa,||
'disā-mukho bhuñjasi' ti||
iti puṭṭho samāno||
'na khvāhaɱ bhagini,||
disā-mukho bhuñjāmī' ti vadesi.|| ||

'Tena hi samaṇa,||
vidisā-mukho bhuñjasi' ti||
iti puṭṭho samāno||
'na khvāhaɱ bhagini,||
vidisā-mukho bhuñjami' ti vadesi.|| ||

Kathañ carahi samaṇa, bhuñjasī" ti?|| ||

"Ye hi keci bhagini,||
samaṇa-brāhmaṇā vatthu-vijjā-tiracchāna-vijjāya micchā ājīvena jīvikaɱ kappenti,||
ime vuccanti bhagini,||
samaṇa-brāhmaṇā 'adho-mukhā bhuñjantī' ti.|| ||

Ye hi keci bhagini,||
samaṇa-brāhmaṇā nakkhatta-vijjā-tiracchāna-vijjāya micchā ājīvena jīvikaɱ kappenti,||
ime vuccanti bhagini,||
samaṇa-brāhmaṇā 'uddhaɱ-mukhā bhuñjantī' ti.|| ||

Ye hi keci bhagini,||
samaṇa-brāhmaṇā dūteyya-pahīṇa-gaman-ā-nuyogā micchā ājīvena jīvikaɱ kappenti,||
ime vuccanti bhagini,||
samaṇa-brāhmaṇā 'disā-mukhā bhuñjantī' ti.|| ||

Ye hi keci bhagini,||
samaṇa-brāhmaṇā aŋga-vijjā-tiracchāna-vijjāya micchā ājīvena jīvikaɱ kappenti,||
ime vuccanti bhagini,||
samaṇa-brāhmaṇā 'vidisā-mukhā bhuñjantī' ti.|| ||

So khvāhaɱ bhagini,||
na vatthu-vijjā-tiracchāna-vijjāya micchā ājīvena jīvikaɱ kappemi;||
na nakkattavijjā-tiracchāna-vijjāya micchā ājīvena jīvikaɱ kappemi;||
na dūteyya-pahīṇa-gaman-ā-nuyogā micchā ājīvena jīvikaɱ kappemi;||
na aŋga-vijjā-tiracchāna-vijjāya micchā ājīvena jīvikaɱ kappemi.|| ||

Dhammena bhikkhaɱ pariyesāmi,||
dhammena bhikkhaɱ pariyesitvā bhuñjāmi" ti.|| ||

[240] Atha kho Sūci-mukhi paribbājikā Rājagahe rathiyāya rathiyaɱ siɱghāṭakena sīɱghāṭakaɱ upasankamitvā evam ārocesi:|| ||

"Dhammikaɱ samaṇā Sakya-puttiyā āhāraɱ āhārenti,||
anavajjaɱ samaṇā Sakya-puttiyā āhāraɱ āhārenti,||
detha samaṇānaɱ Sakya-puttiyānaɱ piṇḍan" ti.|| ||

Sāriputta Vagga Paṭhama

 


Contact:
E-mail
Copyright Statement