Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
35: Saḷāyatanasaɱyuttaɱ
2. Yamakavaggo

Sutta 13

Sambodha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[6]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Pubbe me bhikkhave sambodhā anabhisambuddhassa [7] bodhisattass eva sato etad ahosi:|| ||

'Ko nu kho cakkhussa assādo,||
ko ādīnavo,||
kiɱ nissaraṇaɱ?|| ||

Ko sotassa assādo,||
ko ādīnavo,||
kiɱ nissaraṇaɱ?|| ||

Ko ghānassa assādo,||
ko ādīnavo,||
kiɱ nissaraṇaɱ?|| ||

Ko jivhāya assādo,||
ko ādīnavo,||
kiɱ nissaraṇaɱ?|| ||

Ko kāyassa assādo,||
ko ādīnavo,||
kiɱ nissaraṇaɱ?|| ||

Ko manassa assādo,||
ko ādīnavo,||
kiɱ nissaraṇaɱ?'|| ||

 


 

Tassa mayhaɱ bhikkhave etadahosi:|| ||

'Yaɱ kho cakkhuɱ paṭicca uppajjati sukhaɱ somanassaɱ||
ayaɱ cakkhussa assādo,||
yaɱ cakkhuɱ aniccaɱ dukkhaɱ vipariṇāmadhammaɱ||
ayaɱ cakkhussa ādīnavo,||
yo cakkhusmiɱ chandarāgavinayo chandarāgappahānaɱ||
idaɱ cakkhussa nissaraṇaɱ.|| ||

Yaɱ kho sotaɱ paṭicca uppajjati sukhaɱ somanassaɱ||
ayaɱ sotassa assādo,||
yaɱ sotaɱ aniccaɱ dukkhaɱ vipariṇāmadhammaɱ||
ayaɱ sotassa ādīnavo,||
yo sotasmiɱ chandarāgavinayo chandarāgappahānaɱ||
idaɱ sotassa nissaraṇaɱ.|| ||

Yaɱ kho ghānaɱ paṭicca uppajjati sukhaɱ somanassaɱ||
ayaɱ ghānassa assādo,||
yaɱ ghānaɱ aniccaɱ dukkhaɱ vipariṇāmadhammaɱ||
ayaɱ ghānassa ādīnavo,||
yo ghānasmiɱ chandarāgavinayo chandarāgappahānaɱ||
idaɱ ghānassa nissaraṇaɱ.|| ||

Yaɱ kho jivhaɱ paṭicca uppajjati sukhaɱ somanassaɱ||
ayaɱ jivhāya assādo,||
yā jivhā aniccā dukkhā vipariṇāmadhammā||
ayaɱ jivhāya ādīnavo,||
yo jivhāya chandarāgavinayo chandarāgappahānaɱ||
idaɱ jivhāya nissaraṇaɱ.|| ||

Yaɱ kho kāyaɱ paṭicca uppajjati sukhaɱ somanassaɱ||
ayaɱ kāyassa assādo,||
yo kāyo anicco dukkho viparināmadhammo||
ayaɱ kāyassa ādīnavo,||
yo kāyasmiɱ chandarāgavinayo chandarāgappahānaɱ||
idaɱ kāyassa nissaraṇaɱ.|| ||

Yaɱ kho manaɱ paṭicca uppajjati sukhaɱ somanassaɱ||
ayaɱ manassa assādo,||
yo mano anicco dukkho vipariṇāmadhammo||
ayaɱ manassa ādīnavo,||
yo manasmiɱ chandarāgavinayo chandarāgappahānaɱ||
idaɱ manassa nissaraṇaɱ.|| ||

 


 

Yāva kīvañcāhaɱ bhikkhave imesaɱ channaɱ ajjhattikānaɱ āyatanānaɱ||
evaɱ assādaɱ ca assādato ādīnavaɱ ca ādīnavato nissaraṇaɱ ca nissaraṇato yathābhūtaɱ nābbhaññāsiɱ,||
n'eva tāvāhaɱ bhikkhave sadevake loke samārake sabrahmake sassamaṇabrāhmaṇiyā pajāya sadeva manussāya anuttaraɱ sammāsambodhiɱ abhisambuddho ti paccaññāsiɱ. || ||

Yato ca kho haɱ bhikkhave imesaɱ channaɱ ajjhattikānaɱ āyatanānaɱ evaɱ assādaɱ ca assādato ādīnavaɱ ca ādīnavato nissaraṇaɱ ca nissaraṇato yathābhūtaɱ abbhaññāsiɱ,
athāhaɱ bhikkhave sadevake loke samārake sabrahmake sassamaṇabrāhmaṇiyā pajāya sadeva manussāya anuttaraɱ sammāsambodhiɱ abhisambuddho ti paccaññāsiɱ.|| ||

[8]Ñāṇaɱ ca pana me dassanaɱ udapādi.|| ||

Akuppā me cetovimutti||
ayam antimā jāti,||
natthidāni punabbhavo" ti.|| ||

 


Contact:
E-mail
Copyright Statement   Webmaster's Page