Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
35: Saḷāyatanasaɱyuttaɱ
2. Yamakavaggo

Sutta 14

Dutiya Sambodha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Pubbe me bhikkhave sambodhā anabhisambuddhassa bodhisattass eva sato etad ahosi:|| ||

'Ko nu kho rūpānaɱ assādo,||
ko ādīnavo,||
kiɱ nissaraṇaɱ?|| ||

Ko saddānaɱ assādo,||
ko ādīnavo,||
kiɱ nissaraṇaɱ?|| ||

Ko gandhānaɱ assādo,||
ko ādīnavo,||
kiɱ nissaraṇaɱ?|| ||

Ko rasānaɱ assādo,||
ko ādīnavo,||
kiɱ nissaraṇaɱ?|| ||

Ko poṭṭhabbānaɱ assādo,||
ko ādīnavo,||
kiɱ nissaraṇaɱ?|| ||

Ko dhammānaɱ assādo,||
ko ādīnavo,||
kiɱ nissaraṇaɱ?'|| ||

 


 

Tassa mayhaɱ bhikkhave etadahosi:|| ||

'Yaɱ kho rūpe paṭicca uppajjati sukhaɱ somanassaɱ||
ayaɱ rūpānaɱ assādo,||
yaɱ rūpā aniccaɱ dukkhaɱ vipariṇāmadhammaɱ||
ayaɱ rūpānaɱ ādīnavo,||
yo rūpesu chandarāgavinayo chandarāgappahānaɱ||
idaɱ rūpānaɱ nissaraṇaɱ.|| ||

Yaɱ kho sadde paṭicca uppajjati sukhaɱ somanassaɱ||
ayaɱ saddānaɱ assādo,||
yaɱ saddā aniccaɱ dukkhaɱ vipariṇāmadhammaɱ||
ayaɱ saddānaɱ ādīnavo,||
yo saddesu chandarāgavinayo chandarāgappahānaɱ||
idaɱ saddānaɱ nissaraṇaɱ.|| ||

Yaɱ kho gandhe paṭicca uppajjati sukhaɱ somanassaɱ||
ayaɱ gandhānaɱ assādo,||
yaɱ gandhā aniccaɱ dukkhaɱ vipariṇāmadhammaɱ||
ayaɱ gandhānaɱ ādīnavo,||
yo gandhesu chandarāgavinayo chandarāgappahānaɱ||
idaɱ gandhānaɱ nissaraṇaɱ.|| ||

Yaɱ kho rase paṭicca uppajjati sukhaɱ somanassaɱ||
ayaɱ rasānaɱ assādo,||
yā rasā aniccā dukkhā vipariṇāmadhammā||
ayaɱ rasānaɱ ādīnavo,||
yo rasesu chandarāgavinayo chandarāgappahānaɱ||
idaɱ rasānaɱ nissaraṇaɱ.|| ||

Yaɱ kho poṭṭhabbe paṭicca uppajjati sukhaɱ somanassaɱ||
ayaɱ poṭṭhabbānaɱ assādo,||
yo poṭṭhabbā anicco dukkho viparināmadhammo||
ayaɱ poṭṭhabbānaɱ ādīnavo,||
yo poṭṭhabbesu chandarāgavinayo chandarāgappahānaɱ||
idaɱ poṭṭhabbānaɱ nissaraṇaɱ.|| ||

Yaɱ kho dhamme paṭicca uppajjati sukhaɱ somanassaɱ||
ayaɱ dhammānaɱ assādo,||
yo dhammā anicco dukkho vipariṇāmadhammo||
ayaɱ dhammānaɱ ādīnavo,||
yo dhammesu chandarāgavinayo chandarāgappahānaɱ||
idaɱ dhammānaɱ nissaraṇaɱ.|| ||

 


 

Yāva kīvañcāhaɱ bhikkhave imesaɱ channaɱ bāhirānam āyatanānaɱ||
evaɱ assādaɱ ca assādato ādīnavaɱ ca ādīnavato nissaraṇaɱ ca nissaraṇato yathābhūtaɱ nābbhaññāsiɱ,||
n'eva tāvāhaɱ bhikkhave sadevake loke samārake sabrahmake sassamaṇabrāhmaṇiyā pajāya sadeva manussāya anuttaraɱ sammāsambodhiɱ abhisambuddho ti paccaññāsiɱ. || ||

Yato ca kho haɱ bhikkhave imesaɱ channaɱ bāhirānam āyatanānaɱ evaɱ assādaɱ ca assādato ādīnavaɱ ca ādīnavato nissaraṇaɱ ca nissaraṇato yathābhūtaɱ abbhaññāsiɱ,
athāhaɱ bhikkhave sadevake loke samārake sabrahmake sassamaṇabrāhmaṇiyā pajāya sadeva manussāya anuttaraɱ sammāsambodhiɱ abhisambuddho ti paccaññāsiɱ.|| ||

Ñāṇaɱ ca pana me dassanaɱ udapādi.|| ||

Akuppā me cetovimutti||
ayam antimā jāti,||
natthidāni punabbhavo" ti.|| ||

 


Contact:
E-mail
Copyright Statement   Webmaster's Page