Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
35: Saḷāyatanasaɱyuttaɱ
2. Yamakavaggo

Sutta 16

Dutiya Assādapariyesana (Assādena 2) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Rūpānāhaɱ bhikkhave assādapariyesanaɱ acariɱ,||
yo rūpānaɱ assādo tad ajjhagamaɱ,||
yāvatā rūpānaɱ assādo paññāya me so sudiṭṭho.|| ||

Rūpānāhaɱ bhikkhave ādīnavapariyesanaɱ acariɱ,||
yo rūpānaɱ ādīnavo tad ajjhagamaɱ,||
yāvatā rūpānaɱ ādīnavo paññāya me so sudiṭṭho.|| ||

Rūpānāhaɱ bhikkhave nissaraṇapariyesanaɱ acariɱ,||
yaɱ rūpānaɱ nissaraṇaɱ tad ajjhagamaɱ,||
yāvatā rūpānaɱ nissaraṇaɱ paññāya me taɱ sudiṭṭhaɱ.|| ||

Saddānāhaɱ bhikkhave assādapariyesanaɱ acariɱ,||
yo saddānaɱ assādo tad ajjhagamaɱ,||
yāvatā saddānaɱ assādo paññāya me so sudiṭṭho.|| ||

Saddānāhaɱ bhikkhave ādīnavapariyesanaɱ acariɱ,||
yo saddānaɱ ādīnavo tad ajjhagamaɱ,||
yāvatā saddānaɱ ādīnavo paññāya me so sudiṭṭho.|| ||

Saddānāhaɱ bhikkhave nissaraṇapariyesanaɱ acariɱ,||
yaɱ saddānaɱ nissaraṇaɱ tad ajjhagamaɱ,||
yāvatā saddānaɱ nissaraṇaɱ paññāya me taɱ sudiṭṭhaɱ.|| ||

Gandhānāhaɱ bhikkhave assādapariyesanaɱ acariɱ,||
yo gandhānaɱ assādo tad ajjhagamaɱ,||
yāvatā gandhānaɱ assādo paññāya me so sudiṭṭho.|| ||

Gandhānāhaɱ bhikkhave ādīnavapariyesanaɱ acariɱ,||
yo gandhānaɱ ādīnavo tad ajjhagamaɱ,||
yāvatā gandhānaɱ ādīnavo paññāya me so sudiṭṭho.|| ||

Gandhānāhaɱ bhikkhave nissaraṇapariyesanaɱ acariɱ,||
yaɱ gandhānaɱ nissaraṇaɱ tad ajjhagamaɱ,||
yāvatā gandhānaɱ nissaraṇaɱ paññāya me taɱ sudiṭṭhaɱ.|| ||

Rasānāhaɱ bhikkhave assādapariyesanaɱ acariɱ,||
yo rasānaɱ assādo tad ajjhagamaɱ,||
yāvatā rasānaɱ assādo paññāya me so sudiṭṭho.|| ||

Rasānāhaɱ bhikkhave ādīnavapariyesanaɱ acariɱ,||
yo rasānaɱ ādīnavo tad ajjhagamaɱ,||
yāvatā rasānaɱ ādīnavo paññāya me so sudiṭṭho.|| ||

Rasānāhaɱ bhikkhave nissaraṇapariyesanaɱ acariɱ,||
yaɱ rasānaɱ nissaraṇaɱ tad ajjhagamaɱ,||
yāvatā rasānaɱ nissaraṇaɱ paññāya me taɱ sudiṭṭhaɱ.|| ||

Phoṭṭabbāhaɱ bhikkhave assādapariyesanaɱ acariɱ,||
yo phoṭṭabbānaɱ assādo tad ajjhagamaɱ,||
yāvatā phoṭṭabbānaɱ assādo paññāya me so sudiṭṭho.|| ||

Phoṭṭabbāhaɱ bhikkhave ādīnavapariyesanaɱ acariɱ,||
yo phoṭṭabbānaɱ ādīnavo tad ajjhagamaɱ,||
yāvatā phoṭṭabbānaɱ ādīnavo paññāya me so sudiṭṭho.|| ||

Phoṭṭabbāhaɱ bhikkhave nissaraṇapariyesanaɱ acariɱ||
yaɱ phoṭṭabbānaɱ nissaraṇaɱ tad ajjhagamaɱ,||
yāvatā phoṭṭabbānaɱ nissaraṇaɱ paññāya me taɱ sudiṭṭhaɱ.|| ||

Dhammānāhaɱ bhikkhave assādapariyesanaɱ acariɱ,||
yo dhammānaɱ assādo tad ajjhagamaɱ,||
yāvatā dhammānaɱ assādo paññāya me so sudiṭṭho.|| ||

Dhammānāhaɱ bhikkhave ādīnavapariyesanaɱ acariɱ,||
yo dhammānaɱ ādīnavo tad ajjhagamaɱ,||
yāvatā dhammānaɱ ādīnavo paññāya me so sudiṭṭho.|| ||

Dhammānāhaɱ bhikkhave nissaraṇapariyesanaɱ acariɱ,||
yaɱ dhammānaɱ nissaraṇaɱ tad ajjhagamaɱ,||
yāvatā dhammānaɱ nissaraṇaɱ paññāya me taɱ sudiṭṭhaɱ.|| ||

 


 

Yāva kīvañcāhaɱ bhikkhave imesaɱ channaɱ bāhīrānaɱ āyatanānaɱ||
evaɱ assādaɱ ca assādato ādīnavaɱ ca ādīnavato nissaraṇaɱ ca nissaraṇato yathābhūtaɱ nābbhaññāsiɱ,||
n'eva tāvāhaɱ bhikkhave sadevake loke samārake sabrahmake sassamaṇabrāhmaṇiyā pajāya sadeva manussāya anuttaraɱ sammāsambodhiɱ abhisambuddho ti paccaññāsiɱ. || ||

Yato ca kho haɱ bhikkhave imesaɱ channaɱ bāhīrānaɱ āyatanānaɱ evaɱ assādaɱ ca assādato ādīnavaɱ ca ādīnavato nissaraṇaɱ ca nissaraṇato yathābhūtaɱ abbhaññāsiɱ,
athāhaɱ bhikkhave sadevake loke samārake sabrahmake sassamaṇabrāhmaṇiyā pajāya sadeva manussāya anuttaraɱ sammāsambodhiɱ abhisambuddho ti paccaññāsiɱ.|| ||

Ñāṇaɱ ca pana me dassanaɱ udapādi.|| ||

Akuppā me cetovimutti||
ayam antimā jāti,||
natthidāni punabbhavo" ti.|| ||

 


Contact:
E-mail
Copyright Statement   Webmaster's Page