Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Mūlapaññāsa
3. Sabba Vagga

Sutta 28

Āditta-Pariyāya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[19]

[1][pts][than][nymo][olds][bodh] Evaɱ me sutaɱ:|| ||

Ekaɱ samayaɱ Bhagavā Gayāyaɱ viharati Gayāsīse saddhiɱ bhikkhusahassena.|| ||

2. Tatra kho Bhagavā bhikkhū āmantesi:|| ||

"Sabbaɱ bhikkhave ādittaɱ.|| ||

Kiñ ca bhikkhave sabbaɱ ādittaɱ"?|| ||

3. Cakkhuɱ bhikkhave ādittaɱ,||
rūpā ādittā,||
cakkhu-viññāṇaɱ ādittaɱ,||
cakkhu-samphasso āditto.|| ||

Yam pidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi ādittaɱ.|| ||

Kena ādittaɱ?|| ||

Rāgagginā,||
dosagginā,||
mohagginā ādittaɱ||
jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi ādittan ti vadāmi.|| ||

4. Sotaɱ ādittaɱ,||
saddā ādittā,||
sota-viññāṇaɱ ādittaɱ,||
sota-samphasso āditto.|| ||

Yam pidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi ādittaɱ.|| ||

Kena ādittaɱ?|| ||

Rāgagginā,||
dosagginā,||
mohagginā ādittaɱ||
jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi ādittan ti vadāmi.|| ||

5. Ghānaɱ ādittaɱ,||
gandhā ādittā,||
ghāna-viññāṇaɱ ādittaɱ,||
ghāna-samphasso āditto.|| ||

Yam pidaɱ ghāna-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi ādittaɱ.|| ||

Kena ādittaɱ?|| ||

Rāgagginā,||
dosagginā,||
mohagginā ādittaɱ||
jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi ādittan ti vadāmi.|| ||

6. Jivhā ādittā,||
rasā ādittā,||
jivhā-viññāṇaɱ ādittaɱ,||
[20] jivhāsamphasso āditto.|| ||

Yam pidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi ādittaɱ.|| ||

Kena ādittaɱ?|| ||

Rāgagginā,||
dosagginā,||
mohagginā ādittaɱ||
jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi ādittan ti vadāmi.|| ||

7. Kāyo āditto,||
phoṭṭhabbā ādittā,||
kāya-viññāṇaɱ ādittaɱ,||
kāya-samphasso āditto.|| ||

Yam pidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi ādittaɱ.|| ||

Kena ādittaɱ?|| ||

Rāgagginā,||
dosagginā,||
mohagginā ādittaɱ||
jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi ādittan ti vadāmi.|| ||

8. Mano āditto,||
dhammā ādittā,||
mano-viññāṇaɱ ādittaɱ,||
mano-samphasso āditto.|| ||

Yam pidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi ādittaɱ.|| ||

Kena ādittaɱ?|| ||

Rāgagginā,||
dosagginā,||
mohagginā ādittaɱ||
jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi ādittan ti vadāmi.|| ||

9. Evam passaɱ bhikkhave sutavā ariyasāvako cakkhusmim pi nibbindati,||
rūpesu pi nibbindati,||
cakkhu-viññāṇe pi nibbindati,||
cakkhu-samphasse pi nibbindati.|| ||

Yam pidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako sotasmim pi nibbindati,||
saddā pi nibbindati,||
sota-viññāṇe pi nibbindati,||
sota-samphasse pi nibbindati.|| ||

Yam pidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako ghānasmim pi nibbindati,||
gandhā pi nibbindati,||
ghāna-viññāṇe pi nibbindati,||
ghāna-samphasse pi nibbindati.|| ||

Yam pidaɱ ghāna-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako jivhāya pi nibbindati,||
rasesu pi nibbindati,||
jivhā-viññāṇe pi nibbindati,||
jivhā-samphasse pi nibbindati.|| ||

Yam pidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako kāyasmim phoṭṭhabbā pi nibbindati,||
kāya-viññāṇe pi nibbindati,||
kāya-samphasse pi nibbindati.|| ||

Yam pidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako manasmim pi nibbindati,||
dhammesu pi nibbindati||
mano-viññāṇe pi nibbindati,||
mano-samphasse pi nibbindati.|| ||

Yam pidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Nibbindaɱ virajjati virāgā vimuccati,||
vimuttasmiɱ vimuttamiti ñāṇaɱ hoti:|| ||

Khīṇā jāti,||
vusitaɱ brahmacariyaɱ,||
kataɱ karaṇīyaɱ||
nāparaɱ itthattāyāti pajānātī ti.|| ||

Idam avoca Bhagavā.||
Attamanā te bhikkhū Bhagavato bhāsitaɱ abhinandunti.|| ||

Imasmiɱ ca pana veyyākaraṇasmiɱ bhaññamāne tassa bhikkhusahassassa anupādāya āsavehi cittāni vimucciɱsūti.|| ||

 


Contact:
E-mail
Copyright Statement   Webmaster's Page