Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Mūlapaññāsa
3. Sabba Vagga

Sutta 29

Andhabhūtam Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ bhagavā Rājagahe viharati Veḷuvane Kalandaka Nivāpe.|| ||

Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

Bhagavā etad avoca:|| ||

2. Tatra kho Bhagavā bhikkhū āmantesi:|| ||

"Sabbaɱ bhikkhave andhabhūtam.|| ||

[21] Kiñ ca bhikkhave sabbaɱ andhabhūtaɱ"?|| ||

3. Cakkhuɱ bhikkhave andhabhūtaɱ,||
rūpā andhabhūtā,||
cakkhu-viññāṇaɱ andhabhūtaɱ,||
cakkhu-samphasso andhabhūto.|| ||

Yam pidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi andhabhūtaɱ.|| ||

Kena andhabhūtaɱ?|| ||

Jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi andhabhūtan ti vadāmi.|| ||

4. Sotaɱ andhabhūtaɱ,||
saddā andhabhūtā,||
sota-viññāṇaɱ andhabhūtaɱ,||
sota-samphasso andhabhūto.|| ||

Yam pidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi andhabhūtaɱ.|| ||

Kena andhabhūtaɱ?|| ||

Jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi andhabhūtan ti vadāmi.|| ||

5. Ghānaɱ andhabhūtaɱ,||
gandhā andhabhūtā,||
ghāna-viññāṇaɱ andhabhūtaɱ,||
ghāna-samphasso andhabhūto.|| ||

Yam pidaɱ ghāna-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi andhabhūtaɱ.|| ||

Kena andhabhūtaɱ?|| ||

Jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi andhabhūtan ti vadāmi.|| ||

6. Jivhā andhabhūtā,||
rasā andhabhūtā,||
jivhā-viññāṇaɱ andhabhūtaɱ,||
jivhāsamphasso andhabhūto.|| ||

Yam pidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi andhabhūtaɱ.|| ||

Kena andhabhūtaɱ?|| ||

Jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi andhabhūtan ti vadāmi.|| ||

7. Kāyo andhabhūto,||
phoṭṭhabbā andhabhūtā,||
kāya-viññāṇaɱ andhabhūtaɱ,||
kāya-samphasso andhabhūto.|| ||

Yam pidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi andhabhūtaɱ.|| ||

Kena andhabhūtaɱ?|| ||

Jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi andhabhūtan ti vadāmi.|| ||

8. Mano andhabhūto,||
dhammā andhabhūtā,||
mano-viññāṇaɱ andhabhūtaɱ,||
mano-samphasso andhabhūto.|| ||

Yam pidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā||
tam pi andhabhūtaɱ.|| ||

Kena andhabhūtaɱ?|| ||

Jātiyā jarāya maraṇena,||
sokehi paridevehi,||
dukkhehi domanassehi,||
upāyāsehi andhabhūtan ti vadāmi.|| ||

9. Evam passaɱ bhikkhave sutavā ariyasāvako cakkhusmim pi nibbindati,||
rūpesu pi nibbindati,||
cakkhu-viññāṇe pi nibbindati,||
cakkhu-samphasse pi nibbindati.|| ||

Yam pidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako sotasmim pi nibbindati,||
saddā pi nibbindati,||
sota-viññāṇe pi nibbindati,||
sota-samphasse pi nibbindati.|| ||

Yam pidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako ghānasmim pi nibbindati,||
gandhā pi nibbindati,||
ghāna-viññāṇe pi nibbindati,||
ghāna-samphasse pi nibbindati.|| ||

Yam pidaɱ ghāna-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako jivhāya pi nibbindati,||
rasesu pi nibbindati,||
jivhā-viññāṇe pi nibbindati,||
jivhā-samphasse pi nibbindati.|| ||

Yam pidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako kāyasmim phoṭṭhabbā pi nibbindati,||
kāya-viññāṇe pi nibbindati,||
kāya-samphasse pi nibbindati.|| ||

Yam pidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariyasāvako manasmim pi nibbindati,||
dhammesu pi nibbindati||
mano-viññāṇe pi nibbindati,||
mano-samphasse pi nibbindati.|| ||

Yam pidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Nibbindaɱ virajjati virāgā vimuccati,||
vimuttasmiɱ vimuttamiti ñāṇaɱ hoti:|| ||

Khīṇā jāti,||
vusitaɱ brahmacariyaɱ,||
kataɱ karaṇīyaɱ||
nāparaɱ itthattāyāti pajānātī" ti.|| ||

 


Contact:
E-mail
Copyright Statement   Webmaster's Page