Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Paññāsaka Dutiya
1. Avijjā Vagga

Sutta 56

Āsava-Pahāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Atha kho aññataro bhikkhu yena bhagavā tenupasaṅkami.|| ||

Upasaṅkamitvā bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu bhagavantaɱ etad avoca:

"Kathan nu kho bhante jānato kathaɱ passato
āsavā pahīyantī" ti?|| ||

"Cakkhuɱ kho bhikkhu aniccato jānato passato||
āsavā pahīyanti.|| ||

Rūpe aniccato jānato passato||
āsavā pahīyanti.|| ||

Cakkhu-viññāṇaɱ aniccato jānato passato||
āsavā pahīyanti.|| ||

Cakkhu-sampassaɱ aniccato jānato passato||
āsavā pahīyanti.|| ||

Yam pidaɱ cakkhu-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccato jānato passato||
āsavā pahīyanti.|| ||

Sotaɱ kho bhikkhu aniccato jānato passato||
āsavā pahīyanti.|| ||

Sadde aniccato jānato passato||
āsavā pahīyanti.|| ||

Sota-viññāṇaɱ aniccato jānato passato||
āsavā pahīyanti.|| ||

Sota-sampassaɱ aniccato jānato passato||
āsavā pahīyanti.|| ||

Yam pidaɱ sota-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccato jānato passato||
āsavā pahīyanti.|| ||

Ghānaɱ kho bhikkhu aniccato jānato passato||
āsavā pahīyanti.|| ||

Gandhe aniccato jānato passato||
āsavā pahīyanti.|| ||

Ghāna-viññāṇaɱ aniccato jānato passato||
āsavā pahīyanti.|| ||

Ghāna-sampassaɱ aniccato jānato passato||
āsavā pahīyanti.|| ||

Yam pidaɱ ghāna-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccato jānato passato||
āsavā pahīyanti.|| ||

Jivhā kho bhikkhu aniccato jānato passato||
āsavā pahīyanti.|| ||

Rase aniccato jānato passato||
āsavā pahīyanti.|| ||

Jivhā-viññāṇaɱ aniccato jānato passato||
āsavā pahīyanti.|| ||

Jivhā-sampassaɱ aniccato jānato passato||
āsavā pahīyanti.|| ||

Yam pidaɱ jivhā-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccato jānato passato||
āsavā pahīyanti.|| ||

Kāyaɱ aniccato jānato passato||
āsavā pahīyanti.|| ||

Phoṭṭhabbe aniccato jānato passato||
āsavā pahīyanti.|| ||

Kāya-viññāṇaɱ aniccato jānato passato||
āsavā pahīyanti.|| ||

Kāya-samphassaɱ aniccato jānato passato||
āsavā pahīyanti.|| ||

Yam pidaɱ kāya-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccato jānato passato||
āsavā pahīyanti.|| ||

Manaɱ aniccato jānato passato||
āsavā pahīyanti.|| ||

Dhamme aniccato jānato passato||
āsavā pahīyanti.|| ||

Mano-viññāṇaɱ aniccato jānato passato||
āsavā pahīyanti.|| ||

Mano-samphassaɱ aniccato jānato passato||
āsavā pahīyanti.|| ||

Yam pidaɱ mano-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccato jānato passato||
āsavā pahīyanti.|| ||

Evaɱ kho bhikkhu jānato evaɱ passato||
āsavā pahīyantī" ti.|| ||

 


Contact:
E-mail
Copyright Statement   Webmaster's Page