Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Paññāsaka Dutiya
1. Avijjā Vagga

Sutta 60

Sabbūpādāna-Pariññā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

Sabbūpādāna-pariññāya vo bhikkhave dhammaɱ desissāmi.|| ||

Taɱ suṇātha.|| ||

Katamo ca bhikkhave sabbūpādāna-pariññāya dhammo?|| ||

Cakkhuñ ca paṭicca rūpe ca uppajjati,||
cakkhu-viññāṇaɱ||
tiṇṇaɱ saṅgati phasso,||
phassa-paccayā vedanā.|| ||

Evaɱ [33] passaɱ bhikkhave sutavā ariyasāvako||
cakkhusmim pi nibbindati,||
rūpesu pi nibbindati,||
cakkhu-viññāṇe pi nibbindati,||
cakkhu-samphasse pi nibbindati,||
vedanāya pi nibbindati.|| ||

Nibbindaɱ virajjati,||
virāgā vimuccati||
vimokkhā, 'Pariññātaɱ me upādānan,' ti pajānāti.|| ||

Sotañ ca paṭicca sadde ca uppajjati,||
sota-viññāṇaɱ||
tiṇṇaɱ saṅgati phasso,||
phassa-paccayā vedanā.|| ||

Evaɱ passaɱ bhikkhave sutavā ariyasāvako||
sotasmim pi nibbindati,||
saddesu pi nibbindati,||
sota viññāṇe pi nibbindati,||
sotasamphasse pi nibbindati,||
vedanāya pi nibbindati.|| ||

Nibbindaɱ virajjati,||
virāgā vimuccati||
vimokkhā, 'Pariññātaɱ me upādānan,' ti pajānāti.|| ||

Ghānañ ca paṭicca gandhe ca uppajjati,||
ghāna-viññāṇaɱ||
tiṇṇaɱ saṅgati phasso,||
phassa-paccayā vedanā.|| ||

Evaɱ passaɱ bhikkhave sutavā ariyasāvako||
ghānasmim pi nibbindati,||
gandhesu pi nibbindati,||
ghāna-viññāṇe pi nibbindati,||
ghāna-samphasse pi nibbindati,||
vedanāya pi nibbindati.|| ||

Nibbindaɱ virajjati,||
virāgā vimuccati||
vimokkhā, 'Pariññātaɱ me upādānan,' ti pajānāti.|| ||

Jivhañ ca paṭicca rase ca uppajjati,||
jivhā-viññāṇaɱ||
tiṇṇaɱ saṅgati phasso,||
phassa-paccayā vedanā.|| ||

Evaɱ passaɱ bhikkhave sutavā ariyasāvako||
jivhāya pi nibbindati,||
rasesu pi nibbindati,||
jivhā-viññāṇe pi nibbindati,||
jivhā-samphasse pi nibbindati,||
vedanāya pi nibbindati.|| ||

Nibbindaɱ virajjati,||
virāgā vimuccati||
vimokkhā, 'Pariññātaɱ me upādānan,' ti pajānāti.|| ||

Kāyañ ca paṭicca phoṭṭhabbe ca uppajjati,||
kāya-viññāṇaɱ||
tiṇṇaɱ saṅgati phasso,||
phassa-paccayā vedanā.|| ||

Evaɱ passaɱ bhikkhave sutavā ariyasāvako||
kāye pi nibbindati,||
phoṭṭhabbesu pi nibbindati,||
kāyaviññāṇe pi nibbindati,||
kāyasamphasse pi nibbindati,||
vedanāya pi nibbindati.|| ||

Nibbindaɱ virajjati,||
virāgā vimuccati||
vimokkhā, 'Pariññātaɱ me upādānan,' ti pajānāti.|| ||

Manañ ca paṭicca dhamme ca uppajjati,||
mano-viññāṇaɱ||
tiṇṇaɱ saṅgati phasso,||
phassa-paccayā vedanā.|| ||

Evaɱ passaɱ bhikkhave sutavā ariyasāvako||
manasmim pi nibbindati,||
dhammesu pi nibbindati,||
mano-viññāṇe pi nibbindati,||
Mano-samphasse pi nibbindati,||
vedanāya pi nibbindati.|| ||

Nibbindaɱ virajjati,||
virāgā vimuccati||
vimokkhā, 'Pariññātaɱ me upādānan,' ti pajānāti.|| ||

■|| ||

Ayaɱ kho bhikkhave sabbupādāna-pariññāya dhammo" ti.|| ||

 


Contact:
E-mail
Copyright Statement   Webmaster's Page