Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Paññāsako Dutiyo
2. Migajāla Vagga

Sutta 63

Paṭhama Migajālena Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[35]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Migajālo yena Bhagavā ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Migajālo Bhagavantaɱ etad avoca:|| ||

"'Ekavihārī ekavihārī' ti bhante vuccati.|| ||

[36] Kittāvatā nu kho bhante ekavihārī hoti?|| ||

Kittāvatā ca pana sadutiya vihārī hotī" ti?|| ||

"Santi kho Migajāla cakkhu-viññeyyā rūpā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu abhinandati||
abhivadati||
ajjhosāya||
tiṭṭhati,||
tassa taɱ abhinandato||
abhivadato||
ajjhosāya||
tiṭṭhato||
uppajjati nandi,||
nandiyā sati sārāgo hoti.|| ||

Sārāge sati saŋyogo hoti,||
nandi-saŋyojana saŋyutto kho Migajāla bhikkhu||
'sadutiya vihārī' ti vuccati.|| ||

Santi kho Migajāla sota-viññeyyā saddā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu abhinandati||
abhivadati||
ajjhosāya||
tiṭṭhati,||
tassa taɱ abhinandato||
abhivadato||
ajjhosāya||
tiṭṭhato||
uppajjati nandi,||
nandiyā sati sārāgo hoti.|| ||

Sārāge sati saŋyogo hoti,||
nandi-saŋyojana saŋyutto kho Migajāla bhikkhu||
'sadutiya vihārī' ti vuccati.|| ||

Santi kho Migajāla ghāna-viññeyyā gandhā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu abhinandati||
abhivadati||
ajjhosāya||
tiṭṭhati,||
tassa taɱ abhinandato||
abhivadato||
ajjhosāya||
tiṭṭhato||
uppajjati nandi,||
nandiyā sati sārāgo hoti.|| ||

Sārāge sati saŋyogo hoti,||
nandi-saŋyojana saŋyutto kho Migajāla bhikkhu||
'sadutiya vihārī' ti vuccati.|| ||

Santi kho Migajāla jivhā-viññeyyā rasā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu abhinandati||
abhivadati||
ajjhosāya||
tiṭṭhati,||
tassa taɱ abhinandato||
abhivadato||
ajjhosāya||
tiṭṭhato||
uppajjati nandi,||
nandiyā sati sārāgo hoti.|| ||

Sārāge sati saŋyogo hoti,||
nandi-saŋyojana saŋyutto kho Migajāla bhikkhu||
'sadutiya vihārī' ti vuccati.|| ||

Santi kho Migajāla kāyo-viññeyyā phoṭṭhabbā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu abhinandati||
abhivadati||
ajjhosāya||
tiṭṭhati,||
tassa taɱ abhinandato||
abhivadato||
ajjhosāya||
tiṭṭhato||
uppajjati nandi,||
nandiyā sati sārāgo hoti.|| ||

Sārāge sati saŋyogo hoti,||
nandi-saŋyojana saŋyutto kho Migajāla bhikkhu||
'sadutiya vihārī' ti vuccati.|| ||

Santi kho Migajāla mano-viññeyyā dhammā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu abhinandati||
abhivadati||
ajjhosāya||
tiṭṭhati,||
tassa taɱ abhinandato||
abhivadato||
ajjhosāya||
tiṭṭhato||
uppajjati nandi,||
nandiyā sati sārāgo hoti.|| ||

Sārāge sati saŋyogo hoti,||
nandi-saŋyojana saŋyutto kho Migajāla bhikkhu||
'sadutiya vihārī' ti vuccati.|| ||

Evaɱ vihārī ca Migajāla bhikkhu||
kiñcā pi araññe||
vanapatthāni||
pantāni||
senāsanāni||
paṭisevati||
appasaddāni||
appanigghosāni||
vijanavātāni||
manussarāhaseyyakāni||
paṭisallānasāruppāni,||
atha kho 'sadutiya vihārī' ti vuccati.|| ||

Taɱ kissa hetu?|| ||

Taṇhā hi'ssa dutiyā,||
sāḷssa appahīnā,||
tasmā 'sadutiya vihārī' ti vuccati.|| ||

 


 

Santi ca kho Migajāla cakkhuviññeyyā rūpā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu nābhinandati||
nābhivadati||
na ajjhosāya tiṭṭhati,||
tassa taɱ anabhinandato||
anabhivadato||
anajjhosāya||
tiṭṭhato nandi nirujjhati,||
nandiyā asati sārāgo na hoti.|| ||

Sārāge asati [37] saŋyogo na hoti,||
nandi-saŋyojana visaŋyutto kho Migajāla bhikkhu||
'ekavihārī' tī vuccati.|| ||

Santi ca kho Migajāla sota-viññeyyā saddā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu nābhinandati||
nābhivadati||
na ajjhosāya tiṭṭhati,||
tassa taɱ anabhinandato||
anabhivadato||
anajjhosāya||
tiṭṭhato nandi nirujjhati,||
nandiyā asati sārāgo na hoti.|| ||

Sārāge asati saŋyogo na hoti,||
nandi-saŋyojana visaŋyutto kho Migajāla bhikkhu||
'ekavihārī' tī vuccati.|| ||

Santi ca kho Migajāla ghāna-viññeyyā gandhā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu nābhinandati||
nābhivadati||
na ajjhosāya tiṭṭhati,||
tassa taɱ anabhinandato||
anabhivadato||
anajjhosāya||
tiṭṭhato nandi nirujjhati,||
nandiyā asati sārāgo na hoti.|| ||

Sārāge asati saŋyogo na hoti,||
nandi-saŋyojana visaŋyutto kho Migajāla bhikkhu||
'ekavihārī' tī vuccati.|| ||

Santi ca kho Migajāla jivhā-viññeyyā rasā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu nābhinandati||
nābhivadati||
na ajjhosāya tiṭṭhati,||
tassa taɱ anabhinandato||
anabhivadato||
anajjhosāya||
tiṭṭhato nandi nirujjhati,||
nandiyā asati sārāgo na hoti.|| ||

Sārāge asati saŋyogo na hoti,||
nandi-saŋyojana visaŋyutto kho Migajāla bhikkhu||
'ekavihārī' tī vuccati.|| ||

Santi ca kho Migajāla kāyo-viññeyyā phoṭṭhabbā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu nābhinandati||
nābhivadati||
na ajjhosāya tiṭṭhati,||
tassa taɱ anabhinandato||
anabhivadato||
anajjhosāya||
tiṭṭhato nandi nirujjhati,||
nandiyā asati sārāgo na hoti.|| ||

Sārāge asati saŋyogo na hoti,||
nandi-saŋyojana visaŋyutto kho Migajāla bhikkhu||
'ekavihārī' tī vuccati.|| ||

Santi ca kho Migajāla mano-viññeyyā dhammā||
iṭṭhā||
kantā||
manāpā||
piyarūpā||
kāmūpasaɱhitā||
rajanīyā.|| ||

Tañce bhikkhu nābhinandati||
nābhivadati||
na ajjhosāya tiṭṭhati,||
tassa taɱ anabhinandato||
anabhivadato||
anajjhosāya||
tiṭṭhato nandi nirujjhati,||
nandiyā asati sārāgo na hoti.|| ||

Sārāge asati saŋyogo na hoti,||
nandi-saŋyojana visaŋyutto kho Migajāla bhikkhu||
'ekavihārī' tī vuccati.|| ||

Evaɱ vihārī ca Migajāla bhikkhu kiñcā pi gāmante viharati ākiṇṇo||
bhikkhūhi bhikkhuṇīhi||
upāsakehi upāsikāhi||
rājūhi rājamahāmattehi||
titthiyehi titthiyasāvakehi,||
atha so 'ekavihārī' ti vuccati.|| ||

Taɱ kissa hetu?|| ||

Taṇhā hi'ssa dutiyā,||
sāḷssa pahīnā,||
tasmā 'ekavihārī' ti vuccatī" ti.|| ||

 


Contact:
E-mail
Copyright Statement   Webmaster's Page