Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Paññāsako Dutiyo
2. Migajāla Vagga

Sutta 67

Samiddhi-Dukkha-Pañha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ bhagavā Rājagahe viharati Veḷuvane Kalandaka nivāpe.|| ||

Atha kho āyasmā Samiddhi yena bhagavā tenupasaɱkami.|| ||

Upasaɱkamitvā bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Samiddhi bhagavantaɱ etad avoca:|| ||

"'Dukkhaɱ! Dukkhaɱ' ti bhante, vuccati.|| ||

Kittāvatā nu kho bhante dukkhaɱ vā assa dukkha-paññatti vā" ti?|| ||

"Yattha kho Samiddhi atthi cakkhu,||
atthi rūpā,||
atthi [39] cakkhu-viññāṇaɱ,||
atthi cakkhu-viññāṇa-viññātabbā dhammā,||
atthi tattha dukkhaɱ vā assa dukkha-paññatti vā.|| ||

Yattha kho Samiddhi atthi sota,||
atthi saddā,||
atthi sota-viññāṇaɱ,||
atthi sota-viññāṇa-viññātabbā dhammā,||
atthi tattha dukkhaɱ vā assa dukkha-paññatti vā.|| ||

Yattha kho Samiddhi atthi ghāna,||
atthi gandhā,||
atthi ghāna-viññāṇaɱ,||
atthi ghāna-viññāṇa-viññātabbā dhammā,||
atthi tattha dukkhaɱ vā assa dukkha-paññatti vā.|| ||

Yattha kho Samiddhi atthi jivhā,||
atthi rasā,||
atthi jivhā-viññāṇaɱ,||
atthi jivhā-viññāṇa-viññātabbā dhammā,||
atthi tattha dukkhaɱ vā assa dukkha-paññatti vā.|| ||

Yattha kho Samiddhi atthi kāyo,||
atthi phoṭṭhabbo,||
atthi kāya-viññāṇaɱ,||
atthi kāya-viññāṇa-viññātabbā dhammā,||
atthi tattha dukkhaɱ vā assa dukkha-paññatti vā.|| ||

Yattha kho Samiddhi atthi mano,||
atthi dhammā,||
atthi mano-viññāṇaɱ,||
atthi mano-viññāṇa-viññātabbā dhammā,||
atthi tattha dukkhaɱ vā assa dukkha-paññatti vā.|| ||

 


 

Yattha ca kho Samiddhi n'atthi cakkhu,||
n'atthi rūpā,||
n'atthi cakkhu-viññāṇaɱ,||
n'atthi cakkhu-viññāṇa-viññātabbā dhammā,||
n'atthi tattha dukkhaɱ vā assa dukkha-paññatti vā.|| ||

Yattha ca kho Samiddhi n'atthi sota,||
n'atthi saddā,||
n'atthi sota-viññāṇaɱ,||
n'atthi sota-viññāṇa-viññātabbā dhammā,||
n'atthi tattha dukkhaɱ vā assa dukkha-paññatti vā.|| ||

Yattha ca kho Samiddhi n'atthi ghāna,||
n'atthi gandhā,||
n'atthi ghāna-viññāṇaɱ,||
n'atthi ghāna-viññāṇa-viññātabbā dhammā,||
n'atthi tattha dukkhaɱ vā assa dukkha-paññatti vā.|| ||

Yattha ca kho Samiddhi n'atthi jivhā,||
n'atthi rasā,||
n'atthi jivhā-viññāṇaɱ,||
n'atthi jivhā-viññāṇa-viññātabbā dhammā,||
n'atthi tattha dukkhaɱ vā assa dukkha-paññatti vā.|| ||

Yattha ca kho Samiddhi n'atthi kāyo,||
n'atthi phoṭṭhabbā,||
n'atthi kāya-viññāṇaɱ,||
n'atthi kāya-viññāṇa-viññātabbā dhammā,||
n'atthi tattha dukkhaɱ vā assa dukkha-paññatti vā.|| ||

Yattha ca kho Samiddhi n'atthi mano,||
n'atthi dhammā,||
n'atthi mano-viññāṇaɱ,||
n'atthi mano-viññāṇa-viññātabbā dhammā,||
n'atthi tattha dukkhaɱ vā assa dukkha-paññatti vā" ti.|| ||

 


Contact:
E-mail
Copyright Statement   Webmaster's Page