Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Paññāsako Dutiyo
2. Migajāla Vagga

Sutta 69

Upasena Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[40]

[1][pts][than][bodh] Evaɱ me sutaɱ:|| ||

Ekaɱ samayaɱ āyasmā ca Sāriputto āyasmā ca Upaseno Rājagahe viharanti||
sītavane sappasoṇḍika pabbhāre.|| ||

Tena kho pana samayena āyasmato upasenassa kāye āsiviso patito hoti.|| ||

Atha kho āyasmā upaseno bhikkhū āmantesi:|| ||

"Etha me āvuso,||
imaɱ kāyaɱ mañcakaɱ āropetvā bahiddhā nīharatha,||
purāyaɱ kāyo idh'eva vikirati||
seyyathā pi bhusamuṭṭhi" ti.|| ||

Evaɱ vutte āyasmā Sāriputto āyasmantaɱ Upasenaɱ etad avoca:|| ||

"Na kho pana mayaɱ passāma āyasmato Upasenassa kāyassa vā aññathattaɱ indriyānaɱ vā vipariṇāmaɱ.|| ||

Atha panāyasmā Upaseno evam āha:|| ||

"Etha me āvuso imaɱ kāyaɱ mañcakaɱ āropetvā bahiddhā nīharatha,||
purāyaɱ kāyo idh'eva vikirati||
seyyathā pi bhusamuṭṭhi ti.|| ||

Yassa nūna āvuso Sāriputta evam assa:|| ||

'Ahaɱ cakkhun' ti vā||
'mama cakkhun' ti vā,||
'ahaɱ sotan' ti vā||
'mama sotan' ti vā,||
'ahaɱ ghānan' ti vā||
'mama ghānan' ti vā,||
'ahaɱ jivhā' ti vā||
'mama jivhā' ti vā,||
'ahaɱ kāyo' ti vā||
'mama kāyo' ti vā,||
'ahaɱ mano' ti vā||
'mama mano' ti vā,||
tassa nūna āvuso Sāriputta siyā kāyassa vā||
aññathattaɱ indriyānaɱ vā||
vipariṇāmo.|| ||

Mayhañ ca kho āvuso Sāriputta na evaɱ hoti:|| ||

[41] 'Ahaɱ cakkhun' ti vā||
'mama cakkhun' ti vā,||
'ahaɱ sotan' ti vā||
'mama sotan' ti vā,||
'ahaɱ ghānan' ti vā||
'mama ghānan' ti vā,||
'ahaɱ jivhā' ti vā||
'mama jivhā' ti vā,||
'ahaɱ kāyo' ti vā||
'mama kāyo' ti vā,||
'ahaɱ mano' ti vā||
'mama mano' ti vā,||
tassa mayhaɱ āvuso Sāriputta kiɱ kāyassa vā||
aññathattaɱ bhavissati indriyānaɱ vā||
vipariṇāmo" ti?|| ||

"Tathā hi panāyasmato Upasenassa dīgha-rattaɱ ahaɱ-kāra-mamiɱ-kāra-mānānusayā susamūhatā,||
tasmā yasmato Upasenassa na evaɱ hoti:|| ||

'Ahaɱ cakkhun' ti vā||
'mama cakkhun' ti vā,||
'ahaɱ sotan' ti vā||
'mama sotan' ti vā,||
'ahaɱ ghānan' ti vā||
'mama ghānan' ti vā,||
'ahaɱ jivhā' ti vā||
'mama jivhā' ti vā,||
'ahaɱ kāyo' ti vā||
'mama kāyo' ti vā,||
'ahaɱ mano' ti vā||
'mama mano' ti vā" ti.|| ||

Atha kho te bhikkhu āyasmato Upasenassa kāyaɱ mañcakaɱ āropetvā bahiddhā nīhariɱsu.|| ||

Atha kho āyasmato upasenassa kāyo tattheva vikiri||
seyyathā pi bhusamuṭṭhi ti.|| ||

 


Contact:
E-mail
Copyright Statement   Webmaster's Page