Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Dutiya
3. Gilāna Vagga

Sutta 74

Paṭhama Gilāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ:|| ||

[46] Ekaɱ samayaɱ Sāvatthiyaɱ|| ||

Atha kho aññataro bhikkhū yena Bhagavā ten'upasaɱkami.||
Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu Bhagavantaɱ etad avoca:|| ||

Amukasmiɱ bhante, vihāre aññataro bhikkhu navo appaññāto ābādhiko dukkhito bāḷhagilāno, sādhu bhante, Bhagavā yena so bhikkhu ten'upasaŋkamatu anukampaɱ upādāyāti.|| ||

Atha kho Bhagavā navavādañca sutvā gilānavādañca appaññāto bhikkhūti iti viditvā yena so bhikkhu ten'upasaŋkami.|| ||

Addasā kho so bhikkhu Bhagavantaɱ durato va āgacchantaɱ, disvāna mañcake samadhosi.|| ||

Atha kho Bhagavā taɱ bhikkhuɱ etad avoca:|| ||

Alaɱ bhikkhu mā tvaɱ mañcake samadhosi. Santimāni āsanāni paññattāni.|| ||

Tatthāhaɱ nisīdissāmiti.||
Nisīdi Bhagavā paññatte āsane.||
Nisajja kho Bhagavā taɱ bhikkhuɱ etad avoca:|| ||

Kacci te bhikkhu khamanīyaɱ, kacci yāpanīyaɱ, kacci dukkhā vedanā paṭikkamanti no abhikkamanti, paṭikkamosānaɱ paññāyati no abhikkamoti?|| ||

Na me bhante khamanīyaɱ, na yāpanīyaɱ, bā'hā me dukkhā vedanā abhikkamanti no paṭikkamanti, abhikkamosānaɱ paññāyati no paṭikkamoti.|| ||

Kacci te bhikkhu na kiñci kukkuccaɱ, na koci vippaṭisāroti?|| ||

Taggha me bhante, anappakaɱ kukkuccaɱ anappako vippaṭisāroti.|| ||

[47] Kacci pana tvaɱ bhikkhu attā sīlato na upavadatīti, na kho me bhante attā sīlato upavadatī ti.|| ||

No ce kira tvaɱ bhikkhu attā sīlato upavadati, atha kismiñca te kukkuccaɱ?|| ||

Ko ca vippaṭisāroti?|| ||

Na kho ahaɱ bhante, sīlavisuddhatthaɱ Bhagavatā dhammaɱ desītaɱ ājānāmīti.|| ||

No ce kira tvaɱ bhikkhu sīlavisuddhatthaɱ mayā dhammaɱ desitaɱ ājānāsi. Atha kimatthaɱ carahi tvaɱ bhikkhu mayā dhammaɱ desitaɱ ājānāsīti?|| ||

Rāgavirāgatthañca khvāhaɱ bhante Bhagavatā dhammaɱ desitaɱ ājānāmīti.|| ||

Sādhu sādhu bhikkhu, sādhu kho tvaɱ bhikkhu rāgavirāgatthaɱ mayā dhammaɱ desitaɱ ājānāsi, rāgavirāgattho hi bhikkhu mayā dhammo desito.|| ||

Taɱ kim maññasi bhikkhu, "cakkhuɱ niccaɱ vā aniccaɱ vā" ti?|| ||

Aniccaɱ bhante.|| ||

Yaɱ panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante, yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ "etaɱ mama eso'hamasmi eso me attā" ti?|| ||

No h'etaɱ bhante.|| ||

Sotaɱ "niccaɱ vā aniccaɱ vā" ti?|| ||

Aniccaɱ bhante.|| ||

Yaɱ panāniccaɱ dukkhaɱ vā taɱ sukhaɱ vāti? Dukkhaɱ bhante, yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ "etaɱ mama eso'hamasmi eso me attā" ti?|| ||

No h'etaɱ bhante.|| ||

Ghānaɱ "niccaɱ vā aniccaɱ vā" ti?|| ||

Aniccaɱ bhante.|| ||

Yaɱ panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante, yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ "etaɱ mama eso'hamasmi eso me attā" ti?|| ||

No h'etaɱ bhante.|| ||

Jivhā "niccā vā aniccā vā" ti?|| ||

Aniccā bhante.|| ||

Yaɱ panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante, yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ "etaɱ mama eso'hamasmi eso me attā" ti?|| ||

No h'etaɱ bhante.|| ||

Kāyo "nicco vā anicco vā" ti?|| ||

Anicco bhante.|| ||

Yaɱ panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante, yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ "etaɱ mama eso'hamasmi eso me attā" ti?|| ||

No h'etaɱ bhante.|| ||

Mano "nicco vā anicco vā" ti?|| ||

Anicco bhante.|| ||

Yaɱ panāniccaɱ dukkhaɱ vā taɱ sukhaɱ vāti?|| ||

Dukkhaɱ bhante, yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ "etaɱ mama eso'hamasmi eso me attā" ti?|| ||

No h'etaɱ bhante.|| ||

Evaɱ passaɱ bhikkhu Sutavā ariyasāvako cakkhusmimpi nibbindati, sotasmimpi nibbindati, ghānasmimpi nibbindati, jivhāyapi nibbindati, kāyasmimpi nibbindati, manasmimpi nibbindati.|| ||

Nibbindaɱ virajjati virāgā vimuccati vimuttasmiɱ vimuttamiti ñāṇaɱ hoti, khīṇā jāti, vusitaɱ brahmacariyaɱ, kataɱ karaṇīyaɱ nāparaɱ itthattāyāti pajānātī ti.|| ||

Idam avoca Bhagavā.|| ||

Attamano so bhikkhu Bhagavato bhāsitaɱ abhinandi.|| ||

Imasmiñ ca pana veyyākara-ṇasmiɱ bhaññamāne tassa bhikkhuno virajaɱ vītamalaɱ dhammacakkhuɱ udapādi "yaɱ kiñci samudayadhammaɱ sabbantaɱ nirodhadhammanti.|| ||

 


Contact:
E-mail
Copyright Statement   Webmaster's Page