Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ II: Paññāsaka Dutiya
3. Gilāna Vagga

Sutta 76

Anicca Suttaɱ (aka: Rādha Suttaɱ (i))

Adapted from the 1995 edition of the digital version of the Sri Lanka Buddha Jayanti Tripitaka Series.

 


[48]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Rādho yena bhagavā ten'upasankami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Rādho Bhagavantaɱ etad avoca:|| ||

"Sādhu me bhante, bhagavā saŋkhittena dhammaɱ desetu,||
yam ahaɱ Bhagavato dhammaɱ sutvā eko vūpakaṭṭho appamatto ātāpī pahit'atto vihareyyan" ti.|| ||

"Yaɱ kho Rādha, aniccaɱ||
tatra te chando pahātabbo.|| ||

Kiñ ca Rādha, aniccaɱ?|| ||

Cakkhuɱ kho Rādha, aniccaɱ,||
tatra te chando pahātabbo.|| ||

Rūpā aniccā,||
tatra te chando pahātabbo.|| ||

Cakkhu-viññāṇaɱ aniccaɱ,||
tatra te chando pahātabbo.|| ||

Cakkhu-samphasso anicco,||
tatra te chando pahātabbo.|| ||

Yam p'idaɱ cakkhu-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccaɱ,||
tatra te chando pahātabbo.|| ||

Sotaɱ aniccaɱ,||
tatra te chando pahātabbo.|| ||

Saddā aniccā,||
tatra te chando pahātabbo.|| ||

Sota-viññāṇaɱ aniccaɱ,||
tatra te chando pahātabbo.|| ||

Sota-samphasso anicco,||
tatra te chando pahātabbo.|| ||

Yam p'idaɱ sota-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccaɱ,||
tatra te chando pahātabbo.|| ||

Ghānaɱ aniccaɱ,||
tatra te chando pahātabbo.|| ||

Gandhā aniccā,||
tatra te chando pahātabbo.|| ||

Ghāna-viññāṇaɱ aniccaɱ,||
tatra te chando pahātabbo.|| ||

Ghāna-samphasso anicco,||
tatra te chando pahātabbo.|| ||

Yam p'idaɱ ghāna-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccaɱ,||
tatra te chando pahātabbo.|| ||

Jivhā aniccā,||
tatra te chando pahātabbo.|| ||

Rasā aniccā,||
tatra te chando pahātabbo.|| ||

Jivhā-viññāṇaɱ aniccaɱ,||
tatra te chando pahātabbo.|| ||

Jivhā-samphasso anicco,||
tatra te chando pahātabbo.|| ||

Yam p'idaɱ jivhā-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccaɱ,||
tatra te chando pahātabbo.|| ||

Kāyo anicco,||
tatra te chando pahātabbo.|| ||

Phoṭṭhabbā aniccā,||
tatra te chando pahātabbo.|| ||

Kāya-viññāṇaɱ aniccaɱ,||
tatra te chando pahātabbo.|| ||

Kāya-samphasso anicco,||
tatra te chando pahātabbo.|| ||

Yam p'idaɱ kāya-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccaɱ,||
tatra te chando pahātabbo.|| ||

Mano anicco,||
tatra te chando pahātabbo.|| ||

Dhammā aniccā,||
tatra te chando pahātabbo.|| ||

Mano-viññāṇaɱ aniccaɱ,||
tatra te chando pahātabbo.|| ||

Mano-samphasso anicco,||
tatra te chando pahātabbo.|| ||

Yam p'idaɱ mano-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccaɱ,||
tatra te chando pahātabbo.|| ||

[49] Yaɱ kho Rādha aniccaɱ,||
tatra te chando pahātabbo" ti.|| ||

 


Contact:
E-mail
Copyright Statement