Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Dutiya
3. Gilāna Vagga

Sutta 77

Dukkha Suttaɱ (aka: Rādha Suttaɱ (ii))

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Rādho yena bhagavā ten'upasaɱkami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Rādho Bhagavantaɱ etad avoca:|| ||

"Sādhu me bhante, bhagavā saṅkhittena dhammaɱ desetu,||
yam ahaɱ Bhagavato dhammaɱ sutvā eko vūpakaṭṭho appamatto ātāpī pahitatto vihareyyan" ti.|| ||

"Yaɱ kho Rādha, dukkhaɱ||
tatra te chando pahātabbo.|| ||

Kiñ ca Rādha, dukkhaɱ?|| ||

Cakkhuɱ kho Rādha, dukkhaɱ,||
tatra te chando pahātabbo.|| ||

Rūpā dukkhā,||
tatra te chando pahātabbo.|| ||

Cakkhu-viññāṇaɱ dukkhaɱ,||
tatra te chando pahātabbo.|| ||

Cakkhu-samphasso dukkho,||
tatra te chando pahātabbo.|| ||

Yampidaɱ cakkhu-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Sotaɱ dukkhaɱ,||
tatra te chando pahātabbo.|| ||

Saddā dukkhā,||
tatra te chando pahātabbo.|| ||

Sota-viññāṇaɱ dukkhaɱ,||
tatra te chando pahātabbo.|| ||

Sota-samphasso dukkho,||
tatra te chando pahātabbo.|| ||

Yampidaɱ sota-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Ghānaɱ dukkhaɱ,||
tatra te chando pahātabbo.|| ||

Gandhā dukkhā,||
tatra te chando pahātabbo.|| ||

Ghāna-viññāṇaɱ dukkhaɱ,||
tatra te chando pahātabbo.|| ||

Ghāna-samphasso dukkho,||
tatra te chando pahātabbo.|| ||

Yampidaɱ ghāna-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Jivhā dukkhā,||
tatra te chando pahātabbo.|| ||

Rasā dukkhā,||
tatra te chando pahātabbo.|| ||

Jivhā-viññāṇaɱ dukkhaɱ,||
tatra te chando pahātabbo.|| ||

Jivhā-samphasso dukkho,||
tatra te chando pahātabbo.|| ||

Yampidaɱ jivhā-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Kāyo dukkho,||
tatra te chando pahātabbo.|| ||

Phoṭṭhabbā dukkhā,||
tatra te chando pahātabbo.|| ||

Kāya-viññāṇaɱ dukkhaɱ,||
tatra te chando pahātabbo.|| ||

Kāya-samphasso dukkho,||
tatra te chando pahātabbo.|| ||

Yampidaɱ kāya-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Mano dukkho,||
tatra te chando pahātabbo.|| ||

Dhammā dukkhā,||
tatra te chando pahātabbo.|| ||

Manoviññāṇaɱ dukkhaɱ,||
tatra te chando pahātabbo.|| ||

Manosamphasso dukkho,||
tatra te chando pahātabbo.|| ||

Yampidaɱ mano-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Yaɱ kho Rādha dukkhaɱ,||
tatra te chando pahātabbo" ti.|| ||

 


Contact:
E-mail
Copyright Statement   Webmaster's Page