Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Dutiya
3. Gilāna Vagga

Sutta 80

Dutiya Avijjā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][olds][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññataro bhikkhu yena bhagavā tenupasaṅkami.|| ||

Upasaṅkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu Bhagavantaɱ etad avoca:|| ||

"Atthi nu kho bhante, eko dhammo yassa pahāṇā bhikkhuno||
avijjā pahīyati||
vijjā uppajjatī" ti?|| ||

"Atthi kho bhikkhu eko dhammo yassa pahāṇā bhikkhuno||
avijjā pahīyati||
vijjā uppajjatī" ti.|| ||

"Katamo pana bhante, eko dhammo yassa pahāṇā bhikkhuno||
avijjā pahīyati||
vijjā uppajjatī" ti?|| ||

"Idha bhikkhu, bhikkhuno sutaɱ hoti|| ||

'Sabbe dhammā nālaɱ abhinivesāyā' ti.|| ||

Evañ ce taɱ bhikkhu,||
bhikkhuno sutaɱ hoti|| ||

'Sabbe dhammā nālaɱ abhinivesāyā,' ti;|| ||

so sabbaɱ dhammaɱ abhijānāti,||
sabbaɱ dhammaɱ abhiññāya,||
sabbaɱ dhammaɱ parijānāti||
sabbaɱ dhammaɱ pariññāya||
sabba-nimittāni aññato passati.|| ||

Cakkhuɱ aññato passati,||
rūpe aññato passati,||
cakkhu-viññāṇaɱ aññato passati,||
cakkhu-samphassaɱ aññato passati,||
yampidaɱ cakkhu-samphassa-paccayā uppajjati||
sukhaɱ vā||
dukkhaɱ vā||
adukkha-m-asukhaɱ vā||
tam pi aññato passati.|| ||

Sotaɱ aññato passati,||
sadde aññato passati,||
sota-viññāṇaɱ aññato passati,||
sota-samphassaɱ aññato passati,||
yampidaɱ sota-samphassa-paccayā uppajjati||
sukhaɱ vā||
dukkhaɱ vā||
adukkha-m-asukhaɱ vā||
tam pi aññato passati.|| ||

Ghānaɱ aññato passati,||
gandhe aññato passati,||
ghāna-viññāṇaɱ aññato passati,||
ghāna-samphassaɱ aññato passati,||
yampidaɱ ghāna-samphassa-paccayā uppajjati||
sukhaɱ vā||
dukkhaɱ vā||
adukkha-m-asukhaɱ vā||
tam pi aññato passati.|| ||

Jivhā aññato passati,||
rase aññato passati,||
jivhā-viññāṇaɱ aññato passati,||
jivhā-samphassaɱ aññato passati,||
yampidaɱ jivhā-samphassa-paccayā uppajjati||
sukhaɱ vā||
dukkhaɱ vā||
adukkha-m-asukhaɱ vā||
tam pi aññato passati.|| ||

Kāyo aññato passati,||
phoṭṭhabbe aññato passati,||
kāya-viññāṇaɱ aññato passati,||
kāya-samphassaɱ aññato passati,||
yampidaɱ kāya-samphassa-paccayā uppajjati||
sukhaɱ vā||
dukkhaɱ vā||
adukkha-m-asukhaɱ vā||
tam pi aññato passati.|| ||

Mano aññato passati,||
dhamme aññato passati,||
mano-viññāṇaɱ aññato passati,||
mano-samphassaɱ aññato passati,||
yampidaɱ mano-samphassa-paccayā uppajjati||
sukhaɱ vā||
dukkhaɱ vā||
adukkha-m-asukhaɱ vā||
tam pi aññato passati.|| ||

Evaɱ kho bhikkhu jānato evaɱ passato bhikkhuno||
avijjā pahīyati||
vijjā uppajjatī" ti.|| ||

 


Contact:
E-mail
Copyright Statement   Webmaster's Page