Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Dutiya
4. Channa Vagga

Sutta 84

Paloka-dhamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[53]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

"Loko! Loko" ti! bhante vuccati.|| ||

Kittāvatā nu kho bhante 'loko' ti vuccatī" ti?|| ||

"Yaɱ kho Ānanda paloka-dhammaɱ||
ayaɱ vuccati ariyassa vinaye loko.|| ||

Kiñca Ānanda paloka-dhammaɱ?|| ||

Cakkhuɱ kho Ānanda paloka-dhammaɱ,||
rūpā paloka-dhammā,||
cakkhu-viññāṇaɱ paloka-dhammaɱ,||
cakkhu-samphasso paloka-dhammo,||
yampidaɱ cakkhu-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi paloka-dhammaɱ.|| ||

Sotaɱ kho Ānanda paloka-dhammaɱ,||
saddā paloka-dhammā,||
sota-viññāṇaɱ paloka-dhammaɱ,||
sota-samphasso paloka-dhammo,||
yampidaɱ sota-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi paloka-dhammaɱ.|| ||

Ghānaɱ kho Ānanda paloka-dhammaɱ,||
gandhā paloka-dhammā,||
ghāna-viññāṇaɱ paloka-dhammaɱ,||
ghāna-samphasso paloka-dhammo,||
yampidaɱ ghāna-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi paloka-dhammaɱ.|| ||

Jivhā kho Ānanda paloka-dhammā,||
rasā paloka-dhammā,||
jivhā-viññāṇaɱ paloka-dhammaɱ,||
jivhā-samphasso paloka-dhammo,||
yampidaɱ jivhā-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi paloka-dhammaɱ.|| ||

Kāyaɱ kho Ānanda paloka-dhammo,||
phoṭṭhabbā paloka-dhammā,||
kāya-viññāṇaɱ paloka-dhammaɱ,||
kāya-samphasso paloka-dhammo,||
yampidaɱ kāya-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi paloka-dhammaɱ.|| ||

Mano kho Ānanda paloka-dhammo,||
dhammā paloka-dhammā,||
mano-viññāṇaɱ paloka-dhammaɱ,||
mano-samphasso paloka-dhammo,||
yampidaɱ mano-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi paloka-dhammaɱ.|| ||

Yaɱ kho Ānanda, paloka-dhammāɱ ayaɱ vuccati ariyassa vinaye loko" ti.|| ||

 


Contact:
E-mail
Copyright Statement   Webmaster's Page